Səslər təhlükədədir: Azərbaycanda jurnalisti az qala öldürəcək qədər amansız hücumun sifarişini kim verib?

Independent: Ötən ilin avqust ayında Naxçıvanda insan hüquqlarının müdafiəsi üzrə yeganə müstəqil təşkilat olan Resurs Mərkəzinin ofisinə hücum edən şəxslər müstəqil jurnalist və hüquq müdafiəçisi İlqar Nəsibovu amansızca döyüblər. Human Rights Watch-un məlumatlarına görə, hücum hökumətin (Azərbaycan hökumətinin) neftlə zəngin ölkədə müstəqil tənqidi səslərin boğulması məqsədilə həyata keçirdiyi repressiyalar dalğası ilə eyni zamana təsadüf edib.

Nəsibovun sözlərinə görə, hücumçulardan biri onu beşbarmaqla vurub, digəri boğazından tutub boğub, digər hücumçular isə ofisi talan ediblər. Avqustun 21-də onlar təşkilat texnikasını məhv ediblər və Nəsibovu huşsuz şəkildə qan içində qoyub gediblər.

Hücumdan 3 saat sonra Nəsibov bütün gücünü toplayaraq, həyat yoldaşı, jurnalist və hüquq müdafiəçisi Məlahət Nəsibovaya zəng edib, amma həmin vaxta qədər o, çox qan itirib.

Məlahət Nəsibovanın sözlərinə görə, tibbi rəylər təsdiq edir ki, onun həyat yoldaşı başından ciddi zədə alıb, almacıq sümükləri, burnu və qabırğaları qırılıb, baş və bədən nahiyəsində qanaxma verən yaralar var idi, bir gözündən zədə alıb. Üzünə və başına onlarla tikiş atılıb və o, beyindaxili qanaxmadan əziyyət çəkib.

Özünü həyat yoldaşının yanına atan Nəsibova kabinetə daxil olduqda çox qorxduğunu deyib: “Baş verənlərdən sonra məndə psixoloji travmalar yaranıb”. O və həyat yoldaşı ölkədə mümkün olmayan intensiv tibbi müalicə almaq üçün xaricə gediblər.

İşgəncələr Əleyhinə Ümumdünya Təşkilatının və İnsan Hüquqları üzrə Beynəlxalq Federasiyanın (FİDH) birgə proqramı olan Hüquq müdafiəçilərinin müdafiəsi üzrə Rəsədxana polisin hücumu “alkoqol sərxoşluğu nəticəsində dostlar arasında adi münaqişə” kimi tövsif etməsi ilə bağlı narahatlığını bildirib. Məhkəmə tərəfləri hücumçulardan biri və Nəsibov arasında barışığa məcbur etdikdən sonra iş ört-basdır edildi. Qalan hücumçular hələ də məlum deyil.

“Əminik ki, bu hücum Naxçıvandakı fəallığımızla əlaqədar planlaşdırılıb. Hücumdan əvvəl bir neçə dəfə ofisimizi və mənzilimizi açmağa cəhd ediblər, İlqar zorakılıq qurbanı olub, yaralar alıb, mənə Naxçıvanın Milli Təhlükəsizlik Nazirliyindən kimdənsə zəng gəlib, o, ailəmi təhdid edib”, deyə Məlahət bildirib.

Azad Avropa radiosu da Nəsibovların “qorxutma aktlarına”, o cümlədən maliyyə tədbirlərinə məruz qaldığını iddia edib: “Fərdi hesablarımız və təşkilatın bank hesabları dondurulub, - deyə Nəsibova bildirib. – Bundan başqa, Bakıda prokurorluq məndən bankdakı hesabımdakı pullar haqqında bəyanat qəbul edib”.

Jurnalistləri Müdafiə Komitəsinin Avropa və Mərkəzi Asiya Proqramının koordinatoru Nina Oqnyayona deyib: “Biz İlqar Nəsibova qarşı vəhşicəsinə hücumdan qəzəblənmişik və Azərbaycan hakimiyyətini döyülmə faktını əsaslı və səmərəli şəkildə araşdırmağa, diqqəti cinayətin motivi üzərində cəmləşdirməyə, Nəsibovun jurnalist və hüquq müdafiəçisi olduğunu diqqətə almağa çağırırıq”.

Azərbaycanın Londondakı səfirliyinin mətbuat katibi bəyanatla çıxış edərək, deyib: “Söz və mətbuat azadlığı Azərbaycan Konstitusiyasında zəmanət verilmiş əsas hüquqlardan biridir” və “... peşə fəaliyyətinə görə hər-hansı təqiblə qarşılaşdığını iddia edən istənilən jurnalist məhkəməyə müraciət edə bilər və etməlidir, məhkəmələr isə öz növbəsində bu iradları əsaslı surətdə və müstəqil şəkildə təhqiq etməlidir”.

Nümayəndə həmçinin Azərbaycan hökumətinin “... jurnalistlərin müdafiəsinin bundan sonra da gücləndirilməsi məqsədilə beynəlxalq tərəfdaşlarla işləməyə hazır və qətiyyətli olduğu” haqqında bəyanatını təsdiq edib. O, eyni zamanda xəbərdarlıq edib ki, “bəzi jurnalistlər qanunu pozarkən peşə fəaliyyəti qalxanı arxasında gizlənməyə çalışırlar”.

Azərbaycan Avropa Şurasına altı aylıq sədrliyini təzəcə başa vurub və təbii resursların idarə edilməsində şəffaflıq yaratmaq üçün hökumətlərə kömək edən nüfuzlu beynəlxalq koalisiyanın - Mədən Sənayesində Şəffaflıq Təşəbbüsünün (EİTİ) təsisçilərindən və idarə heyətinin üzvlərindən biridir.

Human Rights Watch Azərbaycanı EİTİ-də iştirakdan məhrum etməyə çağırıb. Sərhədsiz Reportyorlar təşkilatının mətbuat azadlığı indeksinə görə, Azərbaycan 2014-cü ildə 180 ölkə arasında 160-cı yeri tutub.