Təhlükəsizlik Şurasında Laçın dəhlizindəki vəziyyət müzakirə olunub

Bakı/21.12.22/Turan: Dekabrın 20-də axşam BMT-nin Təhlükəsizlik Şurasında Ermənistanın çağırışı ilə Azərbaycanın Laçın dəhlizindəki vəziyyətlə bağlı müzakirələr aparılıb.

Fransa nümayəndəsi dəhlizi açmağa və humanitar missiyaları Qarabağa buraxmağa çağırıb. O, Azərbaycanın hər iki istiqamətdə maneəsiz hərəkəti təmin etmək öhdəliyini qeyd edib. Eyni zamanda, o, Bakını və Yerevanı sülh sazişi bağlanması üçün dialoqu davam etdirməyə çağırıb.

BƏƏ nümayəndəsi Azərbaycan, Ermənistan və Rusiya liderlərinin üçtərəfli bəyanatlarının müddəalarına riayət etməyə çağırıb. O, münaqişəni beynəlxalq hüquq çərçivəsində həll etməyə çağırıb.

Albaniya nümayəndəsi Laçın dəhlizində azad hərəkətin təmin edilməsinin orada yaşayan əhali üçün əhəmiyyətini vurğulayıb. O, Ermənistanı və Azərbaycanı regionun ekoloji problemlərinin həlli üçün dialoqa çağırıb.

Çin nümayəndəsi bildirib ki, Laçın dəhlizindəki vəziyyət dialoq yolu ilə həll edilməlidir. O, bu məsələdə Rusiyanın önəmli rolunu qeyd edib. O, həmçinin problemləri Rusiya, Azərbaycan və Ermənistan liderlərinin üçtərəfli bəyanatları və beynəlxalq hüquq normaları çərçivəsində həll etməyə çağırıb.

ABŞ nümayəndəsi narahatlığını bildirib və Laçın dəhlizini açmağa çağırıb. O, regionda qaz təchizatının bərpa olunmasını alqışlayıb və əhali üçün humanitar problemlər yaradılmasını qəbuledilməz adlandırıb. O, həmçinin mübahisəli problemləri beynəlxalq hüquq normaları əsasında, hərbi yolla deyil, danışıqlar yolu ilə həll etməyə çağırıb.

Rusiya regiondakı yataqların işlənməsi ilə bağlı fikir ayrılıqları səbəbindən Laçın dəhlizinin bağlanmasından narahatdır, bu sözləri Moskvanın nümayəndəsi deyib.

Rusiya nəqliyyat əlaqəsinin qısa zamanda bərpa ediləcəyinə ümid edir. Rusiya tərəfi Laçın dəhlizindəki vəziyyətin həlli üçün XİN və Müdafiə Nazirliyi səviyyəsində bütün tədbirləri görür. Nəticədə, Dağlıq Qarabağa qaz verilməsinin bərpa olunmasına və dəhlizdə hərəkətin qismən açılmasına müvəffəq olunub. Azərbaycanın ekoloji ekspertlərinin Qarabağdakı mədən yataqlarına baş çəkməsi üçün parametrlər razılaşdırılır.

O, Ermənistanı və Azərbaycanı gərginliyi artıran addımlardan çəkinməyə çağırıb və regionda nəqliyyat əlaqələrinin açılmasında və Ermənistan və Azərbaycan arasında sərhədlərin delimitasiyası üzrə tədbirlərin hazırlanmasında Rusiyanın rolunu qeyd edib.

Böyük Britaniya nümayəndəsi Laçın dəhlizinin bağlanmasından, yaranan humanitar problemlərdən narahatlığını bildirib və dəhlizi dərhal açmağa çağırıb. O, yolda qalan insanların qayıtmasını təmin etməyə çağırıb. O, həmçinin Qarabağ qaz verilməsinin bərpasından məmnunluğunu ifadə edib.

Braziliya, Keniya, Meksika, Norveç, Qana, İrlandiya və Qabon nümayəndələri də bənzər ruhda çıxış ediblər.

Ermənistan nümayəndəsi Azərbaycanı üçtərəfli bəyanatları və beynəlxalq hüququ pozmaqda ittiham edib. O, yolun uydurma bəhanə ilə bağlanmasını qanunsuz adlandırıb. O, həmçinin iddia edib ki, Bakı qəsdən Qarabağ əhalisini həyat şərtlərindən məhrum etmək və etnik təmizləmə həyata keçirmək istəyir. Ekoloqların etirazları Azərbaycan hakimiyyəti tərəfindən təşkil edilmiş tədbirdir, deyən Ermənistan nümayəndəsi Təhlükəsizlik Şurasını Azərbaycana təzyiq göstərməyə çağırıb.

