AZƏRBAYCAN ƏFQANISTAN NARKOTRAFİKİNƏ FƏAL ŞƏKİLDƏ CƏLB OLUNUB

BAKI/26.06.10/TURAN: İyunun 26-da narkotik vasitələrin istifadəsinə və onların qanunsuz dövriyyəsinə qarşı Beynəlxalq Mübarizə Günü qeyd olunur. Azərbaycanda rəsmi tədbirlər keçirilmir və bu mövzu demək olar ki, mətbuatda işıqlandırılmır. Son vaxtlar Azərbaycanda narkotrafikə qarşı mübarizənin xeyli canlanmasına baxmayaraq, ölkə hələ də mühüm yük boşaltma məntəqəsi və ilk növbədə, Əhqanıstandan Rusiyaya və Avropaya heroin daşınması məntəqəsi olaraq qalır. Azərbaycanda ən çox istifadə olunan narkotik maddələr heroin, leqal tibbi dərmanlar, çətənə, psixotrop maddələr, həşiş, kokain və LCD-dir. Daxili tələbat artmaqda davam edir. Rəsmi hesablamalara görə, narkomanların sayı 23 min nəfərə çatır. Qeyri-rəsmi məlumatlara görə, onların sayı 300 minə yaxındır və onların əksəriyyəti heroindən istifadə edir. Narkomanların ümumi sayının xeyli hissəsini - 30-35%-ni tələbələr təşkil edir. Heroin istifadəçilərinin əksəriyyəti iri şəhərlərdə və Lənkəranda cəmləşib (64,6%). Gənc qadınlar arasında narkotik maddə istifadəçilərinin sayı artır, qeyri-rəsmi məlumatlara görə, onların sayı 5 mindir. Azərbaycan hökumətinin məlumatına görə, ölkə ərazisilə daşınan narkotik maddələrin əsas hissəsi Əfqanıstanda istehsal olunan narkotiklərdir. Onların əsas daşınma marşrutu belədir: Əfqanıstan-İran-Azərbaycan-Gürcüstan-Qərbi Avropa; Əfqanıstan-İran-Dağlıq Qarabağ-Ermənistan-Gürcüstan-Qərbi Avropa; Əfqanıstan-İran-Azərbaycan-Rusiya; Əfqanıstan-Mərkəzi Asiya-Xəzər dənizi-Azərbaycan-Gürcüstan-Qərbi Avropa. BMT-nin məlumatına görə, Əfqanıstan ildə 9 min tona yaxın və ya bütün dünya ehtiyatlarının 93%-i həcmində tiryək istehsal edir. Amerikanın STRATFOR mərkəzinin məlumatına görə, Əfqanıstan narkotrafikinin 40%-i İran istiqamətinin payına düşür, İrandan Azərbaycana və Türkiyəyə keçir. Azərbaycanda narkotrafikin artması ilə yanaşı, narkocinayətlərin də sayı artır. 2009-cu ildə tiryək və heroin daxil olmaqla, bir neçə ton narkotik maddə müsadirə edilib. 2008-ci ildə 650 kq. narkotk maddə müsadirə olunub. Son illərin tendensiyası və narkocinayətlərə qarşı mübarizənin zəif olması trafikin, müsadirənin və narkotik maddədən istifadənin gələcəkdə artacağını proqnozlaşdırmağa əsas verir. -0-