Bakıda dünya liderlərinin və ekspertlərin iştirakı ilə VI Ümumdünya Mədəniyyətlərarası Dialoq Forumu açılıb

Mayın 1-də Bakıda VI Ümumdünya Mədəniyyətlərarası Dialoq Forumu açılıb. Forumda 100-dən çox ölkədən 700  qonaq iştirak edir. 2008-ci ildə prezident İlham Əliyevin irəli sürdüyü "Bakı Prosesi"nin ayrılmaz hissəsi olan bu üçgünlük tədbir mədəniyyətlərarası dialoq və əməkdaşlıq vasitəsilə qlobal sülhün və təhlükəsizliyin möhkəmləndirilməsinə yönəlib.

Forum iqlim dəyişikliyinin mədəni irsə təsiri, ksenofobiya, qeyri-leqal miqrasiya problemləri, həmçinin süni intellektin yaratdığı imkanlar və təhdidlər kimi geniş mövzuları əhatə edən on panel müzakirə və dörd plenar iclasdan ibarət gündəm təqdim edir. Gənclərə və təhsilə, mədəniyyətlərarası dialoqda qadınların roluna, davamlı, yaşıl gələcəyin təbliğinə xüsusi diqqət yetirilir.

Forum iştirakçıları arasında yüksək səviyyəli dövlət xadimləri, parlament rəhbərləri, dini liderlər, alimlər, jurnalistlər və müxtəlif etnik və mədəni qrupların nümayəndələri var. Onlar birlikdə həmrəyliyi möhkəmləndirmək və qlobal parçalanmaya qarşı mübarizə aparmaq, sülh naminə nəsillər arasında dialoqu təşviq etmək üçün yumşaq gücdən istifadə yollarını araşdıracaqlar və qlobal mədəni dirçəlişə təşəbbüsdə müxtəlif mədəniyyətlərin rolunu müzakirə edəcəklər.

Açılış mərasimində çıxış edən prezident İlham Əliyev Forumun aktual qlobal problemlərin həlli və mədəniyyətlərarası anlaşmanın təşviqi üçün beynəlxalq platforma kimi əhəmiyyətini vurğulayıb. O həmçinin Azərbaycan və Ermənistan arasında sərhədin delimitasiyası və demarkasiyası istiqamətində davam edən səyləri qeyd edərək, xarici vasitəçilər olmadan birbaşa dialoq və əməkdaşlığın vacibliyini vurğulayıb.

Forum iştirakçılarının Azərbaycanın 30 illik işğaldan azad edilmiş ərazilərinə səfərlərinin təşkili də gözlənilir. Tədbir çərçivəsində Ağdamda və Şuşada xüsusi panel sessiyaların keçirilməsi də nəzərdə tutulur.

“Bakı Prosesi” yarandığı gündən bütün dünyada siyasət və perspektivləri formalaşdıran diskussiyaların aparılmasına töhfə verməklə əhatə  və təsir dairəsini xeyli genişləndirib.