NİDA fəalları uzun müddətə azadlıqdan məhrum olunublar (video - YENİLƏNİB)

Bakı Ağır Cinayətlər Məhkəməsində NİDA hərəkatı fəallarına hökm oxunub.

Məhkəmə Rəşadət Axundov, Zaur Qurbanlı, İlkin Rüstəmzadəni 8 il, Rəşad Həsənov, Məmməd Əzizovu 7,5 il, Üzeyir Məmmədli, Bəxtiyar Quliyevi 7 il, Şahin Novruzlunu 6 il azadlıqdan məhrum edib.

Onlar 2013-cü il martın 10-da əsgər ölümlərinə etiraz aksiyası zamanı kütləvi iğtişaşların təşkilində təqsirli bilinirlər.

Həmçinin məhkəmə onları qanunsuz partlayıcı maddələr, narkotik vasitələr saxlamaqda və xuliqanliqda təqsirli bilib.

Xatırladaq ki, Amnesty İnternational bu fəalları “vicdan məhbusu” kimi tanıyıb.—16 06D-

2014 May 06 (Çərşənbə axşamı) 11:26:28

Bakı Ağır Cinayətlər Məhkəməsinin binasının yanında NİDA hərəkatının 8 fəalına dəstək aksiyası keçirilir. Bu gün hökmün oxunması gözlənilir.

Saat 10:00-a yaxın gücləndirilmiş polis dəstələri 100-ə yaxın aksiya iştirakçısını sıxışdıraraq qarşı küçəyə yönəldib.

Gənclər əllərində Heydər Əliyevin sözləri yazılmış “Ədaləti ədalətsizliklə bərpa etmək olmaz”, “NİDA üzvlərinə azadlıq və ədalət” plakatlarını tutublar. Lakin polislər plakatları alaraq cırıblar.

Polis həmçinin jurnalistlərin işinə mane olaraq onlara çəkiliş aparmağa imkan verməyib.

Xatırladaq ki, prokuror bütün fəalların 6,5 ildən 8,5 ilədək azadlıqdan məhrum olunmasını istəyib.—16D-