Cahangir Hacıyevin vəkilləri istintaq təcridxanasında ona təzyiq göstərildiyini bildiriblər

Bu gün Bakı Ağır Cinayətlər Məhkəməsində Azərbaycan Beynəlxalq Bankı (ABB) ASC-nin idarə heyətinin keçmiş sədri Cahangir Hacıyevin və bu maliyyə müəssisəsinin digər 7 vəzifəli şəxsinin işi üzrə məhkəmə istintaqı başlayıb.

İclasın əvvəlində Hacıyevin vəkilləri Kürdəxanı istintaq təcridxanasında ona güclü təzyiq göstərildiyini bildiriblər.

Vəkil Fəxrəddin Mehdiyev bildirib ki, Hacıyevin kamerasını dəyişdiriblər və onu artıq məhkum edilmiş şəxslərin saxlanıldığı korpusa keçiriblər.

O, uzun müddətdir ortaq istifadədə olan soyuducudan məhrum edilib. Bu səbəbdən Hacıyev “yemək saxlaya bilmir və demək olar ki, yeməksiz və susuz qalır”, deyə vəkil bildirib.

Mehdiyev hakimlərdən Hacıyevin hüquqlarının təmin edilməsi üçün müdaxilə etməyi xahiş edib.

Vəkil Aqil Lahıcov isə bildirib ki, hazırlıq iclasından sonra Hacıyevi məhbusların daşınması üçün olan xüsusi havalandırılan maşınla deyil, xüsusi olaraq “qızdırılmış” “QAZ-53” yük maşınında aparıblar.

Qeyd edək ki, əvvəlki iclasda Hacıyev maliyyə naziri Samir Şərifovun da məhkəməyə gəlməsini və məsuliyyətə cəlb edilməsini tələb edib. O, bunu bankın auditor komissiyasına Maliyyə nazirliyinin nümayəndələrinin də daxil olması ilə əsaslandırıb. İdarənin özü dövlət adından bankın səhmlər paketinə malikdir və onun Müşahidə Şurasında təmsil edilib.

Vəkillər həmçinin Hacıyevin şüşə qəfəsdən çıxarılaraq, prosesdə vəkillərinin yanında oturmasına icazə verilməsi barədə vəsatət qaldırıb. Amma müdafiə tərəfin heç bir vəsatəti təmin edilməyib.

Daha sonra müdafiə tərəfi hakim heyətinə etiraz edib. “Hazırlıq iclasında 6 vəsatət irəli sürdük. Məhkəmə onların yalnız ikisinə münasibət bildiri. Bu zaman onların təmin edilməməsi də əsaslandırılmayıb. İstintaqda da belə olub – vəsatətlərin niyə təmin edilmədiyini izah etməyiblər.

Vəsatətlərə belə yanaşma prosesin əvvəlindəcə bizdə hakim heyətinin ədalətli olduğuna şübhə yaradır”, deyə vəkil Lahıcov bildirib.

Amma məhkəmə etirazı baxılmamış saxlayıb. Daha sonra prokuror ittiham aktını elan edib.

Hacıyev də daxil olmaqla, 8 müttəhimin heç biri özünü təqsirli bilməyib.

Günün ikinci yarısında Hacıyevin ifadə verməsi planlaşdırılırdı.

Hacıyevlə birlikdə ABB-nin keçmiş filial rəhbərləri - Anar Sultanov, Yusif Ələkbərov, İlqar Abdullayev, Kənan Orucov, Məmməd Cahangirov, habelə Bakı Fındıq Emalı Zavodunun keçmiş direktoru Azad Cavadov məhkəmə qarşısına çıxarılıb. Onlar AR CM-in 179.3.1, 179.3.2 (böyük ölçüdə mənimsəmə, mütəşəkkil qrup tərəfindən törədildikdə), 308.2 (vəzifə səlahiyyətlərindən sui-istifadə, ağır nəticələrə səbəb olduqda), 309.2 (vəzifə səlahiyyətlərini aşma, ağır nəticələrə səbəb olduqda), 313 (vəzifə saxtakarlığı), 228.1 və 228.4-cü (odlu silahın və onun komplekt hissələrini qanunsuz əldə edilməsi, başqasına verilməsi, satışı, saxlanması, daşınması) maddələri ilə ittiham olunur.

Hacıyev 2015-ci il martın 18-də "səhhəti ilə əlaqədar" ABB sədri vəzifəsindən istefa verib. Bundan sonra ABB-nin bir sıra keçmiş yüksək vəzifəli əməkdaşları və bankdan böyük kreditlər alan biznesmenlər həbs olunub. Qeyri-rəsmi məlumatlara görə, ABB-yə qaytarılmamış kreditlərin məbləği 6 mlrd. dollara çatıb. Hacıyevin özünü oktyabrın 17-də yaxın qohumu Eldar Mahmudovun MTN rəhbəri vəzifəsindən istefasından sonra istintaqa çağırmağa başlayıblar. Dekabrın 5-də Hacıyev həbs olunub. Vəkilinin sözlərinə görə, o, 42 mln. manatı mənimsəməkdə ittiham olunurdu. Bu vəsait bankın 80 mln. manatlıq səhmi şəklində dövlətə qaytarılıb. -06D-