Amerikaya istəyirəm!

Noyabrın 22-də Green Card DV-2019 ("Diversity Immigrant Visa" proqramı) lotereyasında iştirak üçün ərizə qəbulu proseduru yekunlaşıb. Çəkiliş gələn ilin aprel-may aylarında keçiriləcək, daha doğrusu, mayın 15-də artıq onun nəticələri elan ediləcək. Nəticələri lotereyanın rəsmi saytından öyrənmək olar: https://www.dvlottery.state.gov.

Hər il dünyada 50 min green card üçün lotereya oynanır, bu kartı almaq istəyənlərin sayı isə dəfələrlə çoxdur. Məsələn, DV-2018 lotereyası çərçivəsində 14 milyondan çox ərizə verilib. Onlardan 115 968 nəfər seçilib, onlar mühacirət vizasının verilməsi üçün müraciət edə biləcəkləri haqqında bildiriş alıblar. Sənəd ABŞ-da yaşamaq və işləmək hüququ verir, bu, bir növ Amerikada yaşamaq icazəsi almağın və ABŞ-a mühacirətin ən leqal və ən geniş yayılmış üsullarından biridir.

Hələlik Azərbaycandan bu müsabiqədə iştirak üçün ərizə verənlərin sayı haqqında dəqiq statistika yoxdur, amma, çox güman ki, onların sayı ötən il olduğundan xeyli çox olacaq. Bu fikri mətbuata "Greencard Azerbaijan" (saytı: greencard.az) şirkətinin əlaqələndiricisi Röyal Cəfərov bildirib. Onun sözlərinə görə, son illər bu lotereyada iştirak edən Azərbaycan vətəndaşlarının sayının artması təmayülü müşahidə olunur.

"Bu gün insanlar, xüsusən gənclər green card almağın qaydaları, okeanın o tayına yerləşmək və öz potensiallarını həyata keçirmək imkanları haqqında daha çox məlumatlıdırlar. Dörd il əvvəl bu lotereyada 20 minə yaxın azərbaycanlı iştirak edirdisə, ötən il ərizəçilərin sayı təxminən 45-50 min nəfər təşkil edib, bu il isə, proqnozlara görə, namizədlərin sayı 70-80 minə çatacaq. Göründüyü kimi, ABŞ-a köçmək istəyən həmvətənlərimizin sayı getdikcə artır", deyə Cəfərov qeyd edir.

Onun sözlərinə görə, "DV" vizası almaq üçün müraciət edənlər kompüter vasitəsilə həyata keçirilən sərbəst seçim yolu ilə seçilir. Bu zaman vizalar altı coğrafi region arasında bölünür və ən çox viza mühacirət səviyyəsi ən az olan regionlara verilir. Son 5 ildə ABŞ-a 50 mindən çox mühacir gələn dövlətlərin vətəndaşları üçün viza nəzərdə tutulmur. Banqladeş, Braziliya, Kanada, Çin, Kolumbiya, Ekvador, Hidistan, Meksika, Pakistan bu ölkələrə aiddir.

Lotereyada əvvəlcə çox sayda namizəd seçilir. Daha sonra mühacirət əməkdaşları ilə müsahibədə meyarlara daha çox uyğun olanlar və "yararlı" olduqlarını sənədli şəkildə sübut edə bilənlər seçilir.

Qaydalara əsasən, DV proqramı ilə ABŞ-a getmək icazəsi almaq üçün orta təhsilli olmaq kifayətdir. Amma bu, heç də belə deyil, miqrasiya məsələləri üzrə ekspert Azər Allahverdiyev belə deyir. Green card lotereyasının qalibləri strukturunun təhlili göstərir ki, ABŞ səfirliyinin konsulluq şöbəsində söhbət zamanı ali texniki təhsili olan insanlara daha çox üstünlük verilir, onlar üçün iş tapmaq daha asandır.

"ABŞ-a getmək istəyən namizədin yaşı da böyük əhəmiyyət kəsb edir. Bu ölkədə yaşamaq və işləmək haqqı qazanmış insanların siyahısına baxsaq, icazələrin 85-90%-ni gənc mütəxəssislərin və öz gücünə və maliyyə imkanlarına arxayın olan orta yaşlı insanların qazandığını görmək çətin deyil. Məsələn, ötən il Azərbaycandan 900-dən çox insan green card lotereyasını udub, onlar arasından meyarlara uyğun olan cəmi 224 nəfər seçilib. Bunun 133-ü kişilər və 91-i qadınlardır. Lotereya qaliblərinin əksəriyyəti - 106 nəfər 1980-89-cu il təvəllüdlü, 90 nəfər isə 1990-cı il təvəllüdlüdür. Hər kəsin çox arzuladığı bu kartın ən gənc sahibləri 1998-ci il təvəllüdlü üç nəfər, ən yaşlısı isə 1953-cü il təvəllüdlü şəxs olub. Bu il DV-2018 lotereyasını 961 nəfər qazanıb (Ermənistan - 2844, Belarus - 1466, Gürcüstan - 1195, Qazaxıstan - 1020, Qırğızıstan - 753, Rusiya - 4500, red.), amma onlardan neçəsinin ABŞ-a getmək icazəsi ala biləcəyi hələlik məlum deyil", deyə ekspert qeyd edir.

Bu zaman iddiaçıların ailə ölçüsünə də diqqət yetirilir - çoxuşaqlı ailələri söhbət prosesində "yararsız çıxarmağa" çalışırlar.

Azərbaycandan gedən mühacirlərin sayının hər il artdığını paytaxtın 1 saylı notariat kontoru yaxınlığında yerləşən tərcümə mərkəzlərində qeydiyyatdan keçirilmiş çox sayda sənədlər də sübut edir. Qaydalara əsasən, potensial mühacirin bütün şəxsi sənədləri ingilis dilinə (və ya başqa dillərə) tərcümə olunmalı, müvafiq profilli dövlət orqanı tərəfindən onlara apostil vurulmalıdır (yalnız Ədliyyə Nazirliyi fiziki şəxslərin sənədlərinə "apostil" ştampı vurur).

Bu mərkəzlərin tərcüməçilərinin sözlərinə görə, hər ay 1000-ə yaxın ölkə vətəndaşı sənədlərin tərcüməsi və apostil vurulması üçün müraciət edir - kimiləri təhsil almaq üçün xaricə gedir, kimiləri yeni yaşayış və iş yerinə köçür.

MBA LTD konsaltinq şirkətinin baş direktoru Nüsrət İbrahimov "mühacirət dalğasının" mühüm bir aspektinə diqqət çəkir. Onun sözlərinə görə, son vaxtlar azərbaycanlılar xaricdən fəal şəkildə ev almağa davam edirlər. Bu gün kommersantlarımız təkcə Bolqarıstandan, Çexiyadan, Fransadan və ya İspaniyadan daşınmaz əmlak almır. Onların ştatdan asılı olaraq mənzil qiymətləri 60 min dollardan başlayan ABŞ-da da mənzilləri və evləri olduğunu istisna etmək olmaz. Bu, orta biznesmenin cibinə kifayət qədər uyğun məbləğdir.

"Azərbaycanlıların xaricdən aldığı əmlaklar sırf ölkədən kapital çıxarılması deməkdir. Əvvəllər bu variant ehtiyat kimi, xaricdə təhsil alan uşaqların yaşaması üçün və ya iş və ya istirahət üçün ölkədən kənara çıxmaq üçün həyata keçirilirdi. Amma indi bu mərhələ artıq geridə qalıb. Bu gün ölkədən pul çıxarılır. Zənnimcə, bu evlər boş qalmır, icarəyə verilir və orada müştəri var. Kapital dövriyyəsinin sürəti Azərbaycanda olduğundan az deyil. Həm də gəlir burada olduğundan xeyli çoxdur", deyə İbrahimov qeyd edib. -0-