Ekspertlər: �Avropa Şurasından çıxmaq Azərbaycanın maraqlarına uyğun deyil�

Bakı/23.10.17/Turan: Oktyabrın 20-də parlamentin iclasında spiker Oqtay Əsədov bildirib ki, əgər Azərbaycana qarşı Avropa İnsan Hüquqları Konvensiyasının 46-cı maddəsi tətbiq edilərsə ölkənin Avropa Şurasından çıxması məsələsinə baxılacaq.

"Azərbaycan bu qərarların hamısını icra edir, cərimələri ödəyir. Elə bil lotereya oynayırlar, o qədər ölkənin içindən hədəf kimi Azərbaycanı seçirlər. Məlum maddənin Azərbaycana qarşı tətbiqi qərəzlidir. Əgər bu maddə tətbiq olunarsa biz Avropa Şurasında qalıb-qalmamaq məsələsini müzakirə edəcəyik", - O.Əsədov bildirib.

Spikeri hiddətləndirən odur ki, Avropa Şurası Parlament Assambleyasının (AŞPA) Bürosu Avropa İnsan Hüquqları Məhkəməsini Azərbaycanın REAL Hərəkatının sədri İlqar Məmmədovla bağlı qərarı yerinə yetirib-yetirməməsi haqda rəy verməyə çağırıb.

Bundan əlavə, Büro Azərbaycana qarşı 46-cı maddənin mümkün qədər tez tətbiq edilməsinə çağırıb.

46-cı maddəyə görə, əgər AŞ Nazirlər Komitəsi hesab edir ki, ölkə iş üzrə qərarın icrasından yekun olaraq imtina edir və məhkəmə bu pozuntunu təsdiqləyirsə, iş tədbir görülməsi üçün Nazirlər Komitəsinə göndərilir. Və bu tədbirlərdən biri ölkənin Avropa Şurasından çıxarılması ola bilər.

Hələ 2014-cü ilin mayında AİHM qərara alıb ki, İ.Məmmədovun həbsi və həbsdə saxlanması ilə Avropa İnsan Hüquqları Konvensiyasının bir çox maddəsi pozulub və onun azadlığa buraxılmasını tələb edib.

Azərbaycanın 2001-ci ildən üzv olduğu Avropa Şurasından çıxması realdırmı? Bunun ölkə üçün hansı nəticələri olar?

Politoloq Hikmət Hacızadə hesab edir ki, hakimiyyət hadisələrin inkişafı baxımından hərəkət edəcək. "Onlar Avropa Şurasının atacağı addımları gözləyəcəklər ki, bu addımlar da Azərbaycanı təşkilatdan çıxmaq təhlükəsi ilə üz-üzrə qoya bilər. Ancaq bu, uzun prosesdir və qərar qəbuluna doğru irəlilədikcə Oqtay Əsədovun təklifi daha da aktual olacaq. Təşkilatdan xaric olunmağa az qalmış müddətdə hakimiyyət deyəcək ki, Avropa Şurası onlara lazım deyil və özləri nümayişkaranə şəkildə təşkilatı tərk edəcəklər", - politoloq hesab edir.

Onun fikrincə, ölkənin AŞ-dan çıxmasının qlobal miqyasda mənfi nəticələri olacaq. "Biz informasiya, inkişaf, elm, mədəniyyəti üzümüzə qapadacağıq və tədricən tənəzzül edəcəyik. Bundan əlavə, bu, Qarabağ məsələsinə təsir edəcək. Avropa birliyi aktiv olmasa da münaqişənin sülh yolu ilə həlli nəzərə çarparsa bu, bizim üçün çox faydalı olardı, dinc quruculuqla bağlı müdrik, demokratik planlar irəli sürə bilərdi.

Əgər indi Azərbaycan Qarabağın sülh yolu ilə qaytarılması məsələsini qaldırarsa Avropa Şurası bizi dəstəkləməyə meyl etməz, çünki bildirər ki, Azərbaycan demokratik ölkə deyil, bu səbəbdən də dinc ölkə deyil, Qarabağ elə kənarda qalsa yaxşıdır. Azərbaycanın Avropa Şurasından çıxması məsələnin bizim xeyrimizə ədalətli həllinə böyük təhlükə yaradır", - politoloq vurğulayıb.

H.Hacızadə qeyd edib ki, əgər Azərbaycan Avropa Şurasının tərkibində qalmaq istəyirsə bu və digər şəkildə təşkilatın şərtlərini yerinə yetirəcək.

"Hakimiyyət çalışacaq ki, simasını itirmədən AŞ-nin bəzi tələblərini yerinə yerinə yetirsin. Avropalılar adətən belə hallarda sıxışdırmırlar. Real irəliləyiş gördükləri zaman bu prosesi ölkənin qorxusu kimi təqdim etməyəcəklər. Əgər Azərbaycan hakimiyyəti istəsə məsələ ölü nöqtədən müsbət tərəfə irəliləyə bilər", - H.Hacızadə bildirib.

"Atlas" Strateji Araşdırmalar Mərkəzinin rəhbəri Elxan Şahinoğlunun fikrincə, Azərbaycan hakimiyyəti böyük riskə gedəcək və ölkənin AŞ-dan çıxması barədə qərar qəbul edəcək.

"Mən Avropa Şurasında Azərbaycan nümayəndə heyətinin rəhbəri Səməd Seyidovun çıxışını diqqətlə oxudum və belə nəticəyə gəldim ki, S.Seyidov sərt tənqidə baxmayaraq, özü də ölkənin AŞ-dan çıxmasına tərəfdar deyil. Avropa Şurası yetərincə ciddi təşkilatdır və bizin çıxmamız Avropa ilə münasibətlərə mənfi təsir göstərəcək. Bundan əlavə, biz Avropa Şurasından çıxsaq orada Ermənistan qalacaq və ölkənin nümayəndə heyəti Azərbaycana qarşı qətnamə qəbul edəcək. Bu, bizim maraqlara uyğun deyil. Azərbaycanın təşkilatda iştirakı Ermənistana qarşı bir neçə qətnamənin qəbulunu təmin edib. Bu iki faktoru nəzərə alaraq, düşünmürəm ki, Azərbaycan öz istəyilə Avropa Şurasının tərkibindən çıxmaq qərarı qəbul etsin. Eyni zamanda inanmıram ki, AŞ ölkənin xaric edilməsi məsələsini səsverməyə çıxarsın və belə qərar qəbul etsin", - E.Şahinoğlu bildirib.

Politoloq qeyd edib ki, Azərbaycana qarşı əsas tələb bir neçə siyasi məhbusun azad edilməsidir.

"Bu, əsasən İlqar Məmmədova aiddir. Hesab edirəm ki, Azərbaycan hakimiyyəti təzyiq altında onu azad etməyəcək. Əgər İ.Məmmədovu indi azad etsələr belə görünəcək ki, bu qərar təzyiq altında qəbul edilib, ölkə hakimiyyəti isə təzyiq sevmir. Ancaq Avropa Şurasına müəyyən şifahi vədlər verilə bilər. Hər ilin sonunda adətən əfv fərmanı imzalanır. Mənə belə gəlir ki, bir neçə nəfərin, o cümlədən İlqar Məmmədovun əfvi barədə vəd verilərsə bu sifahi sazişin əsasında Avropa Şurasının təzyiqlərini aradan qaldırmaq olar", - E.Şahinoğlu vurğulayıb.-0-