Prezident İlham Əliyev Qərbi Azərbaycan, sülh sazişi, Paşinyanla baş tutmayan görüş, Rusiya qazının təkrar satışı ilə bağlı ittihamlar barədə

Azərbaycanlılar nə vaxtsa Ermənistanda yaşadıqları yerlərə, ermənilər isə Azərbaycana qayıda biləcəklərmi? İyulun 20-də Şuşada keçirilən Qlobal Media Forumu zamanı dövlət başçısı İlham Əliyev bu sualın cavabında deyib ki, “mən əminəm ki, həmin gün mütləq gələcək”.

Ermənilərin qayıtmasna gəlincə, Əliyev dəfələrlə təkliflərə baxmayaraq, Qarabağ ermənilərinin Azərbaycana reinteqrasiyadan vətəndaşlıq qəbul etməkdən  imtina etdiyini xatırladıb.

“Biz Ermənistan hökuməti tərəfindən də eyni yanaşmanı gözləyirik. Biz onlardan açıq-aydın bəyanat gözləyirik ki, bugünkü Ermənistan ərazisindən, Qərbi Azərbaycandan qovulmuş azərbaycanlılar, yaxud oradan didərgin salınanların övladları və nəsilləri öz tarixi torpaqlarına necə qayıda və həmin yerlərə gedə bilərlər, yaxud həmin torpaqlarda necə yaşaya bilərlər. Üstəlik, bizdə olan kifayət qədər mötəbər məlumatlara görə, azərbaycanlıların yaşadığı kəndlərin 90 faizində indi həyat yoxdur, yəni həmin yerlər boşdur”, - Əliyev deyib.

Sülh sazişi hansı mərhələdədir? Bu sualın cavabında Əliyev deyib ki, sülh sazişinin mətninin 80-90 faizi razılaşdırılıb. Ermənistan Dağlıq Qarabağla bağlı terminologiyanı oradan götürməyə razı oldu. Ancaq burada yenə də hazırda iki məsələ var. Birincisi, Ermənistan bizim təkliflərə müsbət cavab verməlidir ki, həm Ermənistan, həm Azərbaycan birgə ATƏT-ə müraciət etsin ki, Minsk Qrupu ləğv edilsin. Çünki artıq uzun müddətdir bu qrup fəaliyyətsizdir.

İkincisi, Ermənistan konstitusiyasında dəyişikliklər edilməlidir. Ermənistan konstitusiyasında müstəqillik barədə müddəa var və orada Azərbaycanın ərazi bütövlüyünə qarşı təhlükə var, təhdid var. Orada Ermənistanın və dırnaqarası “Dağlıq Qarabağ”ın birləşməsindən söhbət gedir. Yəni, bu müddəa o konstitusiyada olduğu müddətdə sülh sazişi mümkün deyil”,- Əliyev deyib.

Londonda Paşinyanla baş tutmayan görüşə gəlincə, Əliyev bildirib ki, Böyük Britaniya hökuməti Oksfordşirdə görüş təşkil etməyi təklif etib. “Ermənistan tərəfi bu təklifi rədd etdi. Biz buna çox təəccübləndik”, - o qeyd edib.

Görüşdə Britaniyanın baş naziri iştirak edəcəkdi və sonra çıxacaqdı. "Baş nazir Paşinyan bundan imtina etdi. Yəni, o, mənimlə danışmaq istəmirsə, hansı sülh sazişindən söhbət gedə bilər", - Əliyev deyib.

Daha sonra Əliyev avropalı liderlərdən narazılığını bildirib. Londonda keçirilən görüşlərdə ondan Ermənistanla sülh sazişi barədə soruşyublar. Onun fikrincə, bu, normal deyil və özü heç vaxt digər ölkələrin daxili işlərilə maraqlanmır.

O həmçinin Washington Post və New York Times daxil olmaqla,  Azərbaycan haqqında redaktorlar səviyyəsində onlarla məqalə dərc edən, onu  diktator və satrap adlandıran Qərb nəşrlərini pisləyib.

Rusiya qazının Azərbaycana nəqli barədə sualın cavabında  Əliyev deyib ki, Bakı Rusiyadan cəmi 1 milyard kubmetr qaz alıb, “bazarlarda qiymət çox yüksək olanda Rusiya qazının qiyməti daha münasib idi və bu, tamamilə kommersiya prinsipli bir biznes sazişi idi”.

Azərbaycan 25 milyard kubmetr ixrac edir, yalnız 1 milyardı idxal edib. Yəni, burada Rusiya qazının ixracı üçün hər hansı bir kanal olmaqda ittiham edilməmiz çox yanlış və necə deyərlər “feyk” xəbərdir. Bu il biz 1,5 milyard kubmetr qaz hasil edəcəyik, qarşıdan gələn illərdə bu rəqəm 5 milyard kubmetrə çatacaq, İlham Əliyev qeyd edib.