MSK daha bir neçə dairədə nəticələri yoxlanılması üçün DSK-lara göndərib (yenilənib)

Bakı/17.02.20/Turan: Fevralın 17-də MSK-nın iclasında daha bir neçə dairədə: 86 saylı İsmayıllı, 66 saylı Biləsuvar, 10 saylı Binəqədi üçüncü, 9 saylı Binəqədi ikinci seçki dairələrində saxtalaşdırmalar haqqında şikayətlərin yoxlanılması üçün DSK-lara göndərilməsi haqqında qərar qəbul edib.

Bütün hallarda namizədlərin şikayətləri səsvermə nəticələrini saxtalaşdırdığını düşündükləri şəxslərə göndərilib. -02D-

*   *   *

2020 Fevral 17 (Bazar ertəsi) 18:01:30

MSK daha 5 dairədən şikayətləri baxılması üçün DSK-lara göndərib

Bakı/17.02.20/Turan: MSK 42 saylı Sumqayıt ikinci seçki dairəsi, 46 saylı Şirvan seçki dairəsi və 88 saylı Göyçay seçki dairəsi üzrə parlament seçkilərindən verilmiş şikayətlərin baxılması üçün müvafiq dairə seçki komissiyalarına (DSK) göndərilməsi haqqında qərar qəbul edib.

Bu dairələr üzrə sonuncu çağırış parlamentin deputatları, Yeni Azərbaycan Partiyasının üzvü Tahir Mirkişili, bitərəf deputatlığa namizəd İltizam Yusifov və ötən üç çağırış parlamentin deputatı, Vətəndaş Birliyi Partiyasının sədri Sabir Hacıyev liderlik edir.

Həmçinin, MSK 12 saylı Qaradağ-Binəqədi və 51 saylı Qusar seçki dairələrində səsvermənin yekunlarından namizədlərin şikayətlərini yoxlanılması üçün DSK-lara göndərilib.

Eyni zamanda, MSK 34 saylı Xətai İkinci seçki dairəsinin 7 məntəqəsində (bu dairədə ümumilikdə 35 məntəqə var) səsvermənin yekunlarını ləğv edib.

Xatırladaq ki, bundan əvvəl MSK 13 dairədə seçkilərin saxtalaşdırılması haqqında şikayətləri DSK-lara göndərib. Buna qədər MSK 4 dairədə seçkilərin nəticələrini ləğv edib. -06D-