Elmar Brok: Ermənistan və Azərbaycan Moskva siyasətinin girovlarıdır

Moskva Qarabağ münaqişəsindən Ermənistana və Azərbaycana təzyiq aləti kimi istifadə edir və onun tənzimlənməsində maraqlı deyil. Bu fikri ötən şənbə Avropa Parlamentinin xaricə əlaqələr komitəsinin rəhbəri Elmar Brok “Şərq tərəfdaşlığı” ölkələrindən bir qrup jurnalistlə görüşdə bildirib.

“Moskva dondurulmuş münaqişələrdən bu və ya digər regionda öz maraqlarını həyata keçirmək üçün istifadə edir. Rusiya üçün münaqişələrin həlli deyil, öz maraqlarının həyata keçirilməsi prioritetdir, Dnestryanı və Dağlıq Qarabağda olduğu kimi”, deyə o bildirib.

Buna ən yeni nümunə Yerevanın faktiki olaraq Rusiya ilə Gömrük İttifaqına daxil olmağa məcbur edilməsidir.

“Biz ölkənin seçiminə hörmət edirik, amma söhbət azad seçkidən gedirsə. Lakin Ermənistanın qərarını Yerevan qarşısında qoyulmuş şərt dikdtə edib, daha dəqiq isə: Avropa İttifaqı ilə Assosiativ Saziş imzalandığı təqdirdə Qarabağı itirəcəksiniz”, deyə Brok bildirib.

O, qonşularına və tərəfdaşlarına qarşı tarixən belə siyasət yürüdən Kremlin bu siyasətindən təəssüfünü bildirib. “Rusiya Angela Merkelə Avropanın mərkəzində gərginliyi aradan qaldırmaq üçün Dnestryanı münaqişəsini həll edəcəyinə söz verib, amma heç nə etməyib”, deyən Brok vurğulayıb ki, Moskva Qarabağ münaqişəsinin nizamlanmasına da eyni cür yanaşır.

Turan-ın belə bir vəziyyətdə Qarabağ nizamlanmasının perspektivlərini necə qiymətləndirdiyi barədə sualına cavabda Brok bildirib ki, Ermənistanın və Azərbaycanın bir-birinə güzəştə getməkdən başqa yolu yoxdur.

“Bu çıxılmaz vəziyyətdən qurtulmaq üçün hər iki tərəf birgə və eynizamanlı addımlar atmalıdırlar. Azərbaycanın vəziyyəti daha yaxşıdır, onun ciddi resursları var. Lakin münaqişə bərpa olunarsa, hər iki tərəf uduzmuş vəziyyətdə olacaq. Buna görə tərəflər yaxınlaşma və barışıq yolları axtarmalıdır”, deyə Elmar Brok qeyd edib. -02В-