Efiopiyalı qaçış ustası: �Azərbaycanda bizimlə qul kimi davranırdılar�

Bakı/05.08.17/Turan: Britaniyanın "The Guardian" qəzeti Yaxın Şərqin zəngin ölkələrinin Afrika ölkələrindən yüngül atletika ustalarını almasına həsr olunmuş məqalə dərc edib. Qəzet qeyd edir ki, sonradan həmin idmançıların bəzisindən imtina olunub və onların hüquqları pozulub. Buna nümunə kimi efiopiyalı idmançı Layeş Tsiqenin işi göstərilir. O, Azərbaycanda Liya Abdullayeva kimi tanınıb. Almaniyanın ARD telekanalı öz reportajını bu qaçış ustasına həsr edib.

"Bizimlə qul kimi davranırdılar", - o, öz müsahibəsində bildirib.

Onlarla medal sahibi, 26 yaşlı Liyanı 2009-cu ildə türk məşqçi Azərbaycan üçün yarışmağa razı salıb. "Yarışları qazansam mənə yaxşı maaş, ev, bahalı maşınlar vəd elədilər. Ancaq heç birini görmədim. Mənə mükafat kimi verilən pulumu oğurladılar, aldadıb dopinqə məcbur etdilər. İndi hamıya məsləhət görürəm ki, buna getməsinlər", - idmançı danışıb.

Layeşə vəd ediblər ki, ayda 300 dollar verəcəklər, yaxşı nəticə göstərərsə 1000 dollar olacaq.

Azərbaycan uğrunda çıxışlarının ilk aylarında o, gənclər arasında Avropa birinciliyində gümüş mükafat qazanıb. Ancaq ona vəd edilən pulu almayıb. Cəmi 150 dollar veriblər.

"Səkkiz aydan sonra məşqçidən soruşdum ki, niyə mənə vəd olunan 1000 dolları vermirlər və federasiya prezidentinə şikayət edəcəyimlə hədələdim. Bunu deyən kimi pulu cibindən çıxarıb mənə verdi. Belə çıxdı ki, elə üçüncü aydan pulu cibində saxlayırmış", - Layeş deyib.

Gənclər və İdman Nazirliyi, Azərbaycan Yüngül Atletika Federasiyası afrikalı idmançının bəyanatını hələlik şərh etməyiblər.

Qeyd edək ki, Azərbaycan Yüngül Atletika Federasiyasının prezidenti Çingiz Hüseynovdur. O həm də Milii Olimpiya Komitəsinin birinci vitse-prezidenti postunu tutur.

Maraqlıdır ki, Afrikadan atletlər dəvət edən Federasiya onların bacarığını yetərincə dəyərləndirmir.

Buna nümunə kimi Ramil Quliyevlə bağlı durumu göstərmək olar. Lazımi diqqət görməyən E.Quliyev Türkiyəyə köçüb. Bu ölkəni təmsil edərək yuniorlar arasında 200 metrlik qaçış üzrə Avropa rekordçusu, Avropa-2016-nın vitse-çempionu, Rio-2016 Olimpiadasının finalçısı olub.

Medalların çoxunu qazananların legionerlər olmasına baxmayaraq, gənclər və idman naziri Azad Rəhimov ölkədə idmanın inkişafında böyük nailiyyətlərin olduğunu söyləyir.

ARD-nin reportajına burada baxmaq olar