Eramızdan əvvələ aid bəzək əşyaları tapılıb

Bakı/19.04.18/Turan: Azərbaycanlı alimlər Goranboy, Şəmkir, Tovuz və Ağstafa rayonlarında eramızdan əvvəl 1-ci minilliyə aid qızıl və gümüşdən hazırlanmış bəzək əşyaları aşkar ediblər.

Azərbaycan Milli Elmlər Akademiyasının məlumatına görə, akademiyanın Arxeologiya və Etnoqrafiya İnstitutunun elmi işlər üzrə direktor müavini Nəcəf Müseyiblin rəhbərlik etdiyi qrup adıçəkilən rayonlarda araşdırmalar aparıb.

Araşdırmaların məqsədi orta əsrlərə, son tunc-erkən dəmir dövrünə aid bir sıra abidələrin vəziyyətinin yoxlanılması, yerüstü materiallar əsasında həmin arxeoloji abidələrin səciyyəsinin müəyyənləşdirilməsi olub. Qrup bir sıra abidələrdə təbii və süni müdaxilələr nəticəsində dağıntıların baş verdiyini qeydə alıb.

Alimlər təbii və antropogen təsirlər nəticəsində dağıntıya məruz qalan qədim qəbir abidələrində qızıldan və tuncdan hazırlanan bir cüt sırğa, üzük, armudvari və boru şəkilli muncuqlar və asma bəzək əşyaları aşkar ediblər. Bu əşyalarla yanaşı saxsı qabların fraqmentlərindən ibarət keramika məmulatı əsasında həmin bəzək nümunələrini erkən dəmir dövrünə - eramızdan əvvəl I minilliyin birinci yarısına aid olduğu müəyyən edilib.

AMEA qeyd edir ki, bu tapıntılar hələ 2700-3000 il bundan əvvəl Azərbaycanda qızıl metallurgiyasının yüksək inkişaf səviyyəsində olduğunu sübut edir.-0-