İlham Əliyev «İnformasiya əldə etmək haqqında» qanuna məhdudlaşdırıcı düzəlişi təsdiq edib

Prezident İlham Əliyev iyulun 6-da «İnformasiya əldə etmək haqqında» qanuna məhdudlaşdırıcı düzəlişi təsdiq edib. 

    Yeniliyə əsasən, informasiya almaq üçün icazə əgər bunlar Azərbaycanın siyasi, iqtisadi, hərbi sahələrdə, maliyyə-kredit və valyuta siyasətində, ictimai asayişin qorunmasında, sağlamlığın və mənəviyyatın, başqa şəxslərin hüquq və azadlığının, kommersiya və başqa iqtisadi maraqların, məhkəmələrin nüfuzu və tərəfsizliyinin qorunmasına zidd deyilsə icazə verilir.

     Xatırladaq ki, bu düzəlişlər yerli və beynəlxalq demokratik ictimaiyyətin kəskin reaksiyasına səbəb olub. Onlar informasiya və ifadə azadlığını Avropa İnsan Haqları Konvensiyasının 10-cu maddəsində yol veriləndən daha çox məhdudlaşdırır. 

   Bu maddənin 2-ci bəndinə görə, infortmasiya yayılması yalnız «dövlətin təhlükəsizliyi, ərazi bütövlüyü, ictimai asayiş məqsədi ilə, hərc-mərclik və cinayətkarlığın aradan qaldırılması, sağlamlıq və mənəviyyatın qorunması, başqa şəxslərin reputasiyası və hüquqlarının qorunması, məxfi yolla əldə edilən informasiyanın yayılmasının qarşısının alınması, məhkəmələrin nüfuzu və tərəfsizliyinin qorunmasının təmin edilməsi üçün» məhdudlaşdırıla bilər. Yəni məhdudiyyət iqtisadi və kommersiya informasiyasına aid deyil. 

  Qeyd edək ki, «İnformasiya əldə etmək haqqında» qanuna məhdudlaşdırıcı düzəlişlərlə yanaşı, 12 iyunda parlament «Hüquqi şəxslərin dövlət qeydiyyatı və dövlət reyestri haqqında» və «Kommersiya sirri haqqında» qanunlara da düzəlişləri təsdiq edib. Bu düzəlişlərdə şirkətlərin sahibləri və təsisçiləri barədə məlumat kommersiya sirri sayılır. 

    Bu qanunlara düzəlişlər hələ prezident tərfindən təsdiq edilməyib. 

    Hətta bu düzəlişlər təsdiq olunmasa da, “İnformasiya əldə etmək haqqında» qanuna məhdudlaşdırıcı düzəlişlər dövlət orqanlarına imkan verir ki, jurnalistlər də daxil vətəndaşlara şirkət sahibləri barədə informasiya verməkdən imtina etsin. 

    Bütün bunlar şəffaflığın azalmasına, korrupsiyanın inkişafına səbəb olacaq. 

   «Qanunvericilik məxfiliyə yox, şəffaflığa can atmalıdır»,  - deyə AŞ Venesiya Komissiyasının katibi Tomas Markert Azərbaycan qanunvericiliyinə deyilən düzəlişləri şərh edərkən bildirmişdi.—06D-