GRETA Azərbaycanı traffikinqə qarşı daha effektiv mübarizəyə çağırıb

Bakı/06.06.23/Turan: Avropa Şurasının İnsan alverinə qarşı mübarizə orqanı (GRETA) Azərbaycanı insan alveri qurbanlarını daha yaxşı müəyyən etməyə və onların kompensasiya və digər hüquqi müdafiə vasitələrinə çıxış imkanlarını yaxşılaşdırmağa çağırır.

GRETA-nın bu gün nəşr olunan yeni hesabatında 2018-ci ilin noyabrında Azərbaycana dair ikinci qiymətləndirmə hesabatının dərcindən sonrakı vəziyyət qiymətləndirilib.

Hesabata əsasən bəzi sahələrdə (insan alverinə qarşı mübarizə üçün qanunvericilik, institusional və siyasi bazanın inkişafı, məlumatlılığın artırılması və müvafiq mütəxəssislərin hazırlanması) irəliləyiş əldə olunub.

Azərbaycan İnsan Alveri Qurbanlarına Yardım Mərkəzinin kadr və maliyyə resurslarını gücləndirib. GRETA insan alverinə dair işlər üzrə çıxarılan  hökmlərin sayının artmasını da alqışlayır.

Bununla belə, GRETA Azərbaycan hakimiyyətini qurbanların hüquqi yardım və kompensasiyaya çıxışını yaxşılaşdırmaq üçün addımlar atmağa çağırır. Bundan əlavə, insan alveri qurbanlarının əmək bazarına çıxışını və onların sosial-iqtisadi inteqrasiyasını genişləndirmək üçün addımlar atılmalıdır.

GRETA həmçinin Azərbaycanda qanunsuz miqrantlar və sığınacaq istəyənlər arasında traffikinq qurbanlarının identifikasiyası üzrə fəal səylərin olmamasını qeyd edir və hakimiyyəti qurbanların müəyyənləşdirilməsi üzrə səyləri artırmağa çağırır.

Hakimiyyət yardım tədbirlərinin, o cümlədən insan alveri qurbanları üçün dövlət sığınacağında yerləşmənin qurbanların hüquq-mühafizə orqanları ilə əməkdaşlıq etmək istəyindən asılı olmamasını təmin etməlidir. Bundan əlavə, sonrakı qisas və ya günahkarların qorxudulmasının qarşısının alınması üçün qurbanların və insan alveri şahidlərinin daha təsirli qorunması lazımdır.

GRETA Azərbaycan hakimiyyətinə iş yerlərində əməyin təftişini yoxlamaq, qeydiyyata alınmamış şirkətləri əhatə etmək üçün bu qurumun mandatını yenidən nəzərdən keçirmək çağırışını təkrarlayır.

Bundan əlavə, əməyini təftişinin adekvat insan və maliyyə resursları ilə təmin edilməsi təklif olunur. Eyni zamanda, Avropa İnsan Hüquqları Məhkəməsinin 7 oktyabr 2021-ci il tarixli "Zoletiç və digərləri Azərbaycana qarşı" (Bakıda Buta Mərkəzinin və Ekspo- Mərkəzin tikintisində əməyindən istifadə olunan Bosniya və Herseqovina, Şimali Makedoniya və Serbiyadan olan əmək miqrantları qrupu, əməyin istismarından şikayət ediblər - Turan) iş üzrə qərarına istinad edilir.

GRETA hakimiyyəti Konvensiyanın məqsədlərinə nail olmaq üçün vətəndaş cəmiyyətilə strateji tərəfdaşlıq qurmağa, traffikinqlə məşğul olan qeyri-hökumət təşkilatlarının  qeydiyyatını və maliyyələşdirilməsini təmin etməyə çağırır.

Rəsmi statistikaya görə, 2018-2022-ci illərdə traffikinq qurbanlarının sayı 472 nəfər olub ki, bu da əvvəlki hesabat dövrü ilə müqayisədə daha çoxdur.

Qurbanların 94 faizi seksual istismar məqsədilə satılan qadınlar olub. Doqquz uşağın insan alveri qurbanı olduğu müəyyənləşdirilib. Qurbanların böyük əksəriyyəti xaricdə, ilk növbədə qonşu ölkələrdə (Türkiyə, Rusiya Federasiyası, İran) istismar olunan Azərbaycan vətəndaşlarıdır.

GRETA hesab edir ki, Azərbaycanda xarici və daxili insan alveri qurbanlarının müəyyənləşdirilməsi üzrə qabaqlayıcı tədbirlərin olmaması səbəbindən insan alverinin miqyası daha yüksəkdir. 06B