Hüquq müdafiəçiləri saxlama yerlərindəki və məhkəmələrdəki vəziyyəti tənqid edirlər

“Siyasi Məhbuslarsız Azərbaycan” İctimai Alyansı bu gün 2013-cü ildə ölkədə insan hüquqlarının durumuna dair” hesabatı ilə bağlı RATİ-nin ofisində mətbuat konfransı keçirib.

Qurumun rəhbəri, keçmiş vicdan məhbusu Elşən Həsənli 2013-cü ildə insan hüquqları baxımından pozitiv gözləntilərinin özünü doğrultmadığını xüsusi qeyd edib. 1993-cü ildən bu yana siyasi motivlərlə həbsə almaların, inzibati həbslərin davam etdiyi bildirilib.   

Hesabatda Penitensiar Xidmət sistemində durumun acınacaqlı olduğu qeyd edilir. Belə ki, 2013-cü ilin müxtəlif aylarında ölkənin 1, 2, 12, 17 saylı həbsxanalarında qiyamlar olduğu vurğulanır.

Qiyamların baş verməsinə səbəb kimi dustaqlara işgəncələr verilməsi, rüşvət tələb olunması, verilən yeməklərin keyfiyyətsizliyi göstərilir. 

Dustaqların etirazına cavab olaraq qiyam olan həbsxanalara qoşun xə xüsusi təyinatlılar yerləşdirildiyi, dustaqlara dəhşətli işgəncələr verildiyi deyilir. Bu qiyamlar arasında 1 saylı həbsxanadakı qiyamın nəticəsi daha dəhşətli olub. Saxlanma şəraitinin dözülməzliyinə etiraz edən 9 dustaqdan 7-si özünü bıçaqlayıb, 2-si isə ülgüclə damarlarını doğrayıb.

Hesabatda inzibati cəza alan gənc siyasi fəallara Binəqədi müvəqqəti saxlama təcridxanasında işçəncələr verildiyi qeyd edilir. 

Ruhani Tale Bağırzadənin cinayət işində adı şahid kimi keçən Kamran Seyidov yalan ifadə verməyə məcbur olunmasına görə intihar edib.

Gənc siyasi fəal Rəşadət Axundova qarşı cinayət işinin saxtalaşdırılmasına və 12 il həbs cəzası almaq təhlükəsi ilə üz-üzə olmasına dözə bilməyən babasının intihara əl atdığı qeyd edilir.  

Bundan başqa, toplaşma azadlığının pozulmasına, dinc aksiyaya görə iştirakçıların saxlanmasına toxunulur. 

Əsgər ölümlərinə etiraz olan 2013-cü ilin 12 yanvar aksiyasında 16 iştirakçıya 8300 manat maliyyə cəriməsi tətbiq edildiyi deyilir. 

İsmayıllı rayon sakinlərinə dəstək olan 2013-cü ilin 26 yanvar aksiyasında 80 nəfər aksiya iştirakçısı saxlanıldığı nəzərə çatdırılır. 

Əsgər ölümlərinə etiraz olaraq həmin ilin 10 mart aksiyasında 19 nəfərin hər birinin 300-600 manat arasında cərimə edildiyi açıqlanır.  

Hesabatda ədalətsiz qərar çıxaran hakimlər sırasında Ramella Allahverdiyeva, Rəşid Hüseynov, Cavid Hüseynov, Elçin Kazımov və s. adları çəkilir. 

Qurum rəhbərliyi dustaqlara amansız rəftara görə Penitensiar Xidmətin rəhbəri Mədət Quliyevi ironik şəkildə “məhbusların dosu” nominasiyasına layiq görüb və “qızıl dəyənək”lə “mükafat”landırıb.

Hesabatın beynəlxalq insan hüquqlarını müdafiə qurumlarına, ölkədəki səfirliklərə göndərilməsi nəzərdə tutulur.

Bu hesabatı Turan agentliyinə şərh edən Penitensiar Xidmətin mətbuat xidmətinin rəhbəri Mehman Sadıqov bildirib ki, bu qurumun fəaliyyəti kifayət qədər şəffafdır və beynəlxalq və yerli nəzarət altındadır. Müxtəlif ictimai qurumlar, o cümlədən ombudsman aparatı saxlama yerlərinin monitorinqini həyata keçirir. “İşgəncə halları olsaydı, diqqətdən kənarda qalmazdı və kimsə cəzalandırılardı.

Bu məruzənin dəlillərinin nəyə əsaslandığı bizə məlum deyil və yalnız təəssüf doğura bilər”, deyə Sadıqov qeyd edib. -05C06-