Leyla Yunus: NİDA fəallarının cəsarəti ilə qürur duymaq lazımdır

NİDA fəalları barəsində prokurorluq müstəntiqləri, o cümlədən İbrahim Ləmbəranski tərəfindən saxtalaşdırılmış cinayət işi üzrə çıxarılmış həddindən artıq amansız hökm Azərbaycanda sərt avtoritar rejimin mövcudluğunun növbəti sübutudur. Bu barədə Turan-ın müxbiri ilə söhbətində Sülh və Demokratiya İnstitutunun direktoru, hüquq müdafiəçisi Leyla Yunus dünənki məhkəmə hökmünü şərh edərkən bildirib.

“Sovet dövründə mən “Bolşeviklərin əsarəti altına alınmış milli azlıqlar hərəkatı”nın üzvü idim və Ukrayna, Estoniya, Litva və digər ölkələrin Azadlıq Hərəkatlarının nümayəndələri ilə gizli görüşlərdə iştirak edirdim. 15-20 ilə qədər düşərgələrdə saxlanılmış bu insanları yaxşı xatırlayıram. Onların cəsarəti məni hər zaman qürurlandırırdı. Bu gün bu gənclərdə azadlıq uğrunda mübarizədə həmin cəsarəti və yenilməz iradəni görürəm.

Bu uşaqlar Stalin dövründə olduğu kimi, uzunmüddətli həbs cəzalarına məhkum ediliblər.

Azərbaycanda belə oğlanlar olması ilə qürur duyuram. Qələbə onların olacaq. Onların valideynlərinə can sağlığı arzulayıram, onlar öz oğulları ilə fəxr etməlidirlər, biz hamımız onlarla qürur duymalıyıq”, deyə Leyla Yunus qeyd edib.

O, həmçinin əlavə edib ki, məhkəmə qarşısında toplaşmış gənclərin amansız şəkildə dağıdılması zamanı polisin hərəkətləri yetişməkdə olan gənc nəsil qarşısında hakimiyyəti bürümüş dəhşətli panikanın aydın sübutudur.

Gənc qızları və oğlanları döyən polis bütün qanun, əxlaq və mənəviyyat normalarını pozur, bu, şərəfsiz və vicdansız insanlardır, Leyla Yunus belə hesab edir. -04В-