Cənubi Qafqaz liberalları Potsdam prosesini davam etdirib

«Potsdam prosesi. Qafqaz regionunda azadlıq, sülh və çiçəklənməyə yardım» konfransı 13-15 iyulda Tbilisidə keçirilib.

Onu Fridrix Naumann Fondu təşkil edib və Gürcüstan paytaxtında Avropa Liberal Demokrat və İslahatçı Partiyası, Müsavat Partiyası (Azərbaycan), Erməni Ümummilli Hərəkatı (Ermənistan) və  Respublikaçılar Partiyasını (Gürcüstan) toplayıb.

Konfransda Cənubi Qafqazda siyasi vəziyyət müzakirə edilib. Regionun üç ölkəsində siyasi sistemlərin avtoritarizmdən demokratiyaya keçidində əsas mərhələ kimi seçkilərə xüsusi diqqət ayrılıb.

Potsdam prosesinin bundan sonrakı inkişafına - Cənubi Qafqazın üç ölkəsinin çiçəklənən, sabit və demokratik Qafqaz yaradılması barədə üç partiyanın sazişinə xüsusi diqqət yetirilib.

2010-cu ilin oktaybrında Potsdamda Müsavat Partiyasının sədri İsa Qəmbər, Respublikaçılar Partiyasının (Gürcüstan) sədri David Usupaşvili və Erməni Ümummilli Hərəkatı İdarə Heyətinin sədri Aram Manukyan demokratiya prinsiplərinin təsbiti, münaqişələr, zorakılıq, korrupsiya, insan haqları və vətəndaş azadlıqlarının pozulmasından xalqların əzabına son qoyulması üçün addımlar atılması məqsədi ilə  Potsdam bəyannaməsi imzalayıblar.

Tərəflər demokratiyanın, yaşamaq haqqının, qanun qarşısında bərabərlik, şəxsi azadlığın təməl prinsiplərinin təsbiti; mülkiyyətin toxunulmazlığı, azad bazar iqtisadiyyatı; hökumətin azad və ədalətli seçkilərlə seçilməsi; dövlət idarəçiliyinin şəffaflığı və s. üzrə razılığa gəliblər.

Strateji hədəf kimi münaqişələrin həllinin, möhkəm, uuznmüddətli sülhün və regionun çiçəklənməsinin əsas amili kimi Avropa məkanına daxil olmaq seçilib.

İndiki görüşdə iki ildə Cənubi Qafqazda baş verən hadisələr analiz edilib və Potsdam prosesinin irəliləməsi üçün bundan sonrakı addımlar razılaşdırılıb. Buraya birgə tədbirlər və aksiyalar keçirilməsi, indiki Tbilisi görüşündə müzakirəsi başlayan məsələlər üzrə yeni qərarlar qəbul edilməsi daxildir.