«Gürcü arzusu» reallığa çevrilməyə can atır

Gürcüstanın seçkiöncəsi müxalifət siyasi koalisiyası «Gürcü arzusu» Kvemo-Kartlidə (Borçalı) – azərbaycanlıların kompakt yaşadığı bölgədə Mühafizəkarlar Partiyasının lideri, məşhur siyasi xadim Zviad Dzidziqurini öz kuratoru seçib.

Dzidziquri hesab edir ki, gələcək hakimiyyət üçün əsas vəzifə işsizlik və səhiyyə problemlərinin həlli, xarici siyasətdə isə Rusiya ilə münasibətlərin normallaşmasıdır.

 «Turan» agentliyinə müsahibəsində Dzidziquri oktyabrdakı parlament seçkiləri ərəfəsində koalisiyanın seçkiöncəsi kampaniyasının gedişi, «Gürcü arzusu»nun taktika və strategiyası barədə danışıb.  

 

Sual: Siz həmişə müxalifətdə olmusunuz – əvvəlcə Şevardnadze rejiminə qarşı, sonra Saakaşvinin parlament müxalifəti, daha sonra «Gürcü arzusu» koalisiyasına daxil olmusunuz. Yeni hərəkat çərçivəsində nəyə nail olmaq istəyirsiniz?

Cavab: Məşhur xeyriyyəçi və biznesmen Bidzina İvanişvili bir neçə ay qabaq - 2011-ci ilin oktyabrında müxalifətə keçdi. Aparıcı siyasi güclər onun ətrafına toplaşdı və «Gürcü arzusu» koalisiyası formalaşdı. Koalisiya bu payız hakimiyyətə gəlməyə hazırdır.

Regional cəhətdən koalisiyanın taktikası bundan ibarətdir: hər bir siyasi lider bir regiona cavabdehdir, bu isə özünəməxsus siyasi kuratorluqdur. Siyasi kuratorluq taktikası ilə Gürcüstan vətəndaşlarının aktivliyini artırmaq və seçkilərdə daha çox səs toplamaq istəyirik. Koalisiya təkcə parlament çoxluğu yox, həm də icra hakimiyyəti olmaq istəyir.

Siyasi cəhətdən diqqətdən tamamilə kənarda qalan Kvemo-Kartli regionuna məni göndərmək qərara alındı. Siyasi müxalifət Kvemo-Kartlidə əhalinin problemlərini həll etməyə kömək edəcək proqramları tam aktivləşdirməlidir. Bu regionun əhalisi diqqətdən kənarda qalıb. Hökumət neçə illərdir buradakı insanları aldadır. İnsanlar torpaqsızlıqdan, su problemi, bahalı elektrik enerjisi tarifləri, vergi, yolların pis olmasından əziyyət çəkir. Kənd təsərrüfatında da çoxlu problemlər var.

Xatırladım ki, Kvemo-Kartli ən zəngin kənd təsərrüfatı regionlarındandır. Bir çox yerlərdə, məsələn, Marneulidə, Bolnisidə ildə iki dəfə məhsul yığılır. Amma burada əhali kasıbdır. Bu gün azərbaycanlıların yaşadığı kəndləri gəzərkən şahidi oldum ki, qışda olduğu kimi yayda da mal-qara tövləyə salınır. Kəndlərin çoxunda vəziyyət belədir.

Biz elə ölkə qurmaq istəyirik ki, etnik cəhətdən yox, dövlət mənasında milli olsun.

Elə bir Gürcüstan arzu edirəm ki, orada azərbaycanlılar, ruslar, gürcülər və başqa xalqlar Gürcüstan siyasi məkanına inteqrasiya olunsun, ölkənin birləşməsi və xilasında bərabər hüquqla iştirak etsinlər.

