Məhkəmə icmalı: 22-24 iyun 2026-cı il

Siyasətçilər, vətəndaş cəmiyyəti nümayəndələri və jurnalistlərin məhkəmə prosesləri

1. İyunun 22-də Bakı Ağır Cinayətlər Məhkəməsində hakim Azər Tağıyevin sədrliyi ilə "Toplum TV işi" üzrə baş tutmalı olan məhkəmə prosesi təxirə salınıb.

Təqsirləndirilən şəxslər dövlət ittihamçısının etdiyi çıxışın mətni ilə tanış olmadığını bildiriblər.

Demokratik Təşəbbüslər İnstitutunun rəhbəri və III Respublika Platformasının spikeri Akif Qurbanov bildirib ki, təqsirləndirilən şəxslərin öz müdafiələrini qura bilmələri üçün prokurorun çıxışı ilə tanış olmaq hüquqları var.

Hakim isə bildirib ki, prosesual qaydalara görə buna ehtiyac yoxdur. Daha sonra isə hakim və Qurbanov arasında mübahisə düşdüyünə görə iclas təxirə salınıb.

Növbəti iclas iyunun 29-a təyin edilib.

2. “Regionxeber” saytının rəhbəri Fuad Hüseynov həbs edilib.

Məlumata görə, o hədə-qorxu ilə pul tələb etmədə ittiham olunur.

F.Hüseynov barəsində məhkəmə qərarı ilə həbs qətimkan tədbiri seçilib.

Korrupsiya və dövlət orqanları ilə bağlı məhkəmə prosesləri

1. İyunun 22-də Sumqayıt Ağır Cinayətlər Məhkəməsində Xocavənd rayon Əmirallar kənd tam orta məktəbinin direktoru Mərkəz Hüseynova hökm oxunub.

O, 2023-cü ilədək ümumilikdə 71 301 manat vəsaitin mənimsəməkdə ittiham olunub.

İttihama görə, məktəb direktoru işə çıxmayan müəllimlərin əməkhaqqı kartlarını özündə saxlayıb və onlara ödənilən pulları nağdlaşdıraraq özünə götürüb. Bundan sonra M.Hüseynov evdə təhsilə cəlb edilən müəllimlərə ödənilən vəsaiti də mənimsəyib.

M.Hüseynova Cinayət Məcəlləsinin 178.3.2 və 313-cü (külli miqdarda mənimsəmə və vəzifə saxtakarlığı) maddələri ilə ittiham irəli sürülüb.

Məhkəmə nu qeyd edilən maddələr üzrə təqsirli bilib. İşdən çıxarılan direktora sınaq müddəti təyin edilməklə şərti cəza verilib.

2. İyunun 22-də Nəsimi Rayon Məhkəməsində rüşvət almaq ittihamı ilə həbsdə olan Bərdə Rayon Məhkəməsinin sabiq hakimi Elsun Əhmədovla bağlı digər cinayət işi üzrə məhkəmə prosesi yekunlaşıb.

Hökmə əsasən, Elsun Əhmədov 5 il 6 ay müddətinə azadlıqdan məhrum edilib.

Elsun Əhmədov Cinayət Məcəlləsinin 178.2.2-ci (Dələduzluq, təkrar törədildikdə) maddəsi ilə ittiham edilib.

3. İyunun 22-də Bakı Ağır Cinayətlər Məhkəməsində hakim Elnur Nuriyevin sədrliyi ilə Azərbaycan Auditorlar Palatasının Maliyyə və texniki təminat idarəsinin sabiq rəisi Vəli Rəhimov, maliyyəçi-mühasib Gövhər Əhmədova və auditor Fəridə Novruzovanın cinayət işi üzrə məhkəmə prosesi keçirilib.

İclasda təqsirləndirilən şəxslərin vəkilləri çıxış ediblər. Təqsirləndirilən Fəridə Novruzovanın vəkili hüquqlarını müdafiə etdiyi şəxsin dəymiş ziyandan 6000 manat ödədiyini və 5 aylıq hamilə olmasının nəzərə alınmasını məhkəmədən xahiş edib.

Növbəti iclas 6 iyula təyin edilib.

Auditorlar Palatasının Maliyyə Təminatı və Xarici Əlaqələr İdarəsinin sabiq rəisi Vəli Rəhimov, həmin idarənin maliyyəçi-mühasibi Gövhər Əhmədova və Maliyyə və Təşkilati-Texniki Təminat İdarəsinin mühasibi Fəridə Novruzova Azərbaycan Respublikası Cinayət Məcəlləsinin 179.4-cü (mənimsəmə və ya israf etmə), 308.2-ci (vəzifə səlahiyyətlərindən sui-istifadə) və 313-cü (vəzifə saxtakarlığı) maddələri ilə ittiham olunurlar.

Cinayət işi üzrə zərərçəkmiş qismində Azərbaycan Respublikası Auditorlar Palatası tanınıb.

Təqsirləndirilən şəxslər ümumilikdə 717 min 311 manat məbləğin nağdlaşdırılaraq mənimsəməkdə ittiham olunur.

4. İyunun 22-də Bakı Ağır Cinayətlər Məhkəməsində külli miqdarda qeydiyyatsız dərman vasitələrinin və digər malların qaçaqmalçılıq yolu ilə Azərbaycana gətirilməsi ilə bağlı cinayət işi üzrə hökm elan edilib.

İttihama görə, Azərbaycan və Türkiyə vətəndaşları əvvəlcədən əlbir olaraq ölkəyə dövlət qeydiyyatından keçməmiş dərman preparatlarını, tibbi ləvazimatları, kosmetik vasitələri və digər məhsulları qanunsuz şəkildə keçirməyə cəhd ediblər.

İş materiallarına əsasən, qaçaqmalçılıq yolu ilə Türkiyədən Azərbaycana gətirilməsinə cəhd göstərilən malların ümumi dəyəri 131 min 636 manat 80 qəpik təşkil edib.

Məhkəmə iki təqsirləndirilən şəxsi Cinayət Məcəlləsinin 200-1.2.2, 200-1.2.3 və 206.3.2-ci maddələri ilə təqsirli bilib.

Hökmə əsasən, Azərbaycan vətəndaşına qeyd olunan maddələr üzrə azadlıqdan məhrumetmə cəzası təyin edilib. Lakin onun ilk dəfə cinayət məsuliyyətinə cəlb olunması, səmimi peşman olması, ailədə yeganə qazanc gətirən şəxs olması və digər yüngülləşdirici hallar nəzərə alınaraq Cinayət Məcəlləsinin 70-ci maddəsi tətbiq edilib və cəzanın şərti çəkilməsi qərara alınıb.

Türkiyə vətəndaşına münasibətdə isə məhkəmə Cinayət Məcəlləsinin 62-ci maddəsini tətbiq edərək qanunda nəzərdə tutulandan daha yüngül cəza təyin edib. Ona Cinayət Məcəlləsinin 200-1.2.2 və 200-1.2.3-cü maddələri ilə 4 min manat, 206.3.2-ci maddəsi ilə isə 7 min manat cərimə təyin olunub. Cinayətlərin məcmusu üzrə qəti cəza əvvəlcə 11 min manat müəyyən edilsə də, onun 2 gün həbsdə saxlanılması nəzərə alınaraq Cinayət Məcəlləsinin 69.4-cü maddəsinə əsasən cərimə 10 min manata endirilib.

Separatçıların məhkəmə prosesi

1. İyunun 23-də Bakı Apellyasiya Məhkəməsində Ermənistan vətəndaşları Arayik Harutyunyan, Arkadi Qukasyan, Bako Sahakyan, Davit İşxanyan, David Babayan, Levon Mnatsakanyan və digərlərinin apellyasiya şikayətləri üzrə məhkəmə baxışı davam etdirilib.

Hakimlər Elmar Rəhimovun sədrliyi, Emin Mehdiyev və Mehriban Qarayevanın iştirakı ilə keçirilən məhkəmə iclasında müdafiə çıxışını davam etdirmək üçün söz təqsirləndirilən Levon Mnatsakanyana verilib. O, bir həftə əvvəl keçirilmiş məhkəmə iclasında başladığı müdafiə çıxışını davam etdirərək fikirlərini səsləndirib. L.Mnatsakanyan ittiham tərəfinin təqdim etdiyi videomaterialın və istinad etdiyi faktların məhkəmə tərəfindən qərar qəbul edilərkən nəzərə alınmasını xahiş edib. O, özünə qarşı irəli sürülmüş ittihamlar üzrə özünü təqsirli bilmədiyini qeyd edib.

Daha sonra təqsirləndirilən Erik Qazaryanın hüquqlarını qoruyan vəkili çıxış edib. Vəkil müdafiə etdiyi şəxsin apellyasiya şikayəti verdiyini və həmin şikayəti dəstəklədiyini bildirib. Ardınca çıxış edən Erik Qazaryan özünü təqsirli hesab etmədiyini qeyd edib və müdafiəçisinin səsləndirdiyi mövqeyi təsdiqləyib.

Sonra təqsirləndirilən Qarik Martirosyanın vəkili çıxış edərək bildirib ki, müdafiə etdiyi şəxsə qarşı irəli sürülmüş ittihamların yüngülləşdirilməsi zəruridir.

Onun digər müdafiəçisi də çıxışında təqsirləndirilən Q.Martirosyanın cəzasının yüngülləşdirilməsini və bəzi maddələrin ittihamdan xaric olunmasını xahiş edib.

Sonra təqsirləndirilən Qarik Martirosyan çıxış edib. O, özünü təqsirli bilmədiyini bildirib.

Təqsirləndirilən Levon Balayanın vəkili hüquqlarını qoruduğu şəxsin barəsində bəraət hökmünün çıxarılmasını məhkəmədən xahiş edib.

Təqsirləndirilən Levon Balayan müdafiəçisinin çıxışı ilə razılaşdığını deyib.

Təqsirləndirilən Qurgen Stepanyanın hüquqlarını müdafiə edən vəkili onun barəsində olan ittiham hökmünün ləğv olunmasını və bəraət hökmünün çıxarılmasını məhkəmədən xahiş edib. Qurgen Stepanyan müdafiəçisinin çıxışı ilə razılaşdığını bildirərək özünü təqsirli bilmədiyini qeyd edib.

Məhkəmənin növbəti iclası iyunun 30-da keçiriləcək.

Bakı Hərbi Məhkəməsinin 5 fevral 2026-cı il tarixli hökmünə əsasən, Arayik Harutyunyan, Levon Mnatsakanyan, David Manukyan, Davit İşxanyan və David Babayan ömürlük azadlıqdan məhrumetmə cəzasına məhkum ediliblər. Arkadi Qukasyan və Bako Sahakyan 20 il, Madat Babayan və Melikset Paşayan 19 il, Qarik Martirosyan 18 il, Davit Allahverdiyan və Levon Balayan 16 il, Vasili Beqlaryan, Qurgen Stepanyan və Erik Qazaryan isə 15 il müddətinə azadlıqdan məhrum ediliblər.

Onlar Ermənistanın Azərbaycana qarşı hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, terrorçuluq, terrorçuluğu maliyyələşdirmə, hakimiyyəti zorla ələ keçirmə və digər çoxsaylı cinayətlərdə təqsirli biliniblər.

Then defendant Garik Martirosyan spoke. He said he did not plead guilty.