Ekspertlər Azərbaycan və Ermənistanın birbaşa danışıqlara başlaması təklifini dəstəkləyir

Bakı/01.07.21/Turan: Azərbaycan Ermənistana ikitərəfli danışıqları təklif edir.

Bu fikirləri iyunun 30-da Azərbaycan xarici işlər naziri Ceyhun Bayramov Qara Dəniz İqtisadi Əməkdaşlıq Təşkilatına üzv dövlətlərin Xarici İşlər Nazirləri Şurasının 43-cü iclasında səsləndirib.

O, bildirib ki, Azərbaycan Ermənistana sərhədin delimitasiyası və demarkasiyası ilə bağlı ikitərəfli müzakirələrə başlamağı təklif edir.

“Azərbaycan Ermənistanın müsbət reaksiyasını gözləyir. Ermənistanda revanşist ritorika ilə müşayiət olunan Azərbaycana qarşı nifrət ciddi narahatlıq doğurur.”

Bundan əvvəl iki ölkə arasında istənilən danışıqlar üçüncü tərəfin vasitəsilə həyata keçirilib.

Hazırda Azərbaycanla Ermənistanın ikitərəfli danışıqlar mümkündürmü?

Milli Məclisin deputatı Aydın Mirzəzadə Turana bildirib ki, Azərbaycanla Ermənistan arasında hər hansı birbaşa təmas yox idi və yoxdur.

“Ötən il vətən müharibəsindən sonra Rusiya iştirakı ilə iki dəfə üçtərəfli sazişlər bağlandı və bütün məsələlər üçtərəfli komissiyada həll olunur.”

Lakin deputatın fikrincə, artıq Ermənistanla Azərbaycan arasında birbaşa təmasın qurulma zamanı gəlib çatıb.

“Azərbaycan öz ərazi bütövlüyünü təmin edib, Azərbaycan Ermənistanla sərhədin demarkasiyası məsələsini gündəmə gətirib, heç bir şərt qoymadan Ermənistanı bu məsələni həll etməyə çağırır. Belə baxanda hətta üçtərəfli komissiya da belə istər-istəməz tərəflər bir-birilə bu məsələni müzakirə etməlidirlər.”

Mirzəzadə hesab edir ki, bu baxımından xarici işlər naziri Ceyhun Bayramovun təklifi günün tələblərinə cavab verir.

“Tərəflər bu gün demarkasiya məsələsini, Zəngəzur dəhlizinin açılması məsələsini həll edə bilər, sonra isə nə zamansa Azərbaycanla Ermənistan arasında normal ikitərəfli qonşuluq münasibətləri qurulmalıdır.”

“Atlas” Araşdırmalar Mərkəzinin rəhbəri Elxan Şahinoğlu AzadlıqRadiosuna Ceyhun Bayramovun təklifini müsbət qiymətləndirdiyini bildirib.

Ekspert qeyd edib ki, Azərbaycan müharibədə qələbə çaldı, torpaqlarını işğaldan azad etdi.

“Ona görə də Ermənistanla ciddi problemimiz qalmayıb və biz ikitərəfli danışıqlara gedə bilərik.”

Politoloqun fikrincə bunun əsas səbəbi odur ki, Ermənistan prosesə üçüncü tərəfi qatmaq istəyir.

“İstər Rusiya, istər ABŞ, ya da Fransa olsun, Ermənistan onları prosesə qatmaq istəyir. Lakin sərhəd məsələsi iki ölkə arasında həll olunan məsələdir. Biz istəmirik üçüncü dövlət bu məsələyə qarışsın. Nə qədər çox Rusiya kimi dövlətlər məsələyə qarışmasa, bu, həm bizium, həm də Ermənistan üçün daha faydalı olar.”

Şahinoğlu deyir ki, belə nümunə artıq bir dəfə olub.

“İlk dəfə Rusiyanın vasitəçiliyi olmadan Gürcüstan, ABŞ və Avropa Birliyinin vasitəçiliyi ilə biz erməniləri mina xəritələrinə dəyişə bildik. Bu prosesi davam etdirmək lazımdır. Düzdür, Ermənistan Rusiyadan asılıdır. Amma, Nikol Paşinyanın özü də bəzən Rusiyanı kənarda qoyan ssenarilərdə iştirak edə bilir.”

Politoloq ehtimal edir ki, Rusiyada müəyyən qüvvələr Azərbaycanla Ermənistan arasında ikitərəfli danışıqlar prosesinə mane olmağa çalışa bilər.

“Lakin Gürcüstan vasitəsilə erməni hərbçilərinin xəritələrə dəyişilməsi və Rusiyanın buna mane olmaması göstərdi ki, gələcəkdə bu istiqamətdə addımlar atıla bilər. Ona görə də Ceyhun Bayramovun bu təklifi yəqin prezidentlə də razılaşdırılıb və müsbətdir. Görək Ermənistan buna necə münasibət bildirəcək,” o qeyd edib.-0-