Azərbaycan nümayəndəsi Ermənistanı saxtakarlıqda və ictimai rəyi manipulyasiya etməkdə ittiham edib. O, Təhlükəsizlik Şurasından Azərbaycana təzyiq üçün istifadə edilməsini yolverilməz adlandırıb. O xatırladıb ki, "Dağlıq Qarabağ" adlandırılan ərazi Azərbaycanın suveren ərazisidir, bu, beynəlxalq səviyyədə tanınıb. Regionun rəsmi adı Qarabağ İqtisadi Rayonudur. Bu ərazi 30 ilə yaxın Ermənistanın işğalı altında olub, bütün bu illər ərzində bu ölkə BMT-nin dörd qətnaməsinə məhəl qoymayıb, onları yerinə yetirməyib.

Laçın dəhlizi tamamilə Azərbaycan ərazisindədir. Laçın əhalisi - 77 min azərbaycanlı ermənilər tərəfindən qovulub, Laçın özü və onun ətrafındakı bütün kəndlər isə ermənilər tərəfindən yandırılıb. 2020-ci ildə 44 günlük müharibə zamanı bu torpaqlar azad edilib.

Nə Azərbaycan hökuməti, nə etiraz edən fəallar Laçın dəhlizini bağlamayıb. İnsanların, nəqliyyatın və yüklərin bu yolda hərəkət rejimi dəyişməyib, sülhməramlılar isə bu marşrutun qorunması funksiyalarını yerinə yetirməyə davam edirlər. Hadisə yerindən videoreportajlar bunu göstərir. Humanitar fəlakət haqqında iddialar həqiqətə uyğun deyil. Bu, Ermənistan tərəfindən manipulyasiyadan başqa bir şey deyil. Məhsulların çatdırılması, yerli sakinlərin hərəkəti və ya tibbi xidmətlərin çatdırılması üçün heç bir maneə yoxdur.

Fəalların Laçın yolunda etiraz aksiyasının səbəblərinə gəlincə, bu, Ermənistan tərəfindən 2020-ci ilin 10 noyabr tarixli üçtərəfli bəyanatın erməni silahlı qüvvələrinin bu regiondan tamamilə çıxarılması haqqında 4-cü bəndinin pozulması ilə bağlıdır. Laçın dəhlizinin humanitar dəhliz olduğunu deyən Ermənistan ondan hərbi məqsədlər üçün - silah və canlı qüvvə daşımaq üçün istifadə edib, bu da üçtərəfli bəyanatın 6-cı bəndinə ziddir.

Ermənistan 1-ci bəndi pozaraq, bu regionda minalanmış sahələrin xəritələrini tam təqdim etməyib. Müharibədən sonrakı dövrdə Ermənistan yüz minlərlə mina gətirib və onları Azərbaycan ərazisində quraşdırıblar. Bu, "humanitar" Laçın dəhlizindən istifadə ilə edilib.

Bundan başqa, Laçın dəhlizindən Azərbaycanın mineral resurslarının qanunsuz istismarı üçün istifadə olunur. Ermənistan tərəfi Azərbaycanın 50-dən çox təbii resurs yataqlarını ekoloji normaları kobud şəkildə pozmaqla, qanunsuz olaraq istismar edir, bu, artıq təbiətə ciddi ziyan vurub. Bütün bunlar Azərbaycanın qanuni narazılığına səbəb olub. Rusiya sülhməramlılarının komandanlığı ilə qızıl və mis yataqlarında təftiş aparılması haqqında yol xəritəsinin razılaşdırılmasına baxmayaraq, Ermənistan tərəfi bu tədbirə mane olub.

Azərbaycan bütün bunlarla barışmayacaq və BMT nizamnaməsi çərçivəsində bütün yollarla buna qarşı mübarizə aparacaq və xarici təzyiqə yol verməyəcək. Azərbaycan həmçinin erməni əsilli vətəndaşlarının hüquqlarına zəmanət verir.

Azərbaycan nümayəndəsi bəzi xarici oyunçuların bu vəziyyətə müdaxiləsinin yolverilməz olduğunu deyib, biznesmen Ruben Vardanyanın Qarabağa göndərilməsini sabitliyi pozan fakt adlandırıb.

O, beynəlxalq ictimaiyyəti Yerevanın qanunsuz əməllərdən əl çəkməsi və sülh müqaviləsi bağlaması üçün Ermənistana təsir göstərməyə çağırıb. 02B