Məhkəmə "Kanal-11" rəhbərinin vəkilinin vəsatətlərini təmin etməyib

Noyarın 4-də Bakı Ağır Cinayətlər Məhkəməsində "Kanal-11" YouTube resursunun rəhbəri Teymur Kərimovun işi üzrə proses davam edib.

İclasda vəkil Nemət Kərimli 3 vəsatətlə çıxış edib. Müdafiə tərəfi xüsusən zərərçəkmiş Fərrux Ələkbərovun yenidən dindirilməsi haqqında vəsatət qaldırıb.

Kərimli bildirib ki, bundan əvvəl zərərçəkmiş şəxs əvvəlcə vəkilin və təqsirləndirilən şəxsin suallarına cavab verməkdən nümayişkaranə şəkildə imtina edib, müdafiə tərəfin etirazlarından sonra isə hakimin "təlqini" ilə hal və şərtləri "xatırlamadığına" istinad etməyə başlayıb.

Bununla əlaqədar olaraq vəkil zərərçəkmişin həqiqətən yaddaaş problemlərinin olub-olmadığını yoxlamaq üçün məhkəmə-tibb ekspertizası keçirilməsi barədə vəsatət qaldırıb.

Daha bir vəsatət qanunun tələbləri pozulmaqla hazırlanan bir sıra sənədlərin iş materiallarından çıxarılması zərurəti ilə bağlı olub.

Lakin məhkəmə heç bir vəsatəti təmin etməyib və növbəti iclası noyabrın 25-nə təyin edib.

* Teymur Kərimov 2023-cü ilin dekabrında CM-in 182.2.2 (hədə-qorxu yolu ilə tələb etmə, təkrar törədildikdə), 182.2.4 (hədə-qorxu ilə tələb etmə,  xeyli miqdarda əmlak əldə etmək məqsədi ilə törədildikdə) və 182.2.1-ci (hədə-qorxu yolu ilə tələb etmə, qabaqcadan əlbir olan bir qrup şəxs tərəfindən törədildikdə) maddələri ilə ittiham edilərək həbs olunub. Hüquq müdafiəçiləri onu siyasi məhbus kimi tanıyıblar.