Vətəndaş cəmiyyətinin fəalları Əli Həsənovla görüş barədə

Vətəndaş cəmiyyətinin fəalları Prezident Administrasiyasının şöbə müdiri Əli Həsənovla dünənki görüşün yekunlarını müxtəlif cür qiymətləndirir. 

“Bu cür görüşün təşəbbüsü prezident yanında QHT-yə Dövlət Dəstəyi Şurasından gəlib. İndiyədək belə görüşlərə müstəqil QHT-lər dəvət olunmayıb. Biz dəvət alanda iştirak etməyi və öz mövqeyimizi hakimiyyətə bildirməyi qərara aldıq”, - Seçkilərin Monitorinqi və Demokratiyanın Tədrisi Mərkəzinin (SMDTM) rəhbəri Anar Məmmədli Turan-a bildirib.

Görüş zamanı A.Məmmədli  QHT-lərin fəaliyyəti üçün siyasi-hüquqi maneələrdən danışıb. Əsasən qeydiyyat probleminə, ölkə regionlarında QHT tədbirlərinin keçirilməsinə faktiki qadağa qoyulmasından danışılıb. 

A.Məmmədli görüş zamanı Ə.Həsənovun reaksiyasını və davranışını kifayət qədər açıq və konstruktiv adlandırıb. “Əgər təşəbbüsün real davamı olarsa, bu dialoqdan müsbət dəyişiklik gözləmək olar”, - o vurğulayıb.

“Azərbaycan naminə”  Forumun rəhbəri Eldar Namazov görüşdə iştirakdan imtina edib.  “Dialoq ideyası müsbətdir və biz hakimiyyətlə müxalifət, vətəndaş cəmiyyəti arasında dialoqa tərəfdar olduğumuzu dəfələrlə bildirmişik. Lakin bu cür dialoqda iştirak o halda mümkündür ki, hakimiyyət səmimi olsun, həqiqətən vətəndaş cəmiyyətini möhkəmləndirmək istəsin, bunu hansısa siyasi məqsədlərlə etməsin. Bu cür görüşlər əvvəllər də olub, lakin heç bir nəticə verməyib və vəziyyət daha da pisləşib”, - E.Namazov vurğulayıb.

Bu cür görüşlər hökumət və vətəndaş cəmiyyəti ilə birgə hazırlanmalıdır. Əvvəlcədən format, gündəlik, sonrakı mümkün  addımlar razılaşdırılmalıdır.

   Bundan əlavə, dialoqda yalnız Prezident Administrasi yasının nümayəndələri yox, həm də digər qurumların rəhbərləri iştirak etməlidir. “Ədliyyə Nazirliyinə, MSK, digər qurumlara suallar çoxdur”, - E.Namazov qeyd  edib.

O, QHT-nin siyasi qüvvələrin tərəfini saxlamaması barədə Ə.Həsənovun bəyanatını mənfi qiymətləndirib: “Bu, düzgün fikirdir, amma demokratik cəmiyyətlər üçün xarakterikdir. Seçkilər saxtalaşdırılanda QHT pozuntular barədə susa bilməz”.

Büdcə vəsaitləri və neft gəlirlərinin mənimsənilməsi aşkarlananda QHT susa bilməz. Hüquq müdafiəçilərinə və müstəqil mətbuata gəlincə, insan haqlarının pozulmasını, korrupsiyanı tənqid edərək istər-istəməz siyasiləşirlər və hakimiyyətin düşmənlərinə çevrilirlər, - E.Namazov  bildirib.

Sülh və Demokratiya İnstitutunun (SDİ) direktoru Leyla Yunus görüşə dəvət olunmayıb. Onun fikrincə, hakimiyyət Azərbaycan ətrafında mürəkkəb geosiyasi vəziyyətlə əlaqədar görüşə təşəbbüs göstərib. 

İran ətrafında vəziyyət gərginləşir, Putin Rusiyası da Bakıya yaxşı heç nə vəd etmir. Belə şəraitdə Azərbaycanda hakim rejimin mövqeyinin möhkəmləndirilməsi üçün Qərblə əməkdaşlıq vacibdir.

Lakin insan haqlarının pozulması ilə əlaqədar Qərbdən sərt tənqidlər hansısa addımları tələb edir və demokratikləşmə görüntüsü yaratmağa çalışır.

“Əgər hakimiyyət islahatlara başlamaq arzusunu imitasiya etmirsə, onda başlanğıc üçün AŞPA məruzəçisi Kristofer Ştrasserin siyahısındakı siyasi məhbuslar, həmçinin Hilal Məmmədov, Əvəz Zeynallı, İlham Əmiraslanov dərhal və şərtsiz olaraq azadlığa buraxılmalı, Oqtay Gülalıyev, Mehman Hüseynov və digər fəallara,  jurnalistlərə qarşı cinayət təqiblərinə son qoyulmalıdır, - L.Yunus bildirib.—06B-