Əvvəlcə Yerevan AİHM-nin "Çıraqovlar və digərləri Ermənistana qarşı" qərarını yerinə yetirməlidir - L.Abdullayeva

Bakı/27.05.20/Turan: "AİHM-in 2015-ci il Çıqarovların işi üzrə qərarının icrası təmin olunmayanadək, rəsmi Yerevanın Azərbaycandan Avropa Məhkəməsi ilə bağlı nə isə tələblər irəli sürməsinə heç bir mənəvi haqqı yoxdur". Bu sözləri Azərbaycan XİN-in rəsmi nümayəndəsi Leyla Abdullayeva 2004-cü ildə Azərbaycan zabiti Ramil Səfərovun Budapeştdə NATO kurslarında erməni hərbiçini öldürməsi haqqında işlə bağlı "Makuçyan və Minasyan Azərbaycana və Macarıstana qarşı" qərarına münasibət bildirərkən deyilb.

Ermənistanın Azərbaycan əleyhinə qarayaxma kampaniyasına Avropa Məhkəməsini də alət etmək niyyəti və bu qurumu siyasiləşdirmək və təbliğat kampaniyasına cəlb etmək cəhdləri rədd olunmalıdır, Abdullayeva belə hesab edir.

"Məhkəmə faktiki olaraq Ermənistanın əsas niyyətini təmin etməyib. Məhkəmə qərarı əsas çəkişmə obyekti olan əfv fərmanının ləğvini və ya əlaqədar şəxs üzrə işin yenidən açılmasını tələb etmir. Digər tərəfdən, yaşamaq hüququnun maddi pozuntusu ilə bağlı iddia da rədd edilib", deyə Azərbaycan XİN-in rəsmi nümayəndəsi bildirib.

O, həmçinin Avropa Məhkəməsinin qərarda Avropa Konvensiyasının 2-ci maddəsinin (yaşamaq hüququ) maddi aspektinin Azərbaycan Hökuməti tərəfindən pozulmadığını müəyyən etməsinə diqqət çəkib. Yəni, Avropa Məhkəməsinin gəldiyi nəticəyə görə, Ramil Səfərov əməllərin törədilməsi zamanı fərdi qaydada çıxış edib və Azərbaycan Hökumətini təmsil etməyib. Beləliklə də, Azərbaycan Hökuməti bu əməllərə görə beynəlxalq-hüquqi məsuliyyət daşıya bilməz.

Eyni zamanda, Abdullayevanın fikrincə, qərarda Azərbaycan Silahlı qüvvələrinin zabiti Ramil Səfərovun Azərbaycanın 1993-cü ilin avqustunda Ermənistan silahlı qüvvələri tərəfindən işğal olunmuş Cəbrayıl rayonunda anadan olduğu, yaxın qohumlarını müharibədə itirdiyi, hələ yeniyetmə ikən məcburi köçkün həyatının ağrı və acılarını yaşadığı məhkəmə işində nəzərə alınmalı idi.

Səfərovun təhvil verilməsindən sonra dərhal azad edilməsinə gəlincə, əvf təcrübəsi dünyada yayılıb və Azərbaycan Respublikasının Konstitusiyasına əsasən, dövlət başçısının buna hüququ var.

Abdullayeva qeyd edib ki, xalqlar arasında düşmənçiliyə son qoymağın yeganə yolu münaqişənin nəticələrini aradan qaldırmaq, yəni işğalçı qüvvələri Azərbaycanın beynəlxalq səviyyədə tanınmış torpaqlarından çıxarmaq və bu ərazilərdən köçürülmüş yüz minlərlə insanın əsas hüquqlarını təmin etməkdir. Ramil Səfərov da bu siyasətin qurbanı olub, deyə o əlavə edib.

"Ermənistan həqiqətən insan hüquqları və azadlıqlarına sözdə bəyan etdiyi qədər əhəmiyyət yetirir və Avropa Məhkəməsinə hörmət edirsə, o zaman bu ölkə 30 ildən bəri davam edən, Azərbaycan torpaqlarının işğalına və bir milyondan artıq soydaşımızın hüquqlarının pozuntusuna dərhal son qoymalıdır. Eyni zamanda, AİHM-in 2015-ci il Çıqarovların işi üzrə qərarının icrası təmin olunmayanadək, rəsmi Yerevanın Azərbaycandan Avropa Məhkəməsi ilə bağlı nə isə tələblər irəli sürməsinə heç bir mənəvi haqqı yoxdur", deyə Abdullayeva bildirib.

* 2015-ci ildə AİHM Laçın rayonundan 6 məcburi köçkünün ərizəsi əsasında "Çıraqov və digərləri Ermənistana qarşı" işi üzrə qərar qəbul edib. AİHM ərizəçilərin mülkiyyət hüquqlarının, şəxsi həyata və ailə həyatına hörmət hüququnun, səmərəli hüquqi müdafiə hüququnun pozulduğunu müəyyən edib. Strasburq məhkəməsi buna görə Ermənistanın məsuliyyət daşıdığını bildirib və ölkənin üstünə qurbanlara təzminat ödəmək öhdəliyi qoyub. -06D-