Müsavat partiyası başqanı qurultayla bağlı Bakı meriyasına müraciət edib

Müsavat partiyasının başqanı İsa Qəmbər  partiya qurultayının keçirilməsi üçün yer ayırlması ilə bağlı Bakı şəhər icra hakimiyyətinin başçısına məktub ünvanlayıb.

Partiya lideri Bakı merinə qurultay keçirilməsi üçün 2012-ci ilin müxtəlif vaxtlarında müraciət edildiyini və bu müraciətlərə mənfi cavab verildiyini xatırladır. 

Daha sonra məktubda qurultay keçirilməsi üçün Bakının Sabunçu və Suraxanı rayonlarında təklif olunan məkanların min nəfərə qədər şəxsi əhatə etmək gücündə olmadığı vurğulanır.  

Hakim “Yeni Azərbaycan” partiyanın rayon təşkilatına Azərbaycan Dövlət Akademik Teatrında, iqtidaryönlü gənclər təşkilatına ölkənin ən böyük zallarından birində tədbir keçirməyə imkan yaradan iqtidar bu haqqı bütün siyasi qüvvələrə, o cümlədən aparıcı müxalifət partiyası kimi Müsavat partiyasına da tanımalıdır” deyə partiya başqanı mövqeyini ifadə edir. 

Son olaraq məktubda bu il mayın 24-də qurultayın keçirilməsi üçün paytaxtın uyğun zallarının birinin ayrılması xahiş edilir.-05D-