Nardaranda aksiya təxirə salınıb

Nardaran qəsəbəsində martın 31-də narkotik saxlamaq ittihamı ilə həbs edilmiş ilahiyyatçı Taleh Bağırzadənin azad edilməsi tələbi ilə cümə gününə nəzərdə tutulan etiraz aksiyası baş tutmayıb.

Buna səbəb şeyx Allahşükür Paşazadənin yerli ağsaqqalları iki ay ərzində Bağırzadənin və digər 74 dindarın azad ediləcəyinə inandırması olub.

Bu, saat 16.00-da İmam Hüseyn meydanında elan edilib. Həmin vaxta qədər meydana yüzlələ dindar toplaşmışdı. Bundan sonra toplaşanlar dağılıblar.

Lakin Turan agentliyi Qafqaz Müsəlmanları İdarəsindən bu məlumatın təsdiqini ala bilməyib. Şaiyənin aksiyanın dağıdılması məqsədilə qəsdən yayıldığı istisna deyil.

Turan-ın müxbirlərinin verdiyi məlumata görə, səhər saatlarından etibarən Nardarana bütün girişlər polis dəstələri tərəfindən nəzarət altına alınıb. Yol boyunca polis əməkdaşları ilə doldurulmuş polislər yerləşdirilib. -16C03/06-

***

Nardaran qəsəbəsində saat 16-ya təyin edilmiş etiraz aksiyası hakimiyyətin təşvişə düşməsinə səbəb olub və o, qəsəbədə və ona gedən yollarda faktiki olaraq fövqəladə vəziyyət tətbiq edib.

Turan-ın müxbirlərinin hadisə yerindən verdikləri məlumata görə, polis Nardaranın din xadimi, hakimiyyət tərəfindən narkotik saxlamaq ittiham edilmiş Taleh Bağırzadənin həbsinə qarşı etiraz aksiyasında iştirak üçün gələn insanların maşınlarını qəsəbəyə buraxmır.

Qəsəbə ağsaqqalı Natiq Kərimov Turan-a telefonla bildirib ki, polis onun evini mühasirəyə alıb və küçəyə çıxmasına imkan vermir. Bu arada, yüzlərlə insan mitinq keçirmək üçün qəsəbənin mərkəzi meydanına toplaşıb. -016В-