Azərbaycanın enerji təchizatının etibarsız olması ictimaiyyəti qorxudur

Bakı/03.07.18/Turan: Bu gecə Mingəçevir İES-də qəza baş verdikdən sonra Bakıda və Sumqayıtda rayonların su təchizatı tədricən bərpa edilir. Kür, Ceyranbatan su anbarında, şəhər nasos və su anbarlarında sutəmizləyici sistemin dayanması nəticəsində suyun verilməsi dayandırılıb. Kür çayının suyunun Bakıya daxil olduğu kəmər 12 saat ərzində doldurulacaq. Yəni, çərşənbə axşamı su qıtlığı davam edəcək, "Azərsu" MMC mətbuat xidmətinin məlumatından belə məlum olur.

Mütəxəssislər ölkə miqyasında qəzanın səbəblərini müzakirə edirlər. Rəsmi açıqlama bundan ibarətdir ki, isti havada elektrik şəbəkələri yüklənməyə davam gətirməyiblər. Elektrotexnika sahəsində ekspert Akif Həsənov baş verənləri disbalans ilə izah edir: istehlak edilən enerjinin həcmi hasil ediləndən çoxdur. Məhz buna görə generatorlar partlayır, qapanmalar baş verir. Dəyən zərər böyükdür, çünki sistemin özündən başqa həyat qabiliyyətli obyektlər də sıradan çıxır.

Belə hallarda rayonlarda və ikinci dərəcəli istehlakçılarda elektrik enerjisinin kəsilməsinə əl atılır. Ola bilsin ki, bu, gecə işıqforların və küçələrin işıqlandırılmasının dayandırılması bununla izah olunur. A.Həsənov baş verənlərdə "Azərenerji" Dövlət Şirkətinin rəhbəri Etibar Pirverdiyevi günahkar hesab edir.

Bu, ilk miqyaslı qəza deyil. E.Pirverdiyevin idarəçiliyi dövründə üç miqyaslı qəza baş verib: 28 yanvar 2006-cı il, 10 fevral 2010-cu ildə Bakı və regionlar işıqsız qalmışdı.

2012-ci il sentyabrın 28-də Bakının bəzi rayonları, həmçinin ölkə regionları Mingeçevirdə "Azərbaycan" İES-də baş vermiş qəza nəticəsində işıqsız qalmışdı.

Heydər Əliyevin vaxtında da böyük qəza baş vermişdi və təşkilati nəticə ciddi və sərt olmuşdu.

2002-ci il iyulun 14-də elektrik sistemində baş vermiş qəza nəticəsində ölkənin bir hissəsi işıqsız qalmışdı. O zaman prezident İlham Əliyev "Azərenerji"nin rəhbəri Müslüm İmanovu istefaya göndərdi.

Müharibə vəziyyətində olan ölkənin enerji sisteminin etibarsız olması əhalini qorxudur. Jurnalist Qafqaz Ömərov: "Azərbaycanın enerji təhlükəsizliyi tükdən asılıdır. Bu, hələ təxribat deyil, terror aktı deyil, adi istidir...."

Hüquq müdafiəçisi Eldar Zeynalov hadisənin isti səbəbindən şəbəkənin yüklənməsi ilə izah edilməsini təəccüblə qarşılayıb.

"Gecə saat birin yarısında transformator yanıb, əhalinin bir hissəsinin yatdığı, temperaturun endiyi bir vaxtda yüklənmə aşağı olmalı idi. Bütün güc qurğuları artıq yüklənmədən müdafiə olunmalıdır. Necə olub ki, ölkənin yarısı işıqsız qalıb? Havanın temperaturunun belə nəticələrə səbəb olduğu bir şəraitdə reklam edilən hərbidən tutmuş ərzağa kimi "təhlükəsizlik konsepsiyası" nəyə lazımdır?

Elektrik enerjisinin verildiyi yerlərdə İnternet yoxdur. "Multimedia" Mərkəzi QHT-nin direktoru Osman Gündüz yazır ki, "Azərenerji"də bilirdilər ki, yanğın və partlayışın baş verdiyi Mingəçevir İES-də altıncı blokun əsaslı təmirinə ehtiyac var. Bu, "Azərenerji"nin strateji yol xəritəsində nəzərdə tutulub. Ancaq onu təmir etmədilər.

Elektrik sektorunda planlaşdırılan, ancaq yerinə yetirilməyən işlər çoxdur. "Texnogen qəzalar və elektrik enerjisinin kəsilməsi hər yerdə mümkündür, ancaq nəticələr bu qədər miqyaslı olmamalıdır. Hökumət ciddi araşdırma aparmalıdır", - O.Gündüz hesab edir.

O qeyd edib ki, bu, "Azərenerji" sistemində ilk belə hadisə deyil. Bu, şirkətin məsuliyyətsizliyindən xəbər verir. Baş verən qəzaların bir səbəbi də hökumətin dövlət sektoruna alternativ kimi özəl şirkəti cəlb etməməsidir", - ekspert hesab edir.

Turan qeyd edir ki, 1998-ci ildən ölkənin elektrik istehsalı və paylaşdırıcı şəbəkəsinin modernləşdirilməsinə 4 mlrd. dollara yaxın vəsait sərf olunub.-0-