Prezident İlham Əliyevin deokkupasiya, logistika və qoşulmama haqda Astana tezisləri

Bakı/13.10.22/Turan: Cümə axşamı Astanada keçirilən Asiyada Qarşılıqlı Fəaliyyət və Etimad Tədbirləri üzrə Müşavirənin altıncı sammitinin plenar iclasında Azərbaycan prezidenti İlham Əliyev Ermənistanın Azərbaycana təcavüzünün nəticələrinə, Azərbaycanın logistik roluna və Qoşulmama Hərəkatında ölkənin sülhyaratma səylərinə həsr olunmuş üç tezislə çıxış edib.

Əliyev Azərbaycan ərazilərinin Ermənistan tərəfindən otuz illik işğalına diqqət çəkib. 2020-ci ilin payızında qələbə ilə nəticələnən müharibə buna  son qoyub.

O, dünya birliyinin fəaliyyətsizliyinə və təcavüzkara qarşı seyrçi mövqe  tutmasına diqqət yetirib. Bu Azərbaycan kəndlərinin və şəhərlərinin məhv edilməsinə, bir milyona yaxın adamın qovulmasına, minlərlə dinc vətəndaşın öldürülməsinə gətirib çıxarıb.

"Ermənistan sistematik olaraq Azərbaycanın mülki əhalisinə və hərbçilərinə qarşı hərbi cinayətlər törədib. Birinci Qarabağ Müharibəsindən indiyədək 3900-ə yaxın Azərbaycan vətəndaşı itkin düşmüş hesab olunur. Onların əksəriyyəti işgəncələrə məruz qalıb, öldürülüb və kütləvi məzarlıqlarda dəfn edilib. Bu il işğaldan azad edilmiş iki kənddə kütləvi məzarlıqlar aşkar etdik".

Əliyev bildirib ki, Ermənistanın verdiyi əziyyətlərə baxmayaraq, Azərbaycan ona bir-birinin ərazi bütövlüyünün qarşılıqlı tanınması əsasında sülh sazişinin imzalanmasını təklif edib.

Geniş regional kooperasiya sahəsindən danışan Əliyev diqqəti infrastruktur layihələrinin həyata keçirilməsinə yönəldib. Bu layihələr Azərbaycanı böyük logistika mərkəzinə çevirməlidir. Artıq bu ilin 9 ayı ərzində yüklərin tranziti 65 faiz artıb.

"Azərbaycan Şərq-Qərb və Şimal-Cənub nəqliyyat dəhlizlərinin inkişafına mühüm töhfə verir. Ölkəmiz Orta dəhlizin mühüm hissəsinə çevriləcək Zəngəzur dəhlizinin yaradılmasını fəal şəkildə təşviq edir".

Və nəhayət, o, Azərbaycanın 2019-cu ildən Qoşulmama Hərəkatında sədrliyinin nəticələrini açıqlayıb.

“Biz Qoşulmama Hərəkatı çərçivəsində həmrəyliyin möhkəmləndirilməsi, onun siyasi çəkisinin və qlobal təsirinin artırılması üçün böyük səylər göstəririk. Bu məqsədlə Azərbaycan Hərəkatın institusionallaşdırılması ideyasını fəal şəkildə təbliğ edir. Bu kontekstdə Azərbaycanın təşəbbüsü ilə yaradılmış Qoşulmama Hərəkatının Parlament şəbəkəsini və Gənclər Təşkilatını qeyd etmək lazımdır. Biz COVİD-dən sonrakı dünya ilə əlaqədar fikir mübadiləsi aparmaq və Hərəkatın mövqeyini formalaşdırmaq üçün gələn il Qoşulmama Hərəkatına üzv dövlətlərin yüksək səviyyədə görüşünün keçirilməsini təklif etdik”.—0—