Azərbaycanın qeyri-hökumət təşkilatları “Mədən sənayesində şəffaflığın artırılması təşəbbüsü”nü Qarabağda qanunsuz fəaliyyət göstərən şirkətlərə qarşı tədbirlər görməyə çağırıblar
Bakı/12.07.21/Turan: İyulun 10-da Azərbaycan qeyri-hökumət təşkilatları koalisiyası “Mədən sənayesində şəffaflığın artırılması təşəbbüsü" çərçivəsində Azərbaycanın işğal olunmuş ərazilərində təbii ehtiyatların qanunsuz istismarı haqda bəyanat qəbul edib.
"Jurnalist araşdırmaları nəticəsində müəyyən edilib ki, Argentina, Avstraliya, Böyük Britaniya, Fransa, İran, ABŞ, Rusiya, İsveçrə, Almaniya, Niderland, BƏƏ, Çin, Litva, Livan, Yunanıstan, Uruqvay, Hindistan, Kanada və digər ölkələrin vətəndaşlarının özəl şirkətləri işğal edilmiş ərazilərdə Ermənistan və separatçı rejimlə birlikdə təbii resursların işlənilməsi üzrə müəssisələr yaradıblar".
Ümumilikdə, işğal olunmuş ərazilərdə dünyanın 20-dən çox ölkəsinin şirkətləri fəaliyyət göstəriblər. Son 12 ildə onlar Qarabağa 500 milyon dollar sərmayə qoyublar. Ötən ilin oktyabrında Azərbaycan Baş Prokurorluğu 6 şirkət rəhbərinin və 12 nəfərin barəsində beynəlxalq axtarış elan edib.
"Azərbaycan bu məsələni mütəmadi olaraq qaldıranda vətəndaşları Qarabağda fəaliyyət göstərən dövlətlər bu faktları təkzib edir, ya da məsuliyyəti öz üzərlərindən götürməyə çalışırlar. Onlar bildirirlər ki, resursların işlənməsini dövlət yox, özəl şirkətlər aparırlar. Lakin bu şirkətlər öz dövlətlərinin büdcələrinə vergi ödəyirlər", - sənəddə deyilir.
Mədən sənayesində şəffaflıq təşəbbüsü strategiyasına uyğun olaraq, şirkətlər təbii ehtiyatların hasilatı sahəsində rəsmi dövlət hüquqi şəxs ilə saziş bağlamalıdırlar.
Digər tərəfdən, 1949-cu il Cenevrə Konvensiyası şirkətlərə münaqişə nəticəsində uzun müddət işğal edilmiş və faktiki statusu aydın olmayan ərazilərdə hasilat aparmağı qadağan edir. İşğalçı dövlətin işğal edilmiş ərazilərdə hər hansı təbii ehtiyatları və ya mülkiyyəti istismar etmək hüququ yoxdur.
Mədən sənayesində şəffaflıq təşəbbüsü koalisiyası beynəlxalq koalisiya katibliyini və digər hökumətlərarası və beynəlxalq hüquq- müdafiə təşkilatlarını Azərbaycan ərazilərində qanunsuz fəaliyyət göstərmiş və fəaliyyət göstərməyə davam edən şirkətlərə qarşı müvafiq hüquqi tədbirlər görməyə çağırır.
Belə şirkətlər arasında "Canadian First Dynasty Mines Ltd" (Kanada), "GeoProMiningLtd" (Rusiya) və "GPM Gold" törəmə strukturu, Amerika şirkətləri "Global Gold Armenian Ltd", "Geologix Group", "Rodino Haskovo" JIC, "Centro Ceibal", "Deccan Gold Mines Ltd", "Indian Sterlite Gold Ltd", "Cosmote Romanian Mobile Telec Telecommunications S.A” və digər şirkətlərin adları açıqlanıb.
Koalisiyaya Azərbaycanın 52 qeyri-hökumət təşkilatı daxildir.—06D-
Siyasət
-
Azərbaycan bu həftə Fransada keçirilən Fransızofoniya Sammitindən sonra Ermənistana təxribatçı hərəkətlərdən çəkinməyə və ya normallaşma prosesini tamamlamaq, ya da qarşıdurma yolunu seçmək arasında qərar verməyə çağırıb.
-
Milli Məclisin 43 deputatı xarici işlər naziri Ceyhun Bayramova müraciət edərək, ABŞ-la münasibətlərə yenidən baxılması və müdafiə sahəsində əməkdaşlığa dair sazişlərin denonsasiyası çağırışı ilə çıxış edib.
-
Prezident İlham Əliyev 2024-2025-ci tədris ilində Azərbaycan Respublikasının ali təhsil müəssisələrinə daxil olan tələbələrə prezident təqaüdlərinin verilməsi haqqında sərəncam imzalayıb.
-
Oktyabrın 4-də Azərbaycanın Rusiyada yeni fövqəladə və səlahiyyətli səfiri Rəhman Mustafayev Rusiya xarici işlər naziri Sergey Lavrov tərəfindən qəbul edilib.
Rəy yaz