Ermənistan Naxçıvan tərəfdən təhlükədən narahatdır

Bakı/14.03.18/Turan: Naxçıvanda keçirilən hərbi təlimlər Ermənistanda ciddi narahatlıq doğurmaya bilməz. Bu barədə martın 13-də Yerevanda keçirilən mətbuat konfransında Ermənistan Demokrat Partiyasının lideri Aram Sarkisyan bildirib.

Son dövrlər Naxçıvanda Azərbaycan və Türkiyənin 6-7 böyük birgə təlimi keçirilib.

Bu əraziyə çox sayda türk qoşunları və texnikası cəlb edilib. Türkiyə və Azərbaycan arasında Dağlıq Qarabağda müharibə olacağı təqdirdə qarşılıqlı fəaliyyət haqqında gizli razılaşma olduğu məlumdur. Faktiki olaraq, bu gün ölkəmiz ciddi təhlükə qarşısındadır", deyə Sarkisyan bildirib.

O, rəsmi Yerevanı "yaranmış təhlükə haqqında" beynəlxalq ictimaiyyəti, o cümlədən ATƏT və KTMT-ni məlumatlandırmağa çağırıb.

Sarkisyan qeyd edib ki, Ermənistanın müdafiə gücü kifayət qədər çoxdur, amma "cəmiyyətin qütbləşməsi Ermənistanın özünü müdafiə edə bilməyəcək qədər zəifləməsinə gətirib çıxara bilər".

Öz növbəsində, Ermənistanın keçmiş müdafiə naziri Vaqarşak Arutyunyan Yerevanda başqa bir mətbuat konfransında bildirib ki, Ermənistan Qarabağ müharibəsində Rusiya ilə ittifaq sayəsində qələbə qazanıb, buna görə Rusiya qoşunlarının Ermənistandan çıxarılması çağırışları yolverilməzdir.

Naxçıvan tərəfdən təhlükə haqqında sualı cavablandıran Arutyunyan etiraf edib ki, Azərbaycanın bu ərazisindən Yerevana orta məsafəli "Toçka - U" və ya "Smerç" silahları ilə zərbə endirmək olar.

İkincisi, Naxçıvandan Syunikə (Zəngəzur) keçmək və Azərbaycanın bütün qalan əraziləri ilə birbaşa əlaqə qurmaq olar.

Naxçıvanda cəmlənmiş hərbi texnika bu ərazidən hərbi baza kimi istifadə etməyə imkan verir və bütün bu hallar "Ermənistan tərəfi narahat etməyə bilməz", deyə o qeyd edib. -02D-