Azad İsazadə: Müdafiə naziri və dövlət başçısı həlak olanların ailələrinə bir dəfə belə başsağlığı verməyib

Orduda qeyri-döyüş şəraitində əsgər ölümlərinin artması xoşagəlməz haldır. Bu, Silahlı Qüvvələrin gücünü, döyüş potensialını və nizam-intizamını şübhə altına qoyur. Ordu Vətən qarşısında vəzifəsini yerinə yetirməli olan gənclər üçün təhlükəyə çevrilir. Belə çıxır ki, çağırışçılar Vətən uğrunda deyil, zabitlərin, komandirlərin və başqa kimlərinsə “kaprizinə” qurban gedirlər. Bu barədə Turan-a müsahibəsində hərbi ekspert, psixoloq Azad İsazadə sonuncu neqativ halları şərh edərkən bildirib

Bunun qarşısını almaq üçün yeni qanunlar qəbul etməyə ehtiyac yoxdur, normal qanunlar var. Hər zabit, komandir və digər rəislər ordunun nizamnaməsinə, qaydalara və normalara riayət etsələr, dedovşinaya qarşı mübarizə aparmaq daha asan olardı

İsazadənin sözlərinə görə, dedovşina elementləri məktəbdə belə var: hansı uşaq yuxarı sinif şagirdlərinin təzyiqi ilə qarşılaşmayıb? Amma orada müəllimlərin, valideynlərin nəzarəti var Orduda isə hər şey bir qədər fərqlidir, belə bir nəzarət yoxdur və 18 yaşlı oğlanlar özlərini təsdiq etməyə başlayır. Lakin zabitlər nədənsə öz öhdəliklərini böyük əsgərlərin, praporşiklərin üstünə qoyur. Bu da çox vaxt növbəti faciəyə gətirib çıxarır. Bundan ictimaiyyətin xəbəri olduqdan sonra “mundir şərəfi” yada düşür. Zabitlər komandirlərin və Müdafiə Nazirliyinin xəbəri olmasın deyə məsuliyyətdən qaçmağa, faktı gizlətməyə çalışır.

Bütün bunlar əsgərlərin daha çox və əsassız ölümünə səbəb olur. Lakin bircə dəfə obyektiv araşdırma aparılıb, rütbəsindən asılı olmayaraq təqsirkarlar cəzalandırılsa, bunun təsiri olar, deyə İsazadə qeyd edib.

“92-94-cü illərdə döyüş əməliyyatları zamanı köhnə qulluqçular həmişə gənc əsgərlərə kömək edir, onların qayğısına qalırdı”, deyə İsazadə qeyd edib. Lakin sülh vaxtı hər şey əksinədir.

Orduda təlimlərdə, döyüşdə, dağlıq və qarlı ərazilərdə itki faizləri var. Hazırki qeyri-döyüş itkiləri absurd hal alır və ictimaiyyətin bütün hadisələr barədə xəbəri olmur.

Konkret olaraq Ceyhun Qubadovun ölümünə gəlincə, rəsmi versiyaya əsasən o, ürək çatışmazlığından ölüb, lakin əsgərin bədənində ciddi xəsarət izləri var idi.

Ya hərbi tibbi komissiya xəstə insanı orduya göndərib, ya da o ürək tutması keçirib, yaxud da əsgərin ölüm səbəbləri haqqında ekspertiza rəyi düzgün deyil.

“İstənilən halda vəziyyəti araşdırıb, təqsirkarları cəzalandırmaq lazımdır”, deyə ekspert bildirib.

Orduda əsgər ölümü hallarını azaldacaq, bəlkə də tamamilə aradan qaldıracaq ictimai nəzarətə ehtiyac var.

Bundan başqa, orduda hərbi psixoloq institutu tətbiq edilməlidir. “Belə kadrlar var. Onlara kiçik zabit rütbəsi vermək lazımdır, qoy şəxsi heyətlə işləsinlər”, deyə İsazadə qeyd edib.

Ordu rəhbərliyinin öz əsgərlərinin taleyinə bu qədər biganə olmasının səbəbi ilə bağlı suala İsazadə belə cavab verib:

“1995-ci ildən etibarən müdafiə naziri bir dəfə olsun parlament qarşısında hesabat verməyib. Deputatların qarşısına çıxıb öz işi haqqında danışmayıb.

Müdafiə naziri və ali baş komandan bir dəfə belə həlak olan əsgərlərin ailələrinə başsağlığı verməyib, baxmayaraq ki, bunu etməli idi. Valideynlər öz övladlarını orduya və dövlətə etibar ediblər. Ordu rəhbərləri bu itkilərə görə valideynlərin dərdinə şərik olmalıdırlar. Bu, onların borcu və öhdəliyidir”, deyə psixoloq qeyd edib. -04В-