QAT qurultayı Qarabağ uğrunda müharibəyə başlamağa çağırıb

Qarabağ Azadlıq Təşkilatı (QAT) bu günlərdə Beynəlxalq Mətbuat Mərkəzində (BMM) IV qurultayını keçirib. 

Qurultay Azərbaycanın dövlət himninin oxunması ilə başlayıb, rəhbər orqanları seçilib. Nümayəndələrin əksəriyyəti iştirak etdikləri üçün qurultay səlahiyyətli sayılıb. Bundan sonra QAT sədri Akif Nağı hesabat məruzəsi ilə çıxış edib. 

A.Nağı Qarabağın azad olunmasını QAT-ın “bir saylı hədəfi” kimi qalmaqda davam etdiyini söyləyib. O, torpaqlar işğal altında qaldıqca hansısa uğurdan və nəyəsə nail olmaqdan danışmağı yersiz sayıb. Qarabağ münaqişəsinin tənzimlənməsində ATƏT-in Minsk Qrupunun vasitəçiliyi əhəmiyyətsiz hesab olunub.  Qurum rəhbəri “xalq diplomatiyası” təşəbbüslərinə qarşı çıxmaqla ermənilərin yalançı sülh danışıqlarının qarşısını aldıqlarını iddia edib. Onun fikrincə, bu həm də ermənilərin Azərbaycana davamlı səfərlərinə da mane olub. 

A.Nağı QAT-ın önündə əsas məsələ kimi cəmiyyəti müharibəyə səfərbər etmək təbliğatını durduğunu önə çəkib. Daha bir vəzifə kimi saxta danışıqlar prosesinin dayandırılması olduğu vurğulanıb. Milli barışın birlikdən keçdiyini deyən  QAT sədri müharibənin qaçılmaz olduğunu deyib. “Hər şeyimiz var, ordu, silah, pul. Elə isə niyə müharibəyə başlamırıq. Qarabağsız Azərbaycan olmayacaq. Ya Qarabağ, ya ölüm”, - qurum rəhbəri çıxışını başa vurub.  

  Daha sonra MTNK və digər qurumların hesabatı dinlənilib, qənaətbəxş sayılıb. Qurultay təşkilati məsələlərə baxıb, seçkilər keçirilib. A. Nağı növbəti müddətə QAT sədri seçilib. 

  Qurultayın qəbul etdiyi qətnamədə müharibəyə başlamaq təkidlərinin tələb olunması, ATƏT-in vasitəçiliyindən imtina olunması, ölkənin təslimçi sülhə getməyəcəyinin dünya birliyinin diqqətinə çatdırılması, ordu ilə bağlı mənfi rəyin yaradılmasına imkan verilməməsi kimi müddəalar yer alıb. 

Dünya birliyinə müraciət və bəyanat qəbul olunub. Sənədlərdə qurum Azərbaycan torpaqlarının işğalda qalması faktını xatırladaraq dünya birliyini torpaqların sülh yolu ilə azad olunmasında səylərini artırmağı tələb edir.-05D-