Minsk Qrupunun həmsədri olan ölkələrin XİN rəhbərləri Yerevan və Bakıdan razılığa gəlməyi tələb ediblər

ATƏT XİN Şurasının Hamburqda keçirilən iclasının yekunlarına görə ABŞ, Fransa və Rusiya XİN başçıları Qarabağ münaqişəsi üzrə birgə bəyanatla çıxış ediblər.

"Biz, ATƏT-in Minsk qrupunun həmsədri olan ölkələrin nümayəndə heyətlərinin başçıları - Rusiya xarici işlər naziri Sergey Lavrov, ABŞ dövlət katibi Con Kerri və Fransanın xarici işlər naziri Jan-Mark Ayro - əvvəlki kimi Dağlıq Qarabağ münaqişəsinin razılaşma yolu ilə həllinə tamamilə sadiqik.

Apreldə təmas xəttində gərginliyin kəskin artması fonunda davam edən silahlı insidentlərlə, o cümlədən ağır silahlardan istifadə ilə bağlı narahatlığımızı ifadə edirik və güc tətbiqini və ya güc tətbiqi hədələrini qətiyyətlə pisləyirik.
Bu münaqişənin hərbi həll yolu və mülki şəxslərin həlak olması və yaralanması üçün heç bir əsas yoxdur. Bizə həmçinin apreldə döyüş meydanında törədilmiş vəhşiliklər haqqında məlumdur, biz onları ən qəti şəkildə pisləyirik.

Biz tərəflərə region xalqlarının real barışığına nail olmağın yeganə yolu kimi münaqişənin dinc yolla həllinə sadiq olduqlarını təsdiq etmələri üçün müraciət edirik. Biz həmçinin onları münaqişə zonasında hərbi əməliyyatların dayandırılmasının əsasını təşkil edən atəşkəs haqqında 1994-95-ci il sazişlərin riayət etməyə çağırırıq", deyə bəyanatda qeyd edilir.

Daha sonra üç ölkənin XİN başçıları Yerevanı və Bakını Vyana və Sankt-Peterburqda yüksək səviyyədə qəbul edilmiş sazişlərə riayət etməyə çağırırlar.

"Biz tərəflərin Beynəlxalq Qırmızı Xaç Komitəsinin himayəsi altında iktin düşmüş şəxslər haqqında məlumat mübadiləsi həyata keçirilməsində əldə etdiyi irəliləyişi alqışlayırıq. Biz tərəfləri ATƏT-in şəxsi nümayəndəsinin missiyasının genişləndirilməsi yolunda qalan bütün maneələri aradan qaldırmağa və ATƏT-in araşdırma mexanizminin yaradılması haqqında təkliflər üzrə irəliləyiş əldə etməyə çağırırıq.

Təkliflər nizamlama üzrə danışıqlar dərhal bərpa edilməklə birlikdə həyata keçirilməlidir.

Azərbaycan və Ermənistan liderlərinə cari təkliflər əsasında sabit sülhə doğru irəliləmək məqsədilə danışıqlar masası arxasına qayıtmaq çağırışımızı təkrar etmək istərdik. Danışıqlarda irəliləyiş əldə edilməsə zorakılığın bərpası perspektivləri yalnız artacaq və tərəflər tam məsuliyyət daşıyacaq", deyə bəyanatda qeyd edilir.

"Nizamlama Helsinki Yekun Aktını təməl prinsiplərinə, daha dəqiq isə güc tətbiq edilməməsi, ərazi bütövlüyü, xalqların bərabərhüquqluluğu və öz müqəddəratını həll etməsi prinsiplərinə, habelə həmsədr ölkələrin prezidentlərinin təklif etdiyi əlavə elementlərə, o cümlədən Dağlıq Qarabağ ətrafındakı ərazilərin Azərbaycanın nəzarəti altına qaytarılması; təhlükəsizlik və özünüidarə zəmanətlərinin təmin edilməsi üçün Dağlıq Qarabağa aralıq status verilməsi; Ermənistanı Dağlıq Qarabağla birləşdirən dəhliz; gələcəkdə Dağlıq Qarabağın yekun hüquqi statusunun mütləq hüquqi qüvvəyə malik referendum vasitəsilə müəyyən edilməsi; bütün daxili köçkünlərin və qaçqınların əvvəlki yaşayış yerlərinə qayıtması və sülhün qorunub saxlanması üzrə əməliyyatları da ehtiva edəcək beynəlxalq təhlükəsizlik zəmanəti elementlərinə əsaslanmalıdır.

Ölkələrimiz tərəflərlə sıx əlaqədə işləməyə davam edəcək və biz onları Minsk qrupunun yardımı ilə həmsədrlərdən vasitəçi kimi tam istifadə etməyə çağırırıq.

Həmsədr ölkələr Ermənistan və Azərbaycan prezidentləri hazır olduqda onların görüşünü keçirməyə hazırıq. Biz qəti əminik ki, prezidentlər ilk fürsətdə xoş məramlı danışıqlar aparmalıdırlar. Prezidentlər arasında həmsədrlərin himayəsi altında keçirilən fasiləsiz və birbaşa dialoq etimadın möhkəmləndirilməsinin və sülh prosesinin irəliləməsinin ən mühüm elementlərindən biri olaraq qalır", deyə bəyanatda qeyd edilir. -0-