Demokratik strukturlar, məhkəmələr, parlament, mətbuat, biznes azadlığı bütün Gürcüstanı narahat edən məsələlərdir. Nə qədər ki, dövlət başçısı Saakaşvilidir, bunlar ölkənin inkişafına əngəl olacaq. O, PR ustasıdır, beynəlxalq arenada saxta imici yaradılıb. Guya böyük demokratdır, əslində Saakaşvili əhalinin 80%-i işsiz, sosial fon çox aşağı olan ölkədə tipik avtokratdır. Büdcə vəsaitləri çox vaxt onun dəbdəbəli tədbirlərinin keçirilməsinə xərclənir. Milyon və milyardlarla vəsait xalqa heç bir faydası dəyməyən, Sakaşvilinin PR-a xidmət edən tədbirlərə xərclənir. Bahalı otellər, konsertlər, dekorativ tikintilər hamısı Saakaşvilinin əyləncə predmetidir. Bu gün öz xalqı ilə maraqlanmaq əvəzinə o, tamaşalar göstərir. Bütün bunları dəyişməli, etnik mənsubiyyətindən asılı olmayaraq, Gürcüstan əhalisini narahat edən problemləri həll etməliyik. Bu problemlər əsasən, kənd təsərrüfatı, təhsil və səhiyyə sahəsindədir. Bizim siyasi koalisiya öz proqramının çox hissəsini dərc edib və o, əhalinin çox hissəsinə gerçəkdən kömək edəcək.

 

Sual: Sizin mitinqlərdə Gürcüstanın ağ-qırmızı bayraqları ilə yanaşı, koalisiyanın göy bayrağı, NATO və Avropa İttifaqının bayrağı üstünlük təşkil edir. Amma sizi Rusiyayönlü qüvvə adlandırırlar.

Cavab: Koalisiyanın əsas istiqaməti NATO və Avrostrukturlara inteqrasiya, eyni zamanda, Rusiya ilə münasibətlərin normallaşmasıdır.  Əgər normal ölkə olmaq istəyiriksə, qonşu ölkə ilə münasibətləri düzəltmək hava və su kimi lazımdır. Bu gün Rusiya-Gürcüstan münasibətlərində olan gərginlik Gürcüstan üçün çox dağıdıcı təsirə malikdir. Ona görə koalisiyanın əsas vəzifələrindən biri bu ölkə ilə münasibətlərin qaydaya salınmasıdır. Amma xarici siyasətdə əsas oriyentirimiz Avrostrukturlar və Avropaya inteqrasiyada aktiv iştirakdır.

 

Sual: Siz və Gürcüstan müxalifətinin başqa nümayəndələri bu il iki ölkənin elitası arasında dialoq qurmaq üçün Moskvada olmusunuz. Həmçinin deyirsiniz ki, gürcülərin 80 faizdən çoxu Rusiya ilə münasibətlərin yaxşılaşdırılmasını istəyir. Gerçəkdən belədir?

Cavab: Rusiya-Gürcüstan münasibətlərinin qaydaya salınmasına Gürcüstan əhalisinin çoxu dəstək verir. Bizm üçün bu, xalqın tələbi, hətta əmridir və onu yerinə yetirmək lazımdır. Bu istiqamətdə addım atacağıq və liderimiz Bidzina İvanişvili bunu dəfələrlə deyib.

 

Sual: Partiyanızın millətçi olduğunu deyirlər. Bunu necə anlamalı?

Cavab: Partiyamız milli partiyadır, amma etnik milli partiya deyil. Biz dövlət millətçiliyinin tərəfdarıyıq. Bunu belə başa düşürük ki, etnik mənsubiyyətindən asılı olmayaraq, hər bir vətəndaş bütün dövlət strukturları, biznes, mədəni sahə və s.-də inteqrasiya olunmalıdır. Bunun üçün dövlət öz yaxşı münasibətini təsbit etməli və etnik mənsubiyyətindən asılı olmayaraq, hər bir vətəndaşın qayğısına qalmalıdır.

 

Sual: Kvemo-Kartlidən seçilmək istəyirsiniz. Buranın əhalisinə hansı gələcəyi vəd edirsiniz?

Cavab: Mən Kvemo-Kartlidə fəaliyyətə başlayandan «Gürcü arzusu»nun bəyannaməsini müxtəlif dillərə, o cümlədən Azərbaycan dilinə tərcümə etməyə başladıq. Bu, doğrudur, çünki azərbaycanlı əhalini öz doğma dilində məqsəd və vəzifələrimizlə tanış edirik. Mən sizə bu müsahibəni verəndə işçi çoxtirajlı koalisiya qəzeti «Gürcü arzusu»nu azərbaycanca çapa hazırlayır. Məqsəd platformamızı aydın və operativ şəkildə azərbaycanlılara çatdırmaqdır. Düşünürəm ki, azərbaycanlı qardaşlar və başqa etnik qruplarla ölkəmizi birgə qurmalıyıq.

Hazırda Kvemo-Kartlidəyəm. Bidzina İvanişvilinin koalisiyası mənə tapırıb ki, yerli əhalini narahat edən problemləri pasportlaşdırım. Bu işin nəticəsi koalisiyaya təqdim ediləcək və problemlərin həlli yolunu müzakirə edəcəyik. Azərbaycan kəndlərinin problemlərinin öyrənilməsinə daha çox diqqət ayıracağıq, çünki gürcü kəndlərinin problemləri ilə az-çox tanışıq. Qeyd edim ki, bizim siyasi müxalifətin əvvəllər Kvemo-Kartlidə işləmək imkanı olmayıb. Bunun subyektiv və obyektiv səbəbləri var. Obyektiv səbəb odur ki, region dil baryeri, məhdud maliyyə imkanları, insan resursları nöqteyi-nəzərdən çətin əl çatandır. Bu gün Bidzina İvanişvilinin siyasi səhnəyə gəlişi ilə bağlı bu resurslar var. Kvemo-Kartlinin və başqa regionların problemlərini öyrənməyə və həll yollarını axtarmağa hazırlaşırıq.

 

Sual: İyunun əvvəlində demişdiniz ki, Bidzina İvanişvili hətta konstitusiyaya dəyişikliklərdən istifadə etmədən baş nazir olacaq. Qələbəyə bu cür inam sizdə hardandır?

Cavab: Əgər Gürcüstanda hadisələrin inkişafını kənardan izləsəniz,  görərsiniz ki, Tbilisidə mitinqlərdə 200 000 min, Kutaisidə 55 000, Quriyada  110 000 seçici Bidzina İvanişviliyə dəstək verir. Praktik olaraq, seçicilərin üçdə biri Bidzina İvanişvilini müdafiə edir. Bütün ölkə üzrə vəziyyətin bu cür olması inanmağa əsas verir ki, ölkə əhalisinin çoxu siyasi müxalifətin lideri Bidzina İvanişvilinin tərəfindədir. Əminəm ki, o, baş nazir olacaq. Ona görə ölkədəki vəziyyəti diqqətlə öyrənir, ona məlumat veririk ki, hakimiyyətə gələndən sonra operativ olaraq cəmiyyəti narahat edən birinci dərəcəli problemlərin həllinə başlasın.

Yekunda bu müsahibəni oxuyan hər kəsə uğurlar arzulayır, bir daha demək istəyirəm ki, daim Azərbaycan-Gürcüstan dostluğunu daha da gücləndirəcək məsələlər üzərində işləyirik. Məncə, Azərbaycanla Gürcüstan arasında dostluq, qardaşlıq münasibətlərinin olması dövlətlətimizin marağındadır. Əminliklə demək istıərdim ki, «Gürcü arzusu» koalisiyası hakimiyyətə gələndən sonra dostluq münasibətlərimiz daha da dərinləşəcək.

 

 

/docs/2012/beyanname deklaracia Azerbaicanulad 2 1.rtf

/docs/2012/Bidzina Ivanishvilinin muraciyeti.rtf

 

Rəy yaz

Sual-cavab

Чего ждать после потери Авдеевки? - беседа с военно-политическим экспертом Олександром Мусиенко в "Çətin sual"



InvestPro Azerbaijan Baku & Turkiye Istanbul 2024 – two conferences in one shot


Əziz Bakı şəhəri sakini!

Siz də Qlobal İqlim Dəyişmələri ilə mübarizəyə öz töhfənizi verə bilərsiniz

Dear resident of Baku city!

You too can contribute to the fight against Global Climate Change

Дорогой житель города Баку!

Вы тоже можете внести свой вклад в борьбу с глобальным изменением климата

Bizi sosial şəbəkələrdə izləyin

Xəbər lenti