Hüquq müdafiə təşkilatları şəbəkəsi İntiqam Əliyevin müdafiəsinə qalxıb

Beynəlxalq “İnsan Haqları Evi” şəbəkəsinin üzvləri və tərəfdaşları Türkiyə prezidentinə müraciət edərək azərbaycanlı vəkil və hüquq müdafiəçisi İntiqam Əliyevə qarşı bütün ittihamların aradan götürülməsinə, İstanbulda Atatürk hava limanında zərər çəkdiyinə görə ondan üzr istənilməsinə çağırıb.

    Məktubda deyilir ki, 2011-ci il dekabrın 6-da Vilnüsdən Bakıya  gələrkən İ.Əliyev İstanbul hava limanında kobud rəftara məruz qalıb. Onun iradlarına cavab olaraq İ.Əliyevi həbs ediblər və o, Bakı reysini buraxıb. Onu Hüseyn Kunt adlı zabit saxlayıb. İ.Əliyev 4 saata yaxın qapalı yerdə saxlanılıb. Bu zaman təhqir və təzyiqlərə məruz qalıb. İ.Əliyev dərhal öz həbsi barədə Human Rights House Foundation (HRHF)  təşkilatına məlumat verib.

    İstanbulda Helsinki Vətəndaş Assambleyası İ.Əliyevə kömək etmək üçün vəkil göndərib. Bir neçə beynəlxalq təşkilat müraciət göndərərək Türkiyə hakimiyyətini onu azad etməyə çağırıb.

    Dekabrın 7-də saat 12.00-da İ.Əliyevə bildirilib ki, saat 20.30-da deportasiya ediləcək. Göstərilən vaxtda Miqrasiya Xidmətinin işçiləri tərəfindən döyülmüş İntiqam Əliyev təyyarəyə əyləşdirilib. Bundan əvvəl isə İ.Əliyev pasportunun qaytarılmasını tələb edərkən Miqrasiya Xidmətinin əməkdaşları onu ayrıca otağa gətirərək döyüblər. Hüquq müdafiəçisinə qarşı zorakılıq törədənlər Miqrasiya Xidmətinin əməkdaşları Sərvət Ərkaraç və Alittin Sarıkaya olub. Zorakılığın törədilməsi yeddi polis işçisinin iştirakı ilə keçirilib. 

    Bununla belə, Türkiyə hakimiyyəti İ.Əliyevə qarşı cinayət işi qaldırıb. Lakin onun özü və Türkiyədəki vəkilləri  bu barədə məlumatlandırılmayıb və 2012-ci il iyulun 6-dək yazılı məlumat almayıb.

    “Biz Türkiyə Respublikasını hüquq müdafiəçisi İntiqam Əliyevə qarşı bütün ittihamları dərhal və şərtsiz aradan qaldırmağa, onunla sərt davranışa, mənəvi və maddi zərərə görə kompensasiya verilməsinə,  İ.Əliyevlə amansız davranışın müstəqil araşdırılmasına və günahkarların məsuliyyətə cəlb olunmasına  çağırırıq”, - məktubda deyilir. 

    Müraciəti “İnsan Haqları Evi” şəbəkəsinə daxil olan onlarla Avropa ölkəsinin hüquq müdafiə təşkilatları imzalayıb. -02D-