Təbii fəlakətin gündəmindən siyasi rəqabətə: hər şeyə rəğmən məmnuniyyətverici tablodur

Bəli,  20.5 illik iqtidar partiyası doğru analizlər edərək zəlzələyə görə prezident və parlament seçkisinin təxirə salınmasının öz əleyhinə nəticələr doğuracağını gördü və hələ ki qətiləşməmiş iki tarixin üstündə durdu: 14 mayda olmasa, ən gec 18 iyunda həm  parlamenti həm də dövlət başçısını seçmək üçün xalq məntəqələrə axın edəcək.

Şübhəsiz, uzun müddətdən bəri 2023-cü ili  öz hədəflərinin həlledici mərhələsi kimi dəyərləndirərkən siyasi islam  təbii fəlakəti hesaba qatmırdı. Ona görə 6 fevralda ölkənin 10 vilayətini yerlə  bir edən zəlzələnin ilk nəticələri aradan qaldırılarkən vətəndaşların seçki qutularında göstərəcəyi reaksiya iqtidar partiyası üçün son ana qədərr müəmma kimi qalacaq. Hər şeyə rəğmən hazırlıqlar başlamışdır və 14 may və ya 18 iyunda keçiriləcək seçkilərin nəticələri ya  cənab Erdoğan üçün yarım əsrlik siyasət həyatının acınacaqlı məğlubiyyəti olacaq   və ya Türkiyə seçicilərinin ən az yarısının ağına-bozuna baxmadan ona pərəstişə davam etdiyini göstərəcək.

Bir neçə gün əvvəl Erdoğana pərəstiş edən ibtidai təhsilli bir seçiciylə danışanda pərəstişin formulunu bu şəkildə izah etmişdi: ”Meydanlara çıxıb 2 kəlməylə “Taleyin işidir” - deyən kimi kreslosunu qoruyacağına heç kim şübhə etməsin”.

 “Mən şübhə etmirəm”- deyərək o pərəstişkar seçicini məmnun etdim.

İndiyə qədər AKP-ni tərəddüdsüz və sədaqətlə dəstəkləmiş kütləni “Taleyin işidir” -şəklindəki iki kəlmə yenidən konsolidə edəcəksə, bu formulun siyasi islam  tarixindəki digər örnəyini xatırlamadığımı cahilliyimə bağışlamağınızı xahiş edir və  müxalif qanaddakı duruma göz atmaq üçün tələsirəm. ”Qərb cəbhəsində dəyişən bir şey yoxdur” - deyirdi Erich Maria Remarque.

Seçkiyə 3 aydan da az qalmışkən Türkiyənin müxalif cəbhəsində də durum o şəkildədir:ana müxalifət lideri Kemal Kılıçdaroğlunun öz söyləmlərini sərtləşdirərək konsolidasiya  yaratmağa çalışmasına baxmayaraq, İYİ Partiya lideri Meral Akşener başında durduğu siyasi qurumun rəsmi təmsilçilərinin  ipə-sapa yatması üçün tükünü də tərpətmir.

Kürd təmayüllü seçicilərin üzərində böyük təsir gücü olan Selahattin Demirtaş  həbsxanadan göndərdiyi mesajda Kemal Kılıçdaroğlunun ətrafında konsolidasiyaya işarə edərkən İYİ Partiya lideri Meral Akşnerin 6 aydan sonra yenə “Notariusluk etməyəcəyik”- deməsi 6 partiyanın toplandığı masada hələ də tam həmrəyliyin olmadığını göstərir.

Meral Akşener nə etmək istəyir? Sözü uzatmadan cavabı verim: Erdoğanın da ona möhtac olduğunu görərək müxalif bloku da özünə möhtac hala gətirməyə çalışır. Yəni, ana müxalifət partiyası liderinin seçilə bilməyəcəyinə eyham vuraraq “Seçilə biləcək namizəd” nəqəratını  daim gündəmdə tutur və bu nəqəratı 6 partiyanın bir yerə toplandığı masanın da gündəminə daxil edib  özünün namizədliyindən başqa bir alternativin olmamasını liderlərə qəbul etdirməyə çalışır.

Akşenerin bu taktikasını davam etdirməsi durumunda 6 partiyanın bir araya gəldiyi masa dağıla bilərmi?Masa öz ömrünü başa vura və daha əvvəl də yazdığımız kimi, Meral Akşener iqtidar blokunun tərəfinə keçə bilər.

Şəxsən mənim üçün sürpriz olmayacaq bu durumda İYİ Partiyadan Akşenerin arxasınca AAKP-nin dərdinə çarə  olacaq sayda seçicinin gedib-getməyəcəyi qəti deyil. Bunun əvəzində  sırf İYİ Partiyaya və xüsusilə də Akşenerin dünyaya baxışına  görə Kemal Kılıçdaroğluna məsafəli duran kürd təmayüllü seçici kütləsindən daha çox insanın müxalif bloka yaxınlaşacağını söyləmək  çətin deyil.

Buraya son aylarda aktivliyini  xeyli artırmış və konsolidasiyaya meylli sol və hətta radikal sol qüvvələrin müxalif bloka tərəf hərəkətlənəcəyini də əlavə etsək, seçki günündə müşahidəçiliyin və  səslərin sayılmasına nəzarətin daha da güclənəcəyini gözləmək olar. Hörmətli Recep Tayyip  Erdoğanı qeydsiz-şərtsiz  dəstəkləyən Devlet Bahçelinin Milliyətçi Hərəkat Partiyasına olan ümid hər gün azalarkən imdadın yeni ünvanının İYİ Partiya olacağını gözləmək sadəlövhlükdən başqa bir şey deyil. 73 illik demokratiya təcrübəsinə malik Türkiyə seçicisini bu qədər ağılsız sayanlar seçki qutularında  bunun tamamilə əks nəticəsiylə üzbəüz gələ bilərlər.

Zəlzələ gündəmindən seçki  gündəminə keçmək Türkiyənin diri və ayaq üstündə olduğunu göstərmirmi?