Media-icmal 01.03.21

“Moderator.az” saytı “Ermənilər yazda meşələrin yarpaqlamasından yararlanıb Şuşa və Hadrutda yeni təxribatlar törədə bilərlər…” sərlövhəli məqalədə qaldırılan məsələni Qarabağ qazisi, ehtiyatda olan kəşfiyyatçı polkovnik Azay Kərimovla müzakirə edir.

Kəşfiyyatçı müəllifin yaz-yay aylarında Qarabağ meşələrində erməni seprataçılarının Azərbaycana qarşı təxribatlar törədə bilməsi fikrini mümkün sayır: “... keçmiş döyüşçü, zabit, bu ərazilərə yaxşı bələd olan biri kimi Şuşanın hazırki durumundan çox narahatam...” , deyə A.Kərimov mövqeyini ifadə edir. A.Kərimov Azərbaycan Ordusunun Qarabağda nəzarət etmədiyi ərazilərdə separatçı və terrorçu silahlı qrupların mövcudluğu ehtimalının böyük olduğunu vurğulayır.

Onun sözlərinə görə, Azərbaycan tərəf hazırda yalnız Şuşa şəhərinə və Daşaltı kəndinə nəzarət edir, heç Şuşanın yaxın ətrafına da gedib-gələ bilmək, Şuşa qalasından kənara çıxmaq imkanı yoxdur, çünki ətraf ərazi Rusiya hərbiçilərinin nəzarət etdiyi zonaya düşür.

O əlavə edir ki, Şuşa türməsinin yanından keçib 29 il həsrətində olduqları  qəbirstanlıqda şəhidlərin, doğma və yaxınlarının məzarlarını ziyarət edə bilmirlər: “Hazırda biz Əjdaha, hətta İsa bulağına da getmək iqtidarında deyilik.  Müharibədən sonrakı ilk günlərdə Şuşada su yox idi, buna görə hərbiçilərimizi İsa bulağına buraxırdılar. Ancaq indi artıq Şuşada su olduğu üçün ora da buraxmırlar...”, deyə keçmiş kəşfiyyatçı vəziyyəti izah edir. 

A.Kərimov deyir ki, Azərbaycan tərəf Şuşadan 2 km aşağıda Xəlfəli, Qaybalı kəndlərinə, Kərkicahan qəsəbəsinə də birbaşa nəzarət edə bilmir, halbuki, Şuşaya tam nəzarət etmək üçün həmin kəndlərlə yanaşı, Şuşanın Zarıslı kəndinə çatmamış yüksəklikdə Laçın rayonunun Fingə, Şırlan və s. kəndləri də, eləcə də Kirs, Sarıbaba yüksəklikləri də bizim əlimizdə olmalıdır...”

Keçmiş kəşfiyyatçı deyir ki, artıq yaz gəlir, meşələrdə ağaclar yarpaqlamağa başlayır, erməni silahlı qrupları bundan yararlanaraq müxtəlif yerlərdə gizlənib yeni təxribatlar törədə bilərlər. Bunun qarşısını almaq üçün Rusiyanın “sülhməramlı” adlanan hərbiçilərindən Yuxarı Qarabağda, xüsusən Şuşa, Hadrut ətrafındakı ərazilərdə qalmış erməni silahlı birləşmələrinin tərksilah olunmasını tələb etmək lazımdır, əgər etməsələr, Azərbaycan antiterror əməliyyatı həyata keçirməli, eyni zamanda Laçın rayonu ilə Ermənistan arasında sərhəd-keçid məntəqəsinə Milli Ordu, DTX,  Gömrük Komitəsi nəzarət etməlidir.

“Yenisabah.az” saytı isə “Qarabağda razılaşma pozulur və görünür ki... – tərksilah olunmalıdırlar” sərlövhəli məqalədə postmüharibə dövründə

Qarabağ bölgəsindəki vəziyyət keçmiş xarici işlər naziri Tofiq Zülfüqarovla müzakirə edilir.

Həm də vəziyyətə dövlət başçısı İIham Əliyevin fevralın 26-da yerli və xarici jurnalistlər üçün keçirdiyi dörd saatlıq mətbuat konfransı fonunda qiymət verilir.

Müəllif deyir ki, həmin mətbuat konfransında azərbaycanlı köçkünlərin Xankəndinə, Xocavəndə, Xocalıya, Ağdərəyə köçürüləcəyinə və orada birgə yaşayışın təmin olunacağı bölgədə Azərbaycanın suverenliyinin bərpa olunacağına, Rusiya sülhmərmalılarının faliyyətinə də toxunulub.

Keçmiş nazir T.Zülfüqarov isə deyir ki, müharibədən sonra istər Azərbaycanda, istərsə də beynəlxalq ictimaiyyətdə üçtərəfli bəyanatla bağlı xeyli suallar yaranmışdı, bu suallara aydınlıq gətirildi.

Eks-nazir vurğulayır ki, əksəriyyət 44 günlük müharibənin nəticələrini Azərbaycan üçün qələbə sayır, amma müəyyən hissə sosial şəbəkələrdə hansısa narahatlıq doğuran məsələləri dilə gətirir.

T.Zülfüqarov mətbuat konfransında dövlət baçısının cavablarına əsasən deyir: “Qarabağ ətrafında baş verən bütün proseslər, diplomatik danışıqlarda müzakirəyə çıxarılan məsələlər Azərbaycan dövlətinin və İlham Əliyevin tam nəzarəti altındadır. Bu baxımdan hesab edirəm ki, proseslər öz axarı ilə həm də Azərbaycanın xeyrinə davam edəcək”.

Keçmiş nazir Xankəndi, Xocalı, Xocavənd və Ağdərə ilə bağlı məsələlərin də öz müsbət həlini tapacağını, bu ərazilərdə Azərbaycanın suvereniyinin tam təmin ediləcəyini bildirib. 

T.Zülfüqarova görə, haqqında danışılan ərazilərin Azərbaycana inteqrasiyası bir az zaman tələb edir və səbrli olmaqda fayda var, amma bəzi məsələlərə daha çevik yanaşmaq lazım gəlir: “Xüsusilə Qarabağ bölgəsində ermənilərin qanunsuz silahlı birləşmələri saxlamasına son qoyulmalı, qanunsuz silahlar yığışdırılmalıdır. Bu məsələ çox aktualdır və hesab edirəm ki, ermənilərin silahsızlaşdırılması çox yaxın vaxtda həll olunmalıdır”, deyə keçmiş nazir bildirir.

T.Zülfüqarova görə, 10 noyabr razılaşmasındakı müddəaların bir qisminin lazımi səviyyədə həyata keçirilməməsi Azərbaycanın Laçın dəhlizinə nəzarət etməməsindən irəli gəlir. 

“Hit.az” saytında isə “Neftin qiymətləri 100 dollar səddini keçə bilərmi?” sərlövhəli məqalədə suala cavabı Neft Araşdırmaları Mərkəzinin rəhbəri İlham Şaban cavablandırır.

Müəllif deyir ki, dünya bazarında neftin qiyməti artır, bu, “Azeri Light” markalı Azərbaycan neftinin qiymətinə də təsir edir. Eyni zamanda, müəllif ekspertə dünyanın alternativ enerjiyə keçid etdiyi indiki dövrdə neftin nə dərəcədə bahalaşa bilməsi sualını ünvanlayır.

Mərkəz rəhbəri deyir ki, neft qiymətləri 2020-ci ilin 8 yanvar tarixindən bu yana ən yüksək həddədir, hazırda neftin bir barelinin qiyməti 68 ABŞ dollarına yaxınlaşır.

Ekspertə görə, neftin bahalaşmasına səbəb koronavirusa qarşı vaksinasiyanın  başlanması, pandemiya ilə bağlı kütləvi yoluxmanın geridə qalması, bəzi  ölkələrdə pandemiya ilə bağlı yumşaldılmaların enerjiyə tələbatı artırmasıdır. 

Mərkəz rəhbəri vurğulayır ki, martın 4-də OPEK+ iştirakçıları aprelin 1-dən etibarən hasilat həcmləri ilə bağlı qərar verməlidirlər və hasilatı fevral-mart aylarındakı səviyyədə saxlasalar, neftin barelinin qiyməti 70 ABŞ dollarını ötə bilər.

Ekspert əlavə edir ki, fors major hallarda neftin bir barelinin qiyməti 100 dollar həddini ötə, gün ərzində hər hansı bir partiya 80 və ya 100 dollara satıla bilər.

Mərkəz rəhbərinə görə, 2025-ci ilə qədər neftin ortalama qiyməti 50-60 dollar arasında dəyişəcək.