Ermənistan Rusiya ilə Gömrük İttifaqına daxil olmaq qərarına gəlib

Moskva/04.09.13/Turan-Armİnfo:  Sentyabrın 3-də axşam Rusiya və Ermənistan prezidentlərinin görüşündən sonra iki ölkə lideri birgə bəyanat imzalayıblar və mətbuat konfransı keçiriblər. 

Sarkisyan bildirib ki, danışıqlar konstruktiv keçib. Siyasi, ticari-iqtisadi, energetika, hərbi-texniki, humanitar və digər sahələrdə qarşılılıqlı fəaliyyət məsələləri müzakirə olunub. 

“Dağlıq Qarabağ məsələsi də müzakirə olunub. Bununla əlaqədar mən Ermənistanın münaqişənin yalnız hüquqi bərabərlik, xalqların öz müqəddəratını təyinetmə hüququ, güc tətbiq etməmə və bununla bağlı hədənin olmaması, dövlətlərin ərazi bütövlüyü prinsiplərinə əsaslanan dinc yolla həllinə hazır olduğunu bir daha təsdiq etdim. Həmçinin Rusiya, ABŞ və Fransa prezidentlərinin birgə bəyanatlarında əksini tapmış nizamlanma elementləri və prinsipləri əsasında böhrandan çıxış yollarının axtarılmasına  hazır olduğumuzu bəyan  etdik”, - Sarkisyan deyib 

Onun sözlərinə görə, danışıqların əsas mövzularından biri Ermənistanda infrastruktur islahatlarının təminatının vacibliyi, Rusiyanın böyük sayda müəssisə ilə təmsil olunduğu Ermənistan iqtisadiyyatında modernləşdirmə və diversifikasiya məsələləri olub.

“Biz həmçinin Avrasiyaya inteqrasiya məsələlərinə dair mübadilə apardıq və mən Ermənistanın Gömrük İttifaqına daxil olmaq və Avrasiya İqtisadi İttifaqının formalaşması prosesinə qoşulmaq istədiyini bildirdim”, - Sarkisyan vurğulayıb.

20 il əvvəl Ermənistan Rusiya ilə tərəfdaşlıq şəraitində kollektiv təhlükəsizlik haqqında müqavilə formatında özünün hərbi təhlükəsizlik sistemini qurub. 10 il ərzində bu sistem özünün əlverişli və effektiv olduğunu sübut edib. “Hazırda bizim KTMT üzrə tərəfdaşlarımız yeni iqtisadi əməkdaşlıq platformasını hazırlayırlar. Mən dəfələrlə demişəm ki, bir hərbi hərbi təhlükəsizlik sistemində olmaqla müvafiq geo-iqtisadi məkandan təcrid olunmaq mümkün deyil və qeyri-effektivdir.  Bu, rasional qərardır və bu qərar Ermənistanın milli maraqlarından irəli gəlir. Bu qərar bizim Avropa strukturları ilə dialoqdan imtina etməyimiz demək deyil”, - Ermənistan prezidenti bildirib.

Öz növbəsində Rusiya  prezidenti qeyd edib ki, Yerevanın Avrasiya inteqrasiya strukturlarına qoşulması qarşılıqlı iqtisadi əməkdaşlığa güclü təkan verəcək. 

“Biz Rusiya-Ermənistan əməkdaşlıq məsələlərini, ilk növbədə iqtisadi əlaqələrin gələcək inkişafını müzakirə etdik”, - RF başçısı vurğulayıb. 

V.Putin qeyd edib ki, Rusiya Ermənistanın aparıcı ticari-iqtisadi partnyorudur: ötən il əmtəə dövriyyəsi 22% artaraq 1,2 milyard dolları ötüb. Rusiya kapital qoyuluşları 3 milyard dolları ötüb. Bu, 1300-ə yaxın Rusiya şirkətinin fəaliyyət göstərdiyi Ermənistan iqtisadiyyatına qoyulan bütün xarici investisiyaların demək olar ki, yarısıdır.

İki ölkə prezidentinin birgə bəyanatında deyilir ki, RF və Ermənistan prezidentləri Dağlıq Qarabağ münaqişəsinin yalnız dinc yolla və ATƏT-in Minsk Qrupu həmsədrləri ilə iş  formatında  hüquqi bərabərlik prinsipləri, xalqların öz müqəddəratını təyinetmə hüququ, güc tətbiq etməmə və bununla bağlı hədənin olmaması, dövlətlərin ərazi bütövlüyü prinsipləri əsasında həllinə sadiq olduqlarını bəyan ediblər.

Regional sabitliyin və təhlükəsizliyin təminatı məqsədilə hərbi-siyasi və hərbi-texniki sahələrdə gələcək əməkdaşlığın möhkəmləndirilməsinə hazırlıq ifadə olunub.

İki ölkə prezidenti ayrı bəyanatlarla Rusiya və Ermənistanın Avrasiya məkanına iqtisadi inteqrasiya prosesini inkişaf etdirməkdə əzmli olduğunu təsdiqləyib.

İki ölkənin Ermənistan iqtisadiyyatının modernləşdirilməsinə  və diversifikasiyasına, ölkənin enerji təhlükəsizliyinin möhkəmləndirilməsinə yönələn ikitərəfli layihələrin reallaşmasına hazır olduğu bəyan edilib. 

2020-ci ilədək olan dövrdə Ermənistanla Rusiya arasında uzunmüddətli iqtisadi əməkdaşlıq proqramının tam həcmdə ardıcıl reallaşmasının vacibliyi vurğulanıb. Bununla əlaqədar iki ölkənin uyğun qurumlarına müvafiq tapşırıqlar  verilib.-02D-