Vətəndaş Cəmiyyətinin Hüquqlarını Müdafiə Komitəsinin 20 may Amnistiya Aktı ilə bağlı bəyanatı

AR Milli Məclisi mayın 20-də 28 May Respublika Gününə həsr olunmuş Amnistiya Aktı qəbul edib. Amnistiya 10 min məhkumu əhatə edəcək, bunun 3500 nəfəri həbsdən azad ediləcək.

Amnistiya təşəbbüsünü parlamentin deputatı, Heydər Əliyev Fondunun rəhbəri, UNESKO-nun xoşməramlı səfiri Mehriban Əliyeva irəli sürüb. Akt Azərbaycan Demokratik Respublikasının (ADR) yaranmasının 98-ci ildönümünə həsr olunub.

Аmnistiya təşəbbüsü və onun qəbulu faktı hörmətə layiqdir, çünki əvf olunanlara həbsxana divarlarından kənarda adi günlərə qayıtmaq imkanı verir. Amma Respublika Günü ərəfəsində 100-dən çox siyasi məhbusdan birinin belə azad olunmaması faktı böyük təəssüf hissi doğurur, çünki onlar hamısı Azərbaycan hakimiyyətinin unutdurduğu ADR ideallarını qoruyub saxlamağa çalışdıqlarına görə onları sınağa çəkən rejimin qurbanlarıdır.

Bu Amnistiya Aktı həm də Azərbaycanda ölkəni və cəmiyyəti dərin ictimai-siyasi və sosial-iqtisadi böhrana salmış siyasi rejimin vətəndaş azadlıqlarının və siyasi azadlıqların boğulmasına yönəlmiş yanlış və fəlakətli siyasətdən imtina etmək istəməməsinin və əvvəlki kimi vətəndaş cəmiyyəti və şəffaf hüquqi dövlət yaradılmasına qarşı çıxdığının daha bir sübutudur.

Tarixi və əxlaqi nöqteyi-nəzərdən etnik, dini və digər özünüifadə formasından asılı olmayaraq bütün Azərbaycan xalqının ən mühüm siyasi bayramı ərəfəsində bu amnistiya aktının qəbulu Şərqdə və müsəlman dünyasında ilk demokratik dövlətin banilərinin ruhuna, habelə onların davamçılarına, o cümlədən vətəndaş mövqelərinə və siyasi baxışlarına görə həbs edilənlərə qarşı hörmətsizlikdir.

Bu siyasət və öz keçmişinə və bugününə bu cür münasibət demokratik qüvvələr və ölkənin taleyinə biganə olmayan bütün sağlam düşünən vətəndaşlar tərəfindən qəbul edilə bilməz.

Bununla əlaqədar Vətəndaş Cəmiyyətini Müdafiə Komitəsi Amnistiya Aktı ilə razı olmadığını bildirir və hakimiyyəti:

bütün siyasi məhbusları azad etməyə;

siyasi və digər rəqiblərinin təqibinə son qoymağa;

siyasi və iqtisadi inhisar siyasətindən imtina etməyə;

ölkənin böhrandan çıxarılması və 98 il əvvəl ADR tərəfindən irəli sürülmüş, amma indiyədək həyata keçirilməmiş məqsəd və vəzifələrin həyata keçirilməsi məqsədilə cəmiyyətin bütün təbəqələri ilə geniş dialoqa başlamağa çağırır.

Bakı, 23.05.2016