Bayden İsrailə və İordaniyaya səfərə gedir

Vaşinqton/17.10.23/Turan: ABŞ prezidenti Co Bayden "HƏMAS-ın amansız terror hücumu qarşısında İsrailə sarsılmaz dəstəyini nümayiş etdirmək və gələcək addımlarla bağlı məsləhətləşmələr aparmaq üçün" oktyabrın 18-də İsrailə yola düşəcək. Turan-ın müxbirinin verdiyi xəbərə görə, bu barədə bazar ertəsi Ağ Ev bildirib.

Daha sonra Bayden Ammana yola düşəcək, burada kral Abdulla, Misir prezidenti Sisi və Fələstin muxtariyyətinin prezidenti Mahmud Abbasla görüşəcək.

Ağ Evin mətbuat katibi Karin Jan-Pyerin sözlərinə görə, Bayden Qəzzə bölgəsində mülki əhalinin humanitar ehtiyaclarını müzakirə edəcək.

"Biz kifayət qədər açıq şəkildə bildirdik ki, Qəzzəyə humanitar yardım daxil olmaqda davam etməlidir", deyə Milli Təhlükəsizlik Şurasının nümayəndəsi Con Kirbi bazar ertəsi jurnalistlərə bildirib. "Bu, prezident Baydenin və onun administrasiyasının ardıcıl çağırışı idi".

Səfər Pentaqonun İsrailə yardım üçün öz qoşunlarını hazır vəziyyətə gətirmək qərarı qəbul etməsi ilə əlaqədar baş tutub. KİV-in məlumatına görə, ötən həftə sonu İsrailə məsləhət və tibbi dəstək göstərməyə hazır olacaq 2000 hərbi qulluqçu seçilib. 

Bayden İsrailə hərbi yardım göstərilməsi ilə bağlı heç bir şərt irəli sürməyəcək, deyə Kirbi bildirib. Vəziyyətin İran tərəfdən gərginləşdirilməsinə gəlincə, Kirbi deyib ki, hələlik bunun əlamətləri görünmür, lakin ABŞ vəziyyəti diqqətlə izləyir. 0