AXCP üzvü həbs edilib, digər fəala xəbərdarlıq edilib

Bakı/12.08.17/Turan: Xalq Cəbhəsi Partiyasının Sumqayıt təşkilatının fəalı Ruslan Qara inzibati qaydada 20 günlük həbs edilib. Bu barədə Turan-a AXCP-dən bildiriblər.

Partiyada hələlik fəalın hansı inzibati hüquq pozuntusuna yol verdiyi barədə məlumat yoxdur. Amma AXCP-də əmindirlər ki, onu siyasi motivlərlə təqib edirlər.

Xatırladaq ki, Qara dünən səhər evinin yaxınlığında mülki geyimli şəxslər tərəfindən oğurlanıb.

AXCP lideri Əli Kərimlinin Facebook profilində yazdığına görə, Qara 2016-cı ilin sentyabrından indiyə qədər olan dövr ərzində partiyanın inzibati qaydada həbs olunan 41-ci fəalı olub. Partiyanın daha 20 üzvü işdən çıxarılıb.

Amma bu təzyiq forması Azərbaycan gəncliyinin demokratiya uğrunda mübarizəsini dayandırmayacaq, deyə Kərimli yazıb.

Dünən həmçinin Demokratik Gənclər Təşkilatının rəhbəri İsmayıl İslamoğlu da polisə çağırılıb.

Bundan əvvəl Şirvan şəhərində onun atasını saxlayıb, fəalın polisə gəlməsini tələb ediblər.

Yasamal rayonu 27-ci polis bölməsində onunla 3 saat "söhbət ediblər", onun Facebook-da siyasi məhbusları müdafiə edən statusuna irad tutublar və "bir daha bu mövzuya toxunmamağı" tələb ediblər. -06D-