Kompas həlledici faktorun üzərində durarkən

Hər keçən gün Türkiyəni parlament/prezident seçkilərinə yaxınlaşdırarkən iqtidar blokunun k n kiçikdən böyük ortağı (parlamentdə 1 millət vəkiliylə təmsil edilən Böyük Birlik Partiyasından əvvəlki) Milliyyətçi Hərəkat Partiyası aqressivliyini artırır.

Partiyanın gənclik təşkilatının keçmiş sədri olmuş  bir elm  adamının dekabrın 30-da qətlə yetirilməsinin yaratdığı çalxantılar güclənib MHP-nin minlərlə üzvünün istefasını özüylə gətirib-gələrkən bu tablonun iqtidar blokunun böyük ortağına da problemlər yaratdığını AKP  idarəçilərinin özləri etiraf edirlər: Mərkəzi  Qərar və İcra Şurasının üzvü Orhan Miroğlunun “Şərq və Cənubi  Şərq bölgələrindəki seçicilərimiz bəzən MHP ilə qurduğumuz ittifaqdan narazılıq edir” - sözləri bunun əks-sədasıdır. Keçən ilin payızında AKP lideri və dövlət başçısı Erdoğanın dalbadal həmlələrlə partiyasının reytinqini yüksəltməyə çalışması müəyyən nəticələrin əldə edilməsinə səbəb olsa da ilin əvvəlindən bəri Erdoğanın da gözləmə mövqeyinə keçdiyi müşahidə edilir. Bunun əsas səbəbi müxalif blokun öz namizədini hələ də açıqlamamasıdır.

Yüksək Seçki Şurası üzvlərinə `axmaq` dediyi iddiasıyla İstanbulun bələdiyyə sədri Ekrem İmamoğluna verilən həbs və siyasi yasaq cəzasının tam qətiləşməsi üçün Appelayasiya məhkəməsi və Ali məhkəmə mərhələlərini gözləmədən müfəttiş raportlarını ortaya tökən hökumətin bu sahədə də müəyyən qədər ləng və tərəddüd içində hərəkət etdiyi görünür.

Bunu fürsət bilən İmamoğlu cəbhəsi isə `xalq iradəsi və hüququn üstünlüyü` prinsipindən hərəkət edərək İstanbulun küçələrini “Xalqın seçdiyi siyasətçini vəzifədən xalq uzaqlaşdıra bilər” - şüarlarıyla “bəzəyirlər”. Müxalif blokun indiyə qədər prezidentliyə öz namizədinin adını açıqlamamasının  əsas səbəbi seçki tarixinin dəqiqləşməməsidir.

Bununla bağlı təşəbbüs iqtidar blokunda olduğu halda  AKP-nin bəzi idarəçiləri 14 maya, MHP lideri Devlet Bahçeli 18 iyuna işarə edərkən dövlət başçısı Erdoğanın  “5 ay sonraya” işarə etməsi seçki tarixiylə bağlı AKP-MHP-BBP koalisiyasında da hələ qəti qərar qəbul edilmədiyini göstərir.

Belə olan halda müxalif blokun hələ keçən ilin payızında “Apreldən əvvəl keçiriləcək erkən seçki qərarına dəstək verərik” - sözü də tədavüldən qalxmışdır. Seçkinin 14 mayda keçirilməsinə dair iqtidar blokunun   parlamentə qanun təklifi  gətirib müxalif blokun manevrini test etməsi ehtimal daxilində olsa belə, parlamentdən belə bir qərarın çıxacağını gözləməmək lazımdır.

Müxalif blokun öz içindəki ziqzaqlar da prezidentliyə müştərək namizədin adının açıqlanmasına mane olan başqa bir faktordur. İçəridən gələn məlumatlara görə, İYİ Partiyanın sədri Meral Akşener prezidentliyə vahid namizəd üçün Ekrem İmamoğlunun üzərində təkid edərkən ana müxalifətdəki Cümhuriyyət Xalq Partiyası (CHP) öz lideri Kemal Kılıçdaroğlunun arxasında dağ kimi dayanıb.

Keçmiş baş nazir Ahmet Davutoğlu partiyasının təxminən 1%-lik reytinqi ilə idarəçilikdə indidən böyük imtiyazlar istəyərkən, 2%-lik reytinqə malik olan DEVA sədri Ali Babacan isə ölkə konstitusiyasının `qırmızı xətləri`ni indidən tapdamağa başlayıb. Yəni,bir seçki ittifaqı kimi formalaşdırılmağa çalışılan Millət İttifaqı əslində hələ formalaşma prosesini başa çatdıra bilməməyin sıxıntılarını yaşayır.

Ancaq işin diqqəti xüsusilə cəlb edən tərəfi budur ki, iqtidar bloku da müxalif blokun bu zəif nöqtələrinə ciddi həmlələr edib durumu öz lehinə çevirməkdə acizlik nümayiş etdirir. Bunun əsas səbəbi atılan bütün içi dolu və ya içi boş addımlara baxmayaraq,iqtisadiyyatda radikal dəyişikliklərə nail oluna bilinməməsidir:milli  valyutanın məzzənnəsi  təzyiqlər bahasına müəyyən dərəcədə  sabit  saxlanıldığı  halda inflyasiyanı aşağı salmaq heç cür mümkün olmur. Bu durumda partiyasından asılı olmayaraq,vətəndaşları razı salmaq qeyri-mümkün hala gəldiyinə görə,ictimai rəy sorğularının nəticələrində də iqtidar blokunun sıçrayışı müşahidə olunmur.

Buna görə də  iş dönüb-dolaşıb kürd mənşəli vətəndaşların siyasi tərcihlərinin üstünə gəlir. İki blok da bu istiqamətdə radikal addımlar atmağa tərəddüd edərkən müxalif blokun nisbətən arxayın davrandığı müşahidə edilir. Çünki kürd təmayüllü HDP-nin idarəçilərinin açıqlamalarından hiss edildiyi  kimi, bundan sonra mərhələdə iqtidar bloku ilə hər hansı ittifaqdan söhbət gedə bilməyəcəyi kimi, müxalif blokla açıq və ya gizli anlaşma qapıları həmişə açıq saxlanacaqdır.

Kemal Kılıçdaroğlunun ABŞ-a getməsinin əsas məqsədi də bu ola bilərdimi?