AXCP sədrinin müavini: “Hakimiyyətlə müxalifətin dialoqu predmetli olmalıdır”

Bakı/03.09.20/Turan: İyulun 15-də keçirilən Qarabağ aksiyasından sonra 40-a yaxın AXCP fəalı heç bir əsas olmadan cinayət və inzibati məsuliyyətə cəlb edilib. 17 fəala saxta cinayət ittihamı irəli sürülüb. Bu barədə AXCP sədrinin müavini Seymur Həzi “Amerikanın səsi” radiosunun Azərbaycan xidmətinə müsahibəsində bildirib.

Orduya dəstək aksiyası ümumxalq aksiyası idi. AXCP-nin mövqeyi ondan ibarət idi ki, ordunu və dövləti dəstəkləmək lazımdır. Buna görə fəalların həbsi heç bir məntiqə sığmır”, - o qeyd edib.

AXCP siyasi mübarizəni dinc, demokratik və qanuni vasitələrlə aparır. Ona görə də AXCP fəallarının həbsinin yeganə səbəbi siyasidir, aparıcı müxalifət qüvvələri kimi AXCP-ni və Milli Şuranı məhv etmək cəhdidir.

Hakimiyyətin repressiyasına baxmayaraq, AXCP-ni darmadağın etmək mümkün olmayıb və partiya cəmiyyətdən getdikcə daha çox dəstək alır.

“Biz Azərbaycan xalqından kifayət qədər ciddi dəstək alırıq. Hesab edirəm ki, hökumət başa düşməlidir ki, bu həbslər hakimiyyətə yaxşı bir şey gətirməyib, o, heç bir şey qazanmayıb”, - S.Həzi qeyd edib.

S.Həzi aprelin 13-dən partiya lideri Əli Kərimliyə qarşı davam edən İnternet blokadasına diqqəti çəkib. Bundan əlavə, saat 20:00-dan səhərə qədər onun mobil telefonu kəsilir.

Bu tədbirlər Ə.Kərimlinin təcridinə, onun cəmiyyətlə təmaslarının məhdudlaşdırılmasına, mətbuatla ünsiyyətdən məhrum edilməsinə yönəlib. Hazırda karantin rejimi yumşaldılıb və Ə.Kərimlinin mənzilindən çıxmaq imkanı var. Lakin onun informasiya almaq və sərbəst yaymaq, on-line proqramlarda iştirak etmək imkanları məhduddur. “Əlbəttə ki, bu, Avropa Şurasının üzvü olan ölkədə siyasi partiya liderinə çox ciddi təzyiqdir”,- S.Həzi deyib.

AXCP-nin Prezident Administrasiyası ilə dialoqa münasibəti barədə sualın cavabında S.Həzi deyib ki, müzakirələr predmetli olmalı və konkret gündəliyə malik olmalıdır. Əsasən dialoqun predmeti insan hüquqları, toplaşma azadlığı, seçki islahatı, partiyaların fəaliyyəti üçün şərait ola bilər.

Hökumət bu mövzularda dialoqa hazırdırmı? S.Həzi bu suala cavabında deyib: “Dialoqa hazır olmaq həm də dialoqların nəticələrinə hazır olmaq deməkdir. Siyasi islahatların aparılması siyasi iradə olduqda mümkündür. İslahatlar ardıcıl, sistemli, planlı olmalıdır. Mən düşünmürəm ki, hakimiyyət tam olaraq buna hazırdır”.—16D-