Dostlar! Ölkəmizdə hər şey «Asan» olub

Dostlar! Ölkəmizdə hər şey “Asan” olub. Bu da “asan məhkəmə”. Başlanması ilə başa çatması bir oldu. Blogger Mehman Hüseynov məhkəmə zalında həbs edildi. Belə ildırım sürəti həbs ancaq “asan məhkəmədə” ola bilər. Mehmanı dünən jurnalist fəaliyyətinə görə 2005-ci ildə qətlə yetirilmiş Elmar Hüseynovun anım mərasimində gördüm. Əhvalı yaxşı idi. Məhkəməni vaxtını soruşdum. Xahiş etdi gəlməyim. Onsuz da gediləsi məhkəmə çoxdur. Ağır cinayətlər məhkəməsində keçirilən ikinci Nardaran prosesinə getdim. Telefonu bağlamışdım. Açanda Mehmanın həbs xəbərini aldım. Doğrusu, ölkəmizdə adamı təəccübləndirəcək daha bir şey qalmayıb. Hakimiyyət Mehmanı çoxdan gözaltı etmişdi. Onun “korrupsiya seriyaları” çoxlarının rahatlığını pozmuşdu. Bu seriyada göstəriləcək hələ çox yüksək vəzifəli məmur qalmışdı. Bunun qarşısını almaq üçün Mehman həbs edildi. Yuxarıların, korrupsiya piramidasının lap başında duranların göstərişi ilə “Asan məhkəmədə” 2 il müddətinə azadlıqdan məhrum edildi. Həbsini də gülə-gülə qarşıladı. Lap korrupsiya obyektlərin çəkdiyi kimi. Azad sözün özünəməxsus təmsilçisidir Mehman Hüseynov. Onun süjetləri, reportajları, yazıları xalq jurnalistikasının ən parlaq nümunələridir. Elə özü də xalq adamıdır və həbsi də bununla bağlıdır.


Cəmil Həsənli