Bolton Qafqaz turnesine yekun vurub

Tbilisi/26.10.18/Turan: "Gürcüstan bizim üçün yüksək strateji maraqlar ölkəsidir", bu barədə ABŞ prezidentinin milli təhlükəsizlik məsələləri üzrə müşaviri Con Bolton Gürcüstan səfərinə yekun vurarkən bildirib.

O, Gürcüstan baş naziri Mamuka Baxtadze, xarici işlər naziri David Zalkaliani, müdafiə naziri Levan İzoriya və daxili işlər naziri Georgi Qaxariya ilə görüşlərini yüksək qiymətləndirib.

"Görüşlər zamanı regiondakı vəziyyət və Gürcüstan və Amerika Birləşmiş Ştatları arasında ikitərəfli münasibətlərlə bağlı bir sıra məsələləri müzakirə etdik. Mən Gürcüstanla münasibətlərə nə qədər böyük əhəmiyyət verdiyimizi qeyd etdim. Gürcüstan bizim üçün ən yüksək strateji maraqlar ölkəsidir. Amerika Birləşmiş Ştatlarının Sovet İttifaqı dağıldıqdan sonra Gürcüstanın müstəqilliyi və ərazi bütövlüyünə verdiyi dəstəyin nə dərəcədə möhkəm olduğunu bir daha vurğulamaq istərdim. Mən eyni zamanda mövqeyimizin dəyişmədiyini təsdiq etdim", deyə ABŞ prezidentinin müşaviri bildirib.

Onun sözlərinə görə, baş nazir Mamuka Baxtadze ilə görüşdə söhbət Gürcüstan və ABŞ arasında ikitərəfli münasibətlər və regionda əməkdaşlıqla bağlı imkanlardan söhbət gedib. "Ümumilikdə bu gün səfərimi və görüşləri çox müsbət və məhsuldar olaraq qiymətləndirərdim", deyə bundan əvvəl Bakı və Yerevanda səfərdə olmuş Con Bolton bildirib. -02D-