Ermənistan itkin düşənlərə dair məlumat mübadiləsini təklif edir

Əgər Ermənistan həqiqətən beynəlxalq hüquq normalarına sadiqdirsə o zaman erməni təcavüzü nəticəsində itkin düşmüş 4 mindən çox Azərbaycan vətəndaşının taleyinə aydınlıq gətirməlidir.

Bu barədə Azərbaycan XİN rəsmi nümayəndəsi Hikmət Hacızadə Ermənistanın itkin düşənlərlə bağlı məlumat mübadiləsi məsələsində əməkdaşlığa hazır olması barədə bu ölkənin müdafiə nazirinin müavini David Tonoyanın bəyanatını Turan-a şərh edərkən bildirib.

Fevralın 4-də Tonoyan Beynəlxalq Qırmızı Xaç Komitəsinin Ermənistandakı nümayəndə heyətinin rəhbəri Sara Epprext ilə görüşündə bildirib ki, Ermənistanın Müdafiə Nazirliyi itkin düşənlərlə bağlı məlumat mübadiləsi məsələsində Azərbaycanla əməkdaşlığa hazırdır.

Hərbi Əsirlər, Girovlar və İtkin Düşənlər üzrə Dövlət Komitəsindən məsələ ilə bağlı şərh almaq mümkün olmayıb.

Beynəlxalq Qırmızı Xaç Komitəsinin Bakı ofisində Qarabağ münaqişəsi nəticəsində itkin düşmüş 3700 nəfərin barəsində məlumat qeydə alınıb.

BQXK Bakı nümayəndəliyinin ictimaiyyətlə əlaqələr şöbəsinin  rəhbəri İlahə Hüseynova Turan-a bildirib ki, onların məlumatına görə, münaqişə nəticəsində itkin düşənlərin sayı 4500 nəfərdir. Bu rəqəmdən 800 nəfər erməni tərəfdəndir (BQXK Yerevan ofisində 400 nəfər, təxminən bu qədər də Dağlıq Qarabağda qeydiyyata alınıb).–06D-