Cəmil Həsənli Amerika səfərinin yekunları ilə bağlı mətbuat konfransı keçirib

Milli Şuranın prezidentliyə keçmiş namizədi Cəmil Həsənli noyabrın 14-23-də Amerikaya səfəri zamanı Azərbaycanda prezident seçkiləri, seçkilərin saxtalaşdırılması, siyasi məhbuslar, söz azadlığı, mediaya təzyiqlər, demokratiya, insan hüquqları, ikitərəfli əlaqələr, regionda durum, Dağlıq Qarabağ münaqişəsi və digər məsələləri müzakirə edib.     

Cəmil Həsənli səfərinin yekunları ilə bağlı bu gün RATİ-nin media mərkəzində keçirdiyi mətbuat konfransında deyib ki, Amerikanın rəsmi şəxsləri, ekspertləri Azərbaycandakı situasiyalardan və durumdan detallarına qədər məlumatlıdır. 

O, Amerikada “Tom Lantos” qrupu ilə görüşdüyünü və siyasi məhbus, həbsdə olan jurnalistlərin müdafiəsi ilə bağlı fikir mübadiləsi apardığını bildirib. “Lantos” qrupu bu həftə Azərbaycandakı siyasi həbslərlə bağlı Konqresə müraciət edəcək”.    

Həsənlinin sözlərinə görə, Fredoum House təşkliatı da Azərbaycanın insan haqları ilə bağlı öhdəliyini yerinə yetirməməsindən narahatdır. “Təşkilatın rəhbəri Devid Kramer narahatçılığını ifadə etdi. Təşkilat Maqnitski qanunun Azərbaycanda insan haqlarını pozan məmurlara da tətbiq edilməsini təklif edib. Azərbaycan heç vaxt seçkilər bu il olduğu qədər siyasi məhbusla getməyib”. 

Prezidentliyə keçmiş namizəd Amerikada bütün görüşlərində, konfranslarda REAL Hərəkatının lideri İlqar Məmmədov, Müsavat Partiyasının başqan müavini Tofiq Yaqublu, NİDA-çılar, jurnalistlər, blogerlər, inanclı insanların həbsi ilə bağlı məsələ qaldırıb.      

Həsənli bütün bu məsələləri həmçinin Senatın Xarici Əlaqələr Komitəsində, Konqresin Təhlükəsizlik Komissiyasında görüşlərində, Amerikalı Azərbaycanlılar Demokratiya Uğrunda- AZAD-ın təşkil etdiyi və Vilson mərkəzində və b. keçirdiyi konfranslarda qaldırıb. O, Dövlət katibinin demokratiya, insan hüquqları və əmək məsələləri üzrə köməkçisi Tomas Melia, Dövlət Departamentinin Avropa, Qafqaz və Orta Asiya idarəsinin rəhbəri ilə görüşlərində, Karnegi Fondundakı konfransdakı çıxışında da demokratiya, seçki, insan haqları, təhlükəsizlik, regiondakı mövcud durumla bağlı danışıb. 

Milli Şuranın prezidentliyə namizədi maraqlı görüşlərindən birini də Amerikanın Səsi teleradiosunun rəhbəri Deyvid Ensorla olduğunu deyib. D.Ensor 1993-cü ildə Qarabağ müharibəsi zamanı Azərbaycanda cəbhə xəttində olub. “Biz Azərbaycanda çap, video və audio medianın durumundan danışdıq. Amerikanın Səsinin soyuq müharibə dövründə və keçmiş SSRİ-nin dağıdılmasında əhəmiyyətini qeyd etdim. İndi də “Amerikanın Səsi”nin proqramlarının izlənildiyini bildirdim, Dünyanın ən böyük informasiya mərkəzlərindən olan bu korporasiya dünyada demokratiya və insan hüquqları sahəsində mühüm işlər görür, avtoritarizmə qarşı mübarizədə müstəqil xəbər mənbəyi kimi əhəmiyyətli işləyir. Azərbaycanda insanların  xəbərləri müstəqil mənbələrdən almasında bu şirkət mühüm rol oynayır”, deyə o qeyd edib.    

Həsənli Amerika səfəri zamanı Azərbaycan diasporu və bu ölkədə təhsil alan tələbələrlə də görüşüb. -03C-