Media-icmal 27.05.20

Cümhuriyyətin süqutunun səbəbləri, daxili turizmin inkişaf ehitmalları, ölkədə qaz sayğaclarının dəyişdirilməsinə başlanması və s. məsələlər medianın aparıcı mövzuları sırasındadır...

“Müsavat.com”da “100 il əvvəl aldananların aqibətindən dərs çıxarırıqmı?” sərlövhəli məqalədə bolşevik Rusiyasının köməyi ilə Azərbaycanda milli dövləti yıxan yerli bolşeviklərin taleyi barədə danışılır.

Müəllif mövzunun aktuallığına səbəb kimi 28 MAY Respublika Günü ərəfəsini göstərir.

Müəllif deyir ki, Azərbaycanın milli düşüncəli adamları 1918-ci il mayın 28-də müsətil Azərbaycanı elan etdilər, amma 1920-ci ilin aprelində isə bolşevik Rusiyası yerli bolşeviklərin də köməyilə müstəqil dövləti yıxaraq ölkəni müstəmləkəyə çevirdi.

“102 il əvvəl Şərqdə ilk demokratik dövləti biz qurmuşuq” sözünü heç kəs qəribçiliyə salmasın, bu, hamımızın, eləcə də gələcək nəsillərin qürur duya biləcəyi bir nailiyyətdir.102 il əvvəl dünyada demokratik quruluşa sahib dövlətlərin sayı 20 civarındaydı və onlardan biri məhz Azərbaycan idi”, deyə müəllif milli dövlət qurulmasına dəyər verir.

Milli dövlətin süqutuna səbəb kimi isə müəllif ilk növbədə xarici təcavüzü, milli xəyanətkarlığı, qonşu düşmənçiliyini və cəmiyyətin müqavimətə hazır olmamasını göstərir: “1920-ci ildə dövlətimizin süqut etməsində bolşevik ruslarla, daşnak ermənilərlə yanaşı, bolşevik azərbaycanlıların da böyük rolu olub və bunu heç kəs dana bilməz… Tariximizdə bundan da böyük utancverici fakt varmı?

Müəllif deyir ki, Azərbaycanı ələ keçirən rus-erməni bolşeviklər yerli kommunistləri adam saymayıblar, onlara güvənməyiblər, eləcə, əl altında işlədiblər”.

Müəllif deyir ki, müstəiql Azərbaycan dövlətini yıxmaqda fəal yer alan yerli bolşeviklərin çoxu elə qurduqları siyasi rejimin əmrilə güllələniblər.

Onun fikirncə, tarix təkcə keçmiş deyil, o, həm də gələcəyə işıq salır.

“Yenisabah.az”da dərc olunan “Bakıda bağ evlərinin icarə qiymətləri artacaq – proqnoz” sərlövhəli məqalədə müəllif bəhs edilən mövzu ilə bağlı “Əmlak” Ekspert Mərkəzinin rəhbəri Ramil Osmanlı ilə söhbətləşir.

Onun sözlərinə görə, insanlar turizm məqsədilə xarici ölkələrə gedə bilmədikləri üçün daha çox daxili turizmdən faydalanacaqlar: “Hazırda bütün dünyada olduğu kimi, Azərbaycanda turizmlə bağlı problemlər var, ölkəyə turist axını dayanıb. Eyni zamanda, ölkədən xaricə də yerli turistlərin gedişinə hələlik məhdudiyyətlər qoyulub. Belə olan təqdirdə daxili turizmdə inkişaf müşahidə olunacaq. Bunun da əsas istiqamətlərindən biri Bakı və Abşeron rayonu ərazisindəki bağ evlərinin icarə qiymətləridir. Adətən insanlar belə dövrlərdə dəniz kənarına və ya turizm potensialı olan bölgələrə üz tuturlar. Bu halda, təbii ki, icarə qiymətlərində müəyyən artım olacaq”.

R.Osmanlı əlavə edib ki, son üç ay ərzində daşınmaz əmlak bazarında əməliyyatların dayanması prosesi gedib, ancaq, buna baxmayaraq, qiymətlərdə kəskin azalma müşahidə olunmur.

Mərkəz rəhbəri hesab edir ki, makroiqtisadi sabitliyin pozulması, bütün istiqamətlər üzrə iqtisadi aktivliyin azalması əmlak bazarına da təsirsiz ötüşməyib. Belə ki, bazarda yalnız təklif qiymətləri müşahidə edilir.

Onun sözlərinə görə, obyektlərin üzərində əqd bağlanmadığı üçün faiz artımı və ya azalmasını tam müşahidə  etmək olmur: “Hesab edirəm ki, qarşıdakı aylarda əqdlər qismən də olsa bərpa olunacaq və əməliyyatlar həyata keçiriləcək.

Bundan sonra artıq biz qiymət dinamikasının hansı istiqamət və faizlər üzrə dəyişdiyini təyin edə biləcəyik”, deyə R.Osmanlı vurğulayır.

“Oxu.az”da yer alan “Azəriqaz”dan sayğaclarla bağlı mühüm açıqlama” sərlövhəli məqalədə isə müəllif ölkədə bu ildən etibarən bütün fərdi yaşayış evlərində (yeni inşa olunan çoxmərtəbəli binalar istisna olmaqla) qaz sayğaclarının dəyişdirilməsi məsələsini gündəmə gətirir.

Müəllifin sözlərinə görə, dövri yoxlama müddəti bitmiş sayğaclar mexaniki sayğaclarla əvəzlənir, bu barədə Dövlət Neft Şirkətinin (SOCAR) “Azəriqaz” İstehsalat Birliyinin açıqlamasında bildirilir.

Açıqlamaya görə isə, “Azəriqaz” bu addımına əsas kimi vəsaitlərinə qənaətlə yanaşmaq, gəlirlərini daha səmərəli istifadə etmək istəyini göstərir: “Bir smart-kart tipli sayğacın qiymətinə üç mexaniki sayğac almaq mümkündür. Hazırda istifadə edilən Itron Gallus Pay.G4 NGPP (smart) sayğaclarının komplektinin (sayğac, qutu, əymə, kran və s.) qiyməti 220-240 manat, G-4T (mexaniki) sayğaclarının komplektinin (sayğac, qutu, əymə, kran və s.) qiyməti isə 70-90 manat arasında dəyişir”.

Daha sonra vurğulanır ki, mexaniki sayğaclar dəyər baxımından daha sərfəlidir. Açıqlamada bəzən abonentlərin mexaniki sayğacların köhnə olduğu fikrinə cavab olaraq bu sayğacların indi də alman şirkəti tərəfindən istehsal olunması göstərilir.Üstəlik, əlavə edilir ki, smart-kart tipli sayğaclardan fərqli olaraq, mexaniki tipli sayğaclarda daim qaz axını mövcuddur, onlayn ödəniş imkanlarından istifadə etmək olar.

Müəllif deyir ki, istifadə olunan qaza görə ödəniş barədə bildiriş aldıqdan sonra həmin vəsaiti ödəməyə 30 gün vaxt verilir və bu müddət ərzində bu məbləğ abonent üçün borc sayılmır.