Ermənistanda seçkilərin nəticələri Qarabağ nizamlanmasında vəziyyəti gərginləşdirəcək

Ermənistanda parlament seçkilərinə yekun vurulub. İlkin nəticələrə görə, Ermənistanın hakim Respublika Partiyası qalib olur. Ölkə prezidenti və baş naziri bu partiyanı dəstəkləyir. O, səslərin, demək olar ki, yarısını - 49,15%-ni yığıb. İkinci yerdə 27,67%-lə "Tsarukyan bloku", üçüncü yerdə 7,78%-lə "Yelk" bloku gəlir. MDB və ATƏT müşahidəçiləri səsvermənin şəffaf və demokratik keçirildiyini etiraf ediblər. Bu seçkilərdən sonra ölkə idarəetmə sistemini dəyişdirir. Ermənistan prezident respublikasından artıq deputatların hökuməti formalaşdırdığı və baş naziri təyin etdiyi parlament respublikasına çevrilir. Amma bunun üçün onların əksəriyyətə ehtiyacı var. Seçkilərin yekunları Ermənistan-Azərbaycan münasibətlərinə necə təsir edəcək və yeni parlament Qarabağ məsələsində hansı mövqeyi tutacaq?

"Səslərin əksəriyyətini hakim Respublika Partiyasının qazandığını nəzərə alsaq, indi Sarkisyanın baş nazir olmaq üçün hər cür şansı var", bu barədə Turan İA-ya politoloq Qabil Hüseynov bildirib. "Parlamentin rəhbəri isə yeni idarəetmə formasında ölkənin icra hakimiyyətinin başçısı olur, yəni prezidentin bütün əvvəlki səlahiyyətlərini öz əlində cəmləşdirəcək. Təəssüf ki, Sarkisyan indiyədək heç bir nəticə verməyən və hətta çıxılmaz vəziyyətə gətirib çıxaran amansız danışıqların tərəfdarıdır. İndi danışıqlar prosesində fasilə yaranıb və Sarkisyan baş nazir olsa, fasilə uzunmüddətli ola bilər. Danışıqlar yalnız müxalifətin təzyiqi ilə canlana bilər. Amma onlar kifayət qədər mürəkkəb olacaq, çünki tərəflərin mövqeləri əsaslı şəkildə fərqlənir, xüsusən Dağlıq Qarabağın statusu məsələsində. Buna görə danışıqların uğurla yekunlaşması şansı minimumdur və müharibənin bərpası ehtimalı artır", deyə Q.Hüseynov qeyd edib.

"Ermənistan parlamentinə real müxalifət düşməyib", deyə "Atlas" Strateji Araşdırmalar Mərkəzinin direktoru Elxan Şahinoğlu Turan İnformasiya Agentliyinə bildirib. "Birinin lideri sabiq prezident Ter-Petrosyan olan iki blok parlamentə keçməyib. Bu bloklar hakim rejimi kəskin tənqid edir və mitinqlərdə kifayət qədər çox sayda iştirakçı yığırdı. Parlamentə keçən qüvvələr faktiki olaraq Sarkisyanın daxili və xarici siyasətini dəstəkləyir. Sarkisyan faktiki olaraq istədiyinə nail olub - Konstitusiyanı dəyişdirib, hakimiyyəti parlamentə və hökumətə verib və onun üzərində nəzarəti əlində saxlayıb.

Ermənistanın Qarabağ üzrə mövqeyi dəyişməyəcək - o, öz işğalçı siyasətini davam etdirəcək. Sarkisyanın qüvvələri uduzsaydı müsbət irəliləyişlər gözləmək olardı. Çünki müxalifət seçkilərə qədər Azərbaycan və Türkiyə ilə münasibətləri tənzimləmək niyyətini bəyan edirdi. Amma bu qüvvələr kənarda qaldı və Qarabağ məsələsində müsbət irəliləyişlər gözləməyə dəyməz. Əksinə, vəziyyət gərginləşə bilər. Əvvəllər Ermənistan bizim ərazilərimizi atəşə tuturdusa, indi o, ərazilərimizə iriçaplı silahlardan atəş açır. Buna görə lokal qarşıdurmalar qaçılmazdır", deyə E.Şahinoğlu qeyd edib. -0-