Media-icmal 01.06.20

Beynəlxalq Uşaq Hüquqları Günü, mövcud Azərbaycan cəmiyyəti barədə düşüncələr, ölkədə işsizlik statistikasının durumu, “koronavirus pandemiyası söhbətləri” və s. məsələlər medianın aparıcı mövzularıdır.  

Rəsmi “Azərbaycan” qəzeti “Dünyanı uşaqlara verin!” sərlövhəli məqalədə Azərbaycanda uşaqların vəziyyətini dəyərləndirir.

Müəllif yada salır ki, 1 iyun Beynəlxalq Uşaq Hüquqları Günüdür və BMT hələ 50 il bundan öncə, 1950-ci il iyunun 1-də bununla bağlı qərar qəbul edib, uşaq hüquqlarına dair konvensiya qəbul edilib.

Müəllif əlavə edir ki, Azərbaycan müstəqilliyini bərpa etdidən sonra bu Konvensiyaya qoşulub.

Müəllifin deməsinə görə, Azərbaycanda uşaq hüquqlarının təmin olunması, onların istedadının üzə çıxarılması istiqamətində fond tərəfindən silsilə tədbirlər keçirilir, 2009-cu il isə "Uşaq ili” elan olunub.

Yazıda deyilir ki, 2009-cu ilin oktyabrında Bakıda Uşaq ili və BMT-nin Uşaq Hüquqları Konvensiyasının 20 illiyinə həsr olunmuş uşaqların müdafiəsi islahatı üzrə ikigünlük konfrans keçirilib.

Müəllifə görə, hazırda uşaqlara tibbi xidmət göstərən 600-dən artıq poliklinika, ambulatoriya və uşaq şöbəsi olan müəssisələrdə on minlərlə həkim-pediatr çalışır, idman seksiyalarında məşğul olan uşaqların sayı ildən-ilə artır

Məqalə müəllifi deyir ki, uşaqların heç də hamısı xoşbəxt böyümürlər, son yüzillikdəki bir sıra etnik, dini, məhəlli və regional münaqişələrin qurbanlarına çevrilənlərin müəyyən faizi də uşaqların payına düşür: “1988-ci ildən Azərbaycana qarşı davam edən erməni təcavüzü nəticəsində öz doğma ata-baba yurdunda, evində azad yaşamaq haqqını itirmiş uşaqların pozulmuş hüquqlarının bərpası istiqamətində heç bir ciddi və səmərəli addım atılmayıb”,- müəllif bildirir.

Müəllif deyir ki, Qarabağ müharibəsi illərində 1000-dən çox uşaq şəhid olub, 100-lərlə günahsız körpə Xocalıda, işgal edilən digər şəhər və kəndlərdə erməni quldur ordusu tərəfindən əsir götürülüb, işgəncələrə məruz qalıb.

Bu vəsaitlərin az bir hissəsi...

“Azadlıqinfo”  “Normal dünyadan 30 il geridəyik” sərlövhəli məqalədə ictimai fəal Bəxtiyar Hacıyevin mövcud Azərbaycan cəmiyyəti barədə düşüncələrinə yer verilib. 

B.Hacıyev ölkədə həcmi yüz milyonlarla, milyardlarla ölçülən dövlət vəsaitlərinin məmurlar tərəfindən talandığını, amma ölkənin inkişafı üçün lazım olan sahələrə yatırımların edilməməsini diqqət mərkəzinə çəkir. 

İctimai fəal cəmiyyətə xitabla deyir ki, ölkəyə gələn və məmurların saata, sendviçə, mülkə, bahalı geyimlərə, zinət əşyalarına sərf etdikləri bu milyardların çox kiçik faizi Azərbaycanda elm və texnologiyanın inkişafına sərf edilsə idi, bu gün harada olardıq?

“Amma ölkənin hər şəhərində və rayonunda H.Əliyev mərkəzləri, Gənclər mərkəzləri, Olimpiya mərkəzləri tikən dövlət üçün Bakıda bir Elm və Texnologiya Mərkəzi yaradıb, gələcəyə sərmayə qoymaq maraqlı olmayıb. Əvəzində “ambisiyan böyükdür” deyib məni R.Nurullayevin, E.Nəsirovun buraxıldığı parlamentə də buraxmamaq üçün qələbəmi oğurlayıb, Arpadaraiyə veriblər”.

B.Hacıyev hesab edir ki, məmur görməmişliyi, gələcəyi görə bilməmələri, primitivlikləri, ölkənin təkcə bu gününü yox, gələcəyini də məhv etməkdədir.

“Əvvəl-axır bu ölkənin gəncləri dünyanın inkişaf etmiş ölkələrinin yaratdığı elm və texnologiya meylli mühitdə yaşayacaqlar. Onsuz da normal dünyadan 25-30 il geridə qalmışıq, bir əlavə 20 il də itirməyək. Məni ən çox narahat edən budur”, - B.Hacıyev mövqeyini ifadə edir.

Bu statistika nə dərəcədə etibarlıdır?

“Moderator.az” "Ölkədə işsizlərlə bağlı statistikanın dəqiqləşdirilməsinə ehtiyac var" sərlövhəli məqalədə isə deputat Əli Məsimlinin Milli Məclisin mayın 31-də keçirilmiş iclasındakı çıxışının əsas məqamları diqqətə çatdırılır.

Ə.Məsimlinin deməsinə görə, seçicilərlə onlayn görüşlərində təbii fəlakətlərlə bağlı Şəki kəndlərində 2015-ci ildən bu yana görülən işlər  həmin ziyanın miqyasına adekvat deyil. Deputat hesab edir ki, insanların düşdükləri  ağır vəziyyətdən çıxarılması üçün işlərin sürətləndirilməsi zəruridir.        

Deputata görə, əhalinin həssas təbəqəsinin real durumunu nəzərə alaraq  aprel-may ayları üçün nəzərdə tutulan 190 manatlıq birdəfəlik ödənişin iyun ayında da verilməsinə baxılmalıdır.

Ə.Məsimli daha bir məsələni diqqətə çatdırıb: “Ölkədə işsizlərlə bağlı statistikanın dəqiqləşdirilməsinə ehtiyac var. Müraciət edənlərin çoxu  yardımla yanaşı, həm də  işlə təmin edilməsini də istəyir. 190 manatlıq birdəfəlik ödəmə əvvəl 200 min adama, sonra 600 min nəfərə  şamil edildi. Amma bu da son rəqəm deyil. Ona görə də təklif edirəm ki, statistika yenidən işlənib hazırlansın”.

Deputata görə, kənddə yaşayan əhalinin kiçik pay torpağına görə ünvanlı sosial yardım almasının qarşındakı  maneələr aradan qaldırlmalıdır.

Deyirlər ki...

“Yeni Cabah.az” saytı isə “Dedilər ki, 3000-5000 pul veririk, icazə verin yazaq ki, koronavirusdan ölüb” - Deputatdan şok açıqlamalar” sərlövhəli məqalədə deputat Razi Nurullayevin koronavirus infeksiyasının törətdiyi fəsadlar barədə düşüncələrinə yer verib.  

Deputat maska taxmamağa görə cərimələrin tətbiqinə  birmənalı yanaşmadığını, eyni zamanda vətəndaşların maska taxmamalarını da bəyənmədiyini söyləyir: “Vətəndaşlar niyə maska taxmır? Məgər canlarından bezib? Xeyr. Çünki onlar koronavirusa inanmır, bunun bir dünyəvi oyun olduğunu düşünür... Bu xəstələri çəkib göstərin, adlarını, yaşayış yerlərini deyin, özlərini danışdırın, statistikanı açıqlayanda rayonları, ünvanları, cinsini, yaş üzrə məlumatları deyin... Xəstələr niyə gizlədilir? Bu səbəbdən də vətəndaşlar rəsmi məlumatlara yox, daha çox şayiələrə inanır. Adamlar deyirlər ki, qocamız rəhmətə gedib, yaxınlaşıb dedilər ki, sizə 3000-5000 pul veririk, icazə verin yazaq ki, koronavirusdan ölüb. Buna inanmağım gəlmir, amma şübhə toxumu səpilir axı.

İndi deyirlər ki, ikinci dalğa payızda olacaq? Ümumdünya Səhiyyə Təşkilatı hər kəsin bildiyini hər gün təkrar edir, konkret iş görmək, fakt göstərmək lazımdır.