Bayramovun Kleverli ilə telefon söhbəti

Bakı/17.10.23/Turan: Azərbaycanın XİN başçısı Ceyhun Bayramov ilə Böyük Britaniyanın xarici işlər, ittifaq və inkişaf məsələləri üzrə dövlət katibi Ceyms Kleverli arasında telefon danışığı baş tutub.

Telefon danışığı zamanı iki ölkə arasında əməkdaşlıq gündəliyinin perspektivləri, habelə mövcud regional vəziyyət, Azərbaycan və Ermənistan arasında normallaşma və sülh prosesinin hazırkı durumu müzakirə olunub, xəbəri Azərbaycan XİN-in mətbuat xidməti yayıb.

Bayramov bölgədəki mövcud vəziyyət barədə ətraflı məlumat verərək, Qarabağ bölgəsində tərəfimizdən aparılan lokal antiterror tədbirləri nəticəsində regionda sülh quruculuğu və sabitliyə davamlı təhdid törədən qanunsuz erməni silahlı qüvvələrinin mövcudluğuna son qoyulduğunu bildirib.

Azərbaycan ərazilərindəki qeyri-qanuni silahlı qüvvələrin tərk-silah edilməsi nəticəsində erməni saknənlərin Azərbaycan cəmiyyətim reinteqrasiyası prosesinin qarşısında duran maneələrin aradan qaldırılıb, deyə Bayramov əlavə edib.

O, həmçinin bu istiqamətdə müvafiq tədbirlərin həyata keçirildiyini diqqətə çatdırıb.

Kleverli bölgədə sülh və etimad quruculuğu səylərinin davam etdirilməsinin, bu xüsusda Azərbaycan və Ermənistan arasında sülh və normallaşma gündəliyi üzrə danışıqların davam etdirilməsinin vacibliyini vurğulayıb.

Telefon danışığı zamanı həmçinin qarşılıqlı maraq doğuran digər məsələlər ətrafında fikir mübadiləsi aparılıb. 